Read Nzema Wulo 14 Bible Online

Wulo 14 - Nzema bible

Wulo 14

¹ Mɔɔ ye diedi le ekyi la, bɛlie ye wɔ bɛ avinli, noko bɛ nee ye mmasu ye adwenle nu nzuzulɛ biala anwo kpolera.

²Bie diedi maa ɔdi debie biala, na mɔɔ ye diedi le ekyi la di nya nya nee mbakama ala.

³Mɔɔ di debie biala la mmakpo mɔɔ ɛnli debie biala la, yɛɛ mɔɔ di nya nya nee mbakama ala la mmabua mɔɔ di debie biala la ndɛne, ɔluakɛ Nyamenle ɛlie ye ɛdo nu.

⁴Na ɛdawɔ a le nwane mɔɔ ɛbua awie akɛlɛ ndɛne a? Saa ɔyɛ ye boɛ o, ɔnyɛ ye boɛ o, ɔ menle ala a kola ka a, yɛɛ ɔbayɛ boɛ yeamaa ye noko, ɔboalekɛ Awulae kola maa ɔyɛ boɛ ɔmaa ye.

⁵Sonla ne bie adwenle a le kɛ kenle ne bie hyia tɛla kenle mɔɔ ɛha la amuala. Bie noko dwenle nwolɛ kɛ kenle ne amuala sɛ. Ɔwɔ kɛ biala dwenle nwolɛ kpalɛ na ɔmaa ye adwenle si pi wɔ nwolɛ.

⁶Mɔɔ dwenle nwolɛ sie kenle ko kɛ ɔhyia ɔtɛla kenle mɔɔ ɛha la yɛ ye zɔhane wɔ Awulae anyunlunyia ti; mɔɔ di debie biala la yɛ ye zɔhane wɔ Awulae anyunlunyia ti, ɔboalekɛ ɔyɛ Nyamenle mo wɔ aleɛ biala mɔɔ ɔbali la anwo. Mɔɔ kpo kɛ ɔnrɛli debie biala la yɛ ye zɔhane wɔ Awulae anyunlunyia ti, ɔluakɛ ɔdaye noko ɔyɛ Nyamenle mo wɔ nwolɛ.

⁷Yɛ nuhua ko biala ɛnde aze ɛmmaa ɔ nwo, yɛɛ yɛ biala ɛnwu ɛmmaa ɔ nwo.

⁸Saa yɛde aze a, yɛde yɛmaa Awulae, yɛɛ saa yɛwu a, yɛwu yɛmaa Awulae. Yemɔti saa yɛde aze o, yɛwu o, yɛle Awulae ɛdeɛ.

⁹Ɔluakɛ ɛhye ati a Kelaese wule na bɛdwazole ye bɛrale ngoane nu a, amaa yeayɛ anyewɔzo amra nee mɔwuamra Awulae.

¹⁰ Saa ye zɔhane a ɛnee wɔmɔ, duzu ati a ɛkɛbua ɛ gɔnwo ndɛne a? Ɛdawɔ noko, duzu ati a ɛkɛtoto ɛ gɔnwo anwo nyɛlɛ ɛ? Yɛ muala yɛbagyinla Nyamenle ndɛnebualɛ ebia ne anyunlu.

¹¹ Ɔluakɛ Nyamenle Edwɛkɛ ne se, “Awulae se, suzuamgba ala mɔɔ mame a mele tease Nyamenle ne la, awie biala babu ndwɛlɛ wɔ me nyunlu, yɛɛ menli muala bayeyɛ me kɛ mele Nyamenle.”

¹²Zɔhane ati yɛ nuhua ko biala babu ye mgbonda ahile Nyamenle.

¹³Zɔhane ati, bɛmaa yɛgyakyi yɛ gɔnwo mɔ ndɛne ɛbualɛ, na yɛbɔ kpɔkɛ kɛ yɛnrɛyɛ debie biala mɔɔ kɛmaa adiema bie kɛhɔ ɛtane nu anzɛɛ kɛkpo aze a.

¹⁴Sumunli kɛ me nee Awulae Gyisɛse lile ngamɔnu la menwu ye kɔsɔɔ kɛ aleɛ biala ɛnle ɛkɛ mɔɔ anwo ɛnde a. Na saa awie dwenle kɛ bie anwo ɛnde a, ɛnee nwolɛ ɛnde ɛmmaa ɔdaye ɔ ngome,

¹⁵yɛɛ saa ɛmaa aleɛ mɔɔ ɛdi la amaa ɛ gɔnwo ali nyane a ɛnee ɛngulo ye. Mmamaa wɔ aleɛ mɔɔ ɛdi la sɛkye sonla mɔɔ Kelaese ɛwu ɛlie ye ngoane la.

¹⁶Mmamaa debie mɔɔ ɛdwenle kɛ ɔle kpalɛ ɔmaa wɔ la nyia duma ɛtane.

¹⁷Ɔluakɛ Nyamenle Belemgbunlililɛ ne, tɛ yemɔ a le nlidi nlidi anzɛɛ nono nono, na yemɔ a le pɛlepɛlelilɛ, anzonudwolɛ nee anyelielɛ ne mɔɔ Sunsum Nwuanzanwuanza ne fa maa la.

¹⁸Awie biala mɔɔ sonle Kelaese wɔ zɛhae adenle zo la yɛɛ Nyamenle anye die ɔ nwo na ɔsɔ menli nye a.

¹⁹Zɔhane ati, ɔwɔ kɛ kenle biala yɛyɛ ninyɛne mɔɔ fa anzonudwolɛ ba na ɔboa yɛ nee yɛ gɔnwo mɔ na ɔmaa yɛ anwosesebɛ la.

²⁰Bɛmmatoa aleɛlilɛ bɛsɛkye Nyamenle gyima ne. Debie biala anwo te, noko ɔle ɛtane kɛ ɛkɛli debie mɔɔ kɛmaa ɛ gɔnwo kɛhɔ ɛtane nu la.

²¹Debie kpalɛ mɔɔ ɔwɔ kɛ bɛyɛ la a le kɛ bɛkɛgyakyi nane ɛlilɛ, nza ɛnlonlɛ, anzɛɛ debie mɔɔ bɛyɛ a ɔkɛmaa bɛ gɔnwo kɛkpo aze la ɛyɛlɛ.

²²Diedi biala mɔɔ ɛlɛ ye wɔ ɛhye anwo la, maa ɔli ɛdawɔ nee wɔ Nyamenle bɛ avinli. Nyilalɛ ɛha sonla ne mɔɔ kɛyɛ debie mɔɔ ɔnea a ye adenle zo ɔ na nzinlii ɔnrɛli nwolɛ nyane la.

²³Na saa wɔ adwenle yɛ wɔ kesee wɔ debie mɔɔ ɛdi la anwo na ɛdi a, ɛbali fɔlɛ kɛ ɛlile a, ɔluakɛ wɔanlua diedi zo a ɛlile a. Debie biala mɔɔ ye ɛyɛlɛ ɛngyi diedi zo la le ɛtaneyɛlɛ.