Read Nzema Wulo 15 Bible Online

Wulo 15 - Nzema bible

Wulo 15

¹Ɔwɔ kɛ yɛdayɛ mɔɔ yɛ diedi nu yɛ se la yɛboa bɛdabɛ mɔɔ bɛ diedi nu ɛnyɛ se la wɔ bɛ debie biala anu. Ɔnle kɛ yɛmaa yɛ nye die yɛ ngome yɛ nwo ala.

²Mɔɔ ɔwɔ kɛ yɛyɛ la a le kɛ yɛkɛmaa yɛ gɔnwo mɔ anye kɛlie bɛ nwo wɔ bɛ boɛlilɛ ti, amaa bɛ diedi anyi.

³ Ɔluakɛ Kelaese andwenle ɔdaye mumua ne ɔ nwo. Nyamenle Edwɛkɛ ne se, “Aholoba mɔɔ menli bɔle wɔ la ɛragua me nwo zo.”

⁴Debie biala mɔɔ bɛhɛlɛ ye wɔ Nyamenle Edwɛkɛ ne anu la wɔ ɛkɛ ne kilehile yɛ, amaa yɛagyinla kpundii, yɛazi yɛ ahonle yɛalua mɔɔ Nyamenle Edwɛkɛ ne fa maa yɛ la azo yɛanyia anyelazo.

⁵Nyamenle mɔɔ maa yɛgyinla kpundii na ɔmaa yɛ akɛnrazilɛ la, ɛboa bɛ ɛmaa bɛ muala bɛdɛnla anloanzɛlɛ nu, na bɛva Kelaese Gyisɛse agyakɛ,

⁶amaa bɛ muala kɔsɔɔti bɛava ɛnelɛ ko bɛaye yɛ Awulae Gyisɛse Kelaese ɔ ze Nyamenle ne ayɛlɛ.

⁷Zɔhane ati bɛlie bɛ nwo ngoko ngoko wɔ Nyamenle anyunlunyia ti, kɛmɔ Kelaese liele bɛ la.

⁸Ɔluakɛ meka meahile bɛ kɛ Kelaese yɛle ɔ nwo sonvolɛ wɔ Dwuuma ati, vale hilele kɛ Nyamenle di nɔhalɛ, kɛ ɔkɛmaa ye ɛwɔkɛ ne mɔɔ ɔbɔle yɛ nlenya mɔ la kɛyɛ zɔhane,

⁹ na yeamaa bɛdabɛ mɔɔ bɛnle Dwuuma la aye Nyamenle ayɛlɛ wɔ ye anwunvɔnezelɛ ne ati. Ɔluakɛ Nyamenle Edwɛkɛ ne se, “Zɔhane ati mebaye wɔ ayɛlɛ wɔ menli mɔɔ ɛnle Dwuuma la avinli. Mebado ayɛlɛyelɛ edwɛne meayeyɛ wɔ”

¹⁰ Bieko, ɔse, “Maanle maanlema mɔɔ ɛnle Dwuuma la, bɛ nee Nyamenle menli ne mɔɔ yekpa nu yeye bɛ la ɛli fɛlɛko.”

¹¹ Eza ɔse, “Bɛmɛ mɔɔ bɛnle Dwuuma la, bɛye Awulae ayɛlɛ; menli kɔsɔɔti, bɛye ye ayɛlɛ.”

¹² Ayezaya noko se, “Gyɛsi anlɔnra bie bavinde; ɔbara yearazie maanle maanle mɔɔ ɛnle Dwuuma la kɔsɔɔti, na bɛdabɛ mɔɔ bɛnle Dwuuma la bava bɛ rɛle awula ye nu.”

¹³Nyamenle mɔɔ le yɛ nzuzuguazo la ɛmaa bɛ anyelielɛ nee anzonudwolɛ wɔ bɛ diedi mɔɔ wɔ ye nu la ati, amaa bɛalua Sunsum Nwuanzanwuanza ne tumi zo bɛ anyelazo anyi.

¹⁴Me mediema, medame mumua ne medie meto nu kɛ kpalɛyɛlɛ ɛyi bɛ tɛkɛɛ, yɛɛ bɛlɛ adwenle ne na bɛkola bɛkilehile bɛ nwo ngoko ngoko.

¹⁵Noko wɔ kɛlata ɛhye anu, mezi me kɛnra meha ninyɛne bie anwo edwɛkɛ mehakye bɛ adwenle wɔ nwolɛ. Menyɛle ye zɔhane, ɔlua gyinlabelɛ mɔɔ Nyamenle ɛva me ɛzie la ati,

¹⁶kɛ mele Kelaese Gyisɛse akɛlɛ mɔɔ ɔwɔ kɛ yɛ gyima wɔ menli mɔɔ ɛnle Dwuuma la avinli. Mesonle kɛ sɛlɛvolɛ mɔɔ ɔwɔ kɛ mebɔ Edwɛkpa ne mɔɔ vi Nyamenle ɛkɛ ne la nolo, amaa bɛdabɛ mɔɔ bɛnle Dwuuma la ayɛ azubɔdeɛ mɔɔ Sunsum Nwuanzanwuanza ne a ɛde nwolɛ na ɔsɔ Nyamenle anye la.

¹⁷Zɔhane ati, Kelaese Gyisɛse ati, mekola mefa gyima mɔɔ meyɛ memaa me Nyamenle la metu me nwo.

¹⁸Ɔluakɛ menrɛha edwɛkɛ ngakyile biala kɛ ninyɛne mɔɔ Kelaese ɛlua me nwo zo ɛyɛ la ala, amaa mealie bɛdabɛ mɔɔ bɛnle Dwuuma la meamaa bɛayɛ tieyɛ bɛamaa Nyamenle. Mebaha mɔɔ Kelaese yɛle la wɔ ɛdendɛlɛ nee nyɛleɛ nu,

¹⁹ye nwanwane gyima mɔɔ ɔyɛle, nee mɔɔ ɔvale Nyamenle Sunsum ne tumi ɔyɛle la. Yemɔti wɔ me adendulɛ nu, ɔvi Gyɛlusalɛm mɔɔ badwu Yelelekɛm, meha na meva Kelaese anwo Edwɛkpa ne amuala medo gua.

²⁰Ɛhye ati mɔɔ mekpondɛ la a le kɛ menwɔva Edwɛkpa ne menwɔdo gua wɔ ɛleka mɔɔ bɛtɛtele Kelaese nganeɛ ɛlɛ la, amaa meangɔnzɔ mɔɔ awie gyɛne ɛbɔ ɔ bo la azo.

²¹ Nyamenle Edwɛkɛ ne se, “Bɛdabɛ mɔɔ bɛanga ɔ nwo edwɛkɛ bɛangile bɛ la banwu ye, yɛɛ bɛdabɛ mɔɔ bɛtɛtele ɔ nwo edwɛkɛ ɛlɛ la banyia ndelebɛbo.”

²² Ɛhye ati a mekɛ dɔɔnwo mɔɔ ɛze ɛhɔ la meannyia adenle meambamkpɔla bɛ la.

²³Na kɛkala mɔɔ akee mewie me gyima di wɔ maanzinli ɛhye mɔ anu, na eza ɛvolɛ dɔɔnwo mɔɔ ɛraze ɛhɔ la mehulo kɛ menwɔra bɛ nwo lɔ la ati,

²⁴me nye la kɛ akee mebara. Saa mese meahɔ Sepeen a mebava bɛ nwo ɛkɛ ne, amaa medi mekɛ ekyi wɔ bɛ nwo ɛkɛ a, bɛaboa me bɛamaa meazɔ me adendulɛ ne azo.

²⁵ Kɛkala, melɛ nwanle bie mekamaa Nyamenle menli ne mɔɔ wɔ Gyɛlusalɛm la.

²⁶Ɔluakɛ asɔnema mɔɔ wɔ Masidonea nee Akaya (Giliki maanle nu) la ɛdwenle nwo ɛbɔ kpɔkɛ kɛ bɛkeha bɛ sa aze bɛahɔboa ehyianvolɛma mɔɔ wɔ Nyamenle menli ne anu, wɔ Gyɛlusalɛm la.

²⁷ Ɔle bɛdabɛ bɛ ti anwo adwenle mɔɔ bɛvale ɛdeɛ, noko nɔhalɛ nu, bɛdi ɛzonle kɛ ɔwɔ kɛ bɛyɛ ye zɔhane na bɛboa bɛ. Kɛmɔ Dwuuma ɛmaa bɛdabɛ mɔɔ bɛnle Dwuuma la sunsum nu nyilalɛ ne bie la, ɔwɔ kɛ bɛdabɛ mɔɔ bɛnle Dwuuma la noko fa bɛ ɛbɛla nu nyilalɛ ne bie boa Dwuuma.

²⁸Saa mewie gyima ɛhye di na mefa mɔɔ bɛnyia ye la mekɔmaa bɛ mewie a, mebaraze meahɔ Sepeen, na mebava bɛ nwo ɛkɛ ne mearakpɔla bɛ.

²⁹Meze kɛ saa menyia mebadwu bɛ nwo lɔ a, Edwɛkpa ne nolobɔlɛ ne bava Kelaese anu nyilalɛ dɔɔnwo arɛlɛ bɛ.

³⁰Mediema, mesɛlɛ bɛ, ɔlua yɛ Awulae Gyisɛse Kelaese ati, ɔ nee ɛhulolɛ ne mɔɔ le Sunsum Nwuanzanwuanza ahyɛlɛdeɛ ne la ati, bɛboa me wɔ me gyima ye ɛyɛlɛ nu na bɛzɛlɛ Nyamenle bɛmaa me.

³¹Bɛzɛlɛ kɛ Nyamenle kɛlie me kɛvi Dwudiyama ne mɔɔ ɛnlɛ diedi la asa anu, na eza me gyima mɔɔ mekali ye wɔ Gyɛlusalɛm la kɛzɔ Nyamenle menli ne mɔɔ wɔ ɛkɛ ne la anye,

³²amaa saa ɔyɛ Nyamenle ɛhulolɛ a, meava anyelielɛ mearakpɔla bɛ. Medie medi kɛ meba a me nye balie.

³³Nyamenle mɔɔ maa anzonudwolɛ la nee bɛ muala ɛdɛnla. Amen.