Read Nzema Wulo 4 Bible Online

Wulo 4 - Nzema bible

Wulo 4

¹Ɛnee akee Ebileham, mɔɔ le azɛlɛ ye azo yɛ nlenya la, duzu a yɛka ye wɔ ɔ nwo a? Ye ɛbɛla ɛbɔlɛ ne a le boni?

²Saa ye nyɛleɛ a manle ɔzɔle Nyamenle anye a, anrɛɛ ɛnee ɔlɛ debie ɔfa ɔtu ɔ nwo wɔ nwolɛ. Noko ɔngola ɔndu ɔ nwo wɔ Nyamenle anyunlu.

³ Nyamenle Edwɛkɛ ne se, “Ebileham liele Nyamenle lile, na ye diedi ne ati Nyamenle liele ye dole nu kɛ ɔle tenlenenli.”

⁴Sonla mɔɔ yɛ gyima la bɛtua ye nwolɛ kakɛ, ye ahatualɛ ne ɛnle ahyɛlɛdeɛ, ɔle debie mɔɔ yehwi ɔ ti anwo a yenyia ye a.

⁵Na mɔɔ ɛnyɛ gyima na ɔdie Nyamenle ne mɔɔ bua ɛtanevolɛma benle la di la, ye diedi zo yɛɛ Nyamenle nea na ɔmaa ɔsɔ ɔ nye a.

⁶Zɔhane ala yɛɛ Belemgbunli Devidi ka ye wɔ sonla ne mɔɔ saa ɛye ye gyimayɛlɛ ɛsie ahane a ɛnee Nyamenle die ye to nu kɛ ɔle tenlenenli la anwo a. Ɔse:

⁷ “Nyilalɛ ɛha bɛdabɛ mɔɔ Nyamenle ɛva bɛ ɛtane ɛhyɛ bɛ na yeheda bɛ ɛtane ne mɔ azo la!

⁸Nyilalɛ ɛha sonla ne mɔɔ Awulae ɛmbu ye ɛtane nwo mgbonda la!”

⁹Anzɛɛ nyilalɛ ɛhye mɔɔ Devidi ka nwolɛ edwɛkɛ la wɔ ɛkɛ maa bɛdabɛ mɔɔ bɛyɛ bɛ mrenyanu nzonlɛ la angome ɔ? Kyɛkyɛ. Ɔwɔ ɛkɛ ɔmaa bɛdabɛ noko mɔɔ bɛtɛyɛle bɛ mrenyanu nzonlɛ la. Ɔluakɛ Nyamenle Edwɛkɛ ne se, “Ebileham liele Nyamenle lile, na ye diedi ti, Nyamenle liele ye dole nu kɛ ɔle tenlenenli.”

¹⁰Mekɛ boni anu a ɛhye zile a? Ɔzile na Ebileham ayɛ ye mrenyanu nzonlɛ anzɛɛ ɔyɛle ye mrenyanu nzonlɛ kolaa na yeazi? Ɔzile kolaa na yeayɛ.

¹¹ Nzinlii a Ebileham manle bɛyɛle ye mrenyanu nzonlɛ, ɔvale ɔyɛle sɛkɛlɛneɛ anzɛɛ nzonlɛ mɔɔ kile kɛ Nyamenle ɛlua ye diedi zo ɛmaa yezɔ ɔ nye a. Yemɔti Sunsum nu a, ɛnee Ebileham le bɛdabɛ mɔɔ bɛdie Nyamenle bɛdi na yelie bɛ kɛ bɛsɔ ɔ nye, noko bɛtɛyɛle bɛ mrenyanu nzonlɛ la bɛ ze.

¹²Eza ɔle bɛdabɛ noko mɔɔ bɛyɛ bɛ mrenyanu nzonlɛ, na tɛ kɛ asɛɛ bɛyɛ bɛ mrenyanu nzonlɛ la ati ɔ, na bɛva ɔ gyakɛ na bɛ diedi le kɛ ɔdaye Ebileham ɛdeɛ ne kolaa na yeayɛ ye mrenyanu nzonlɛ la bɛ ze.

¹³Nyamenle bɔle Ebileham ɛwɔkɛ kɛ azɛlɛ ne bayɛ ye nee ɔ bo zo amra ɛdeɛ. Nyamenle bɔle ɛwɔkɛ ɛhye, tɛ kɛ Ebileham lile mɛla ne azo la ati ɔ, na ɔliele Nyamenle ɔlile, na ɔlua zolɛ Nyamenle manle ɔzɔle ɔ nye.

¹⁴Ɔluakɛ saa Nyamenle ɛwɔkɛ ne mɔɔ fane agyalilɛ nwo la wɔ ɛkɛ maa bɛdabɛ mɔɔ bɛdi Mosisi mɛla ne azo la angome a, ɛnee noko sonla diedi mɔɔ wɔ Nyamenle anu la le mgbane, yɛɛ nvasoɛ biala ɛnle Nyamenle ɛwɔkɛ ne azo.

¹⁵Mɛla ne azo ɛlilɛ bɔbɔ, yɛka Nyamenle ɛya; na ɛleka noko mɔɔ mɛla ɛnle la, menli ɛndo mɛla.

¹⁶Ɛwɔkɛ ne gyi diedi zo, amaa yɛanyɛ Nyamenle ɛlolɛ ahyɛlɛdeɛ yeammaa bɛdabɛ mɔɔ bɛdi Mosisi mɛla ne azo la angome, na yeayɛ ɛlolɛ mɔɔ ka Ebileham abo zo amra amuala mɔɔ lɛ diedi kɛ ɔdaye Ebileham la. Ɔluakɛ Ebileham le yɛ muala yɛ ze wɔ sunsum nu.

¹⁷Nyamenle Edwɛkɛ ne se, “Meyɛ wɔ maanle maanle dɔɔnwo bɛ ze.” Nyamenle ɛhye mɔɔ Ebileham liele ye lile la a bɔle Ebileham ɛwɔkɛ ne a. Nyamenle ɛhye a maa mɔɔ ɛwu la dwazo ba ngoane nu na ɔ nloa edwɛkɛ maa mɔɔ ɛnle ɛkɛ la ba a.

¹⁸ Ebileham liele Nyamenle ɛwɔkɛ ne lile na ɔmanle ɔ nye lale zo ɛsesebɛ, wɔ mekɛ mɔɔ ɛnee anyelazo ɛwie la, kɛ ɔbayɛ “maanle maanle bɛ ze.”

¹⁹ Ɛnee yeli ɛvolɛ asɛɛ ɛya, noko ye diedi andɔ sinli, kɛmɔ ɔnea a ɛnee asɛɛ yewu, na ɔ ye Sɛla le mota la.

²⁰Ye diedi ne anga aze wɔ Nyamenle ɛwɔkɛ ne anwo, na ye diedi ne manle ye anwosesebɛ na ɔyele Nyamenle ayɛlɛ.

²¹Ɔliele ɔlile bɔkɔɔ kɛ Nyamenle kola yɛ mɔɔ yeha la maa ɔbo zolɛ.

²²Ɛhye ati yɛɛ Nyamenle luale ye diedi ne azo “liele ye kɛ ɔle tenlenenli” a.

²³Edwɛkɛ agbɔkɛ “bɛliele ye kɛ ɔle tenlenenli” ne, bɛangɛlɛ bɛammaa ɔ ngome kye.

²⁴Bɛhɛlɛle bɛmanle yɛdayɛ noko mɔɔ yɛdie mɔɔ dwazole yɛ Awulae Gyisɛse vile ewule nu la yɛdi la.

²⁵ Bɛyele Gyisɛse bɛmanle ɔwule wɔ yɛ ɛtane ti na bɛdwazole ye bɛrale ngoane nu, amaa bɛalie yɛ kɛ yɛsɔ Nyamenle anye.