Read Nzema Wulo 6 Bible Online

Wulo 6 - Nzema bible

Wulo 6

¹Ɛnee akee kɛ yɛha yɛze ɛ? Yɛhɔ zo yɛyɛ ɛtane amaa Nyamenle ɛlolɛ ne azo ɔ?

²Kyɛkyɛ! Saa ɛtane maa yɛwu a, ɛnee kɛ yɛsi yɛtɛnla ɛtane nu bieko ɛ?

³Bɛdabɛ bɛze kɛ mɔɔ bɛzɔnenle yɛ bɛmanle Kelaese Gyisɛse la, ɛnee bɛzɔne yɛ bɛmaa ye ewule ne.

⁴ Zɔhane ati yɛlua ɛzɔnenlɛ ne azo bɛziele yɛ bɛbokale ɔ nwo wɔ mekɛ mɔɔ ɔwule la, amaa kɛmɔ Selɛ ne vale anyunlunyia tumi ne dwazole ye vile ewule nu la, yɛdayɛ noko yɛabɔ yɛ ɛbɛla ne fofolɛ.

⁵Ɔluakɛ saa yɛ nee Kelaese a hɔle ewule nu a, ɛnee bɛbadwazo yɛdayɛ noko bɛavi ewule nu bɛara ngoane nu, kɛmɔ bɛdwazole ye la.

⁶Yɛze kɛ yɛ su dɛba ne bɛhunle ye bɛbokale Kelaese anwo wɔ meanubaka ne azo, amaa bɛazɛkye yɛ su ɛtane ne tumi ne na yɛanyɛ ɛtane ngɛkɛlɛ bieko.

⁷Ɔluakɛ sonla wu a, ɛnee ɔnle ɛtane tumi bo bieko.

⁸Saa yɛ nee Kelaese ɛwu a, ɛnee yɛdie yɛdi kɛ yɛ nee ye badɛnla ngoane nu.

⁹Yɛze kɛ bɛdwazo Kelaese bɛvi ewule nu na ɔnrɛwu bieko; ewule ɛnlɛ ɔ nwo zo tumi bieko.

¹⁰Ye ewule ne mɔɔ ɔwule la, ɔwule kokye ala ɔyele ɔ nwo wɔ ɛtane asa anu, na ngoane nu mɔɔ kɛkala ɔde la, ɔde ɔmaa Nyamenle.

¹¹Zɔhane ala yɛɛ ɔwɔ kɛ bɛdabɛ noko bɛdwenle bɛmaa bɛ nwo kɛ bɛwu bɛvi ɛtane tumi ne abo, na ɔlua Kelaese Gyisɛse ati bɛde aze bɛmaa Nyamenle.

¹²Zɔhane ati ɔnle kɛ ɛtane nyia bɛ nwo zo tumi bieko na ɔmaa bɛdi ye atiakunluwɔzo nzi.

¹³Eza ɔnle kɛ bɛtu bɛ sonlabaka ne ɛleka biala bɛmaa ɛtane kɛ bɛva bɛyɛ ninyɛndane biala. Bɛva bɛ nwo bɛmaa Nyamenle kɛ menli mɔɔ bɛye bɛ bɛvi ewule nu bɛra ngoane nu, na bɛdu bɛ nwo ɛleka biala bɛmaa Nyamenle kɛ ɔva ɔyɛ gyima mɔɔ sɔ ɔ nye la.

¹⁴Ɔluakɛ ɔnle kɛ ɛtane yɛ bɛ menle bieko; bɛnle mɛla ne abo, bɛwɔ Nyamenle ɛlolɛ ne abo.

¹⁵Duzu bieko? Ɛnee kɛmɔ yɛwɔ Nyamenle ɛlolɛ ne abo na yɛnle mɛla ne abo la ati, ɔwɔ kɛ yɛkɔ zolɛ yɛyɛ ɛtane ɔ? Kyɛkyɛ, ɔnle zɔhane!

¹⁶Bɛdabɛ bɛze ye wienyi kɛ saa bɛbu bɛ nwo bɛmaa awie kɛ bɛsonle ye kɛ bɛle ahanra a, ɛnee bɛle ahanra bɛmaa ahenle ne mɔɔ bɛsonle ye la. Saa ɛtane a le bɛ menle a, bɛbanyia nwolɛ ewule, saa bɛtie Nyamenle noko a, bɛbalie bɛ bɛamaa bɛazɔ Nyamenle anye.

¹⁷Yɛyɛ Nyamenle mo, ɔluakɛ mekɛ bie, ɛnee bɛle ahanra bɛmaa ɛtane, na kɛmɔ bɛvale bɛ ahonle muala bɛyɛle tieyɛ bɛmanle nɔhalɛ ne mɔɔ bɛnwunle ye wɔ ngilehilelɛ mɔɔ bɛnyianle ye la anu la ati

¹⁸bɛliele bɛ bɛvile ɛtane nu na bɛrayɛle ahanra bɛmanle tenleneyɛlɛ.

¹⁹Bɛmaa menga edwɛkɛ ne sikalɛ mɔɔ bɛ adwenle so nu la. Kɛmɔ mekɛ bie bɛyɛle bɛ nwo ahanra bɛmanle ɛtane nee amumuyɛ na bɛyɛle ninyɛndane la, zɔhane ala yɛɛ kɛkala ɔwɔ kɛ bɛyɛ bɛ nwo ahanra bɔkɔɔ bɛmaa tenleneyɛlɛ a, amaa bɛ nwo ade nwuanzaanwu.

²⁰Mekɛ mɔɔ bɛle ɛtane ahanra la, ɛnee bɛnle tenlenema.

²¹Na duzu nvasoɛ yɛɛ bɛnyianle ye wɔ ninyɛne mɔɔ bɛyɛle na ɛnɛ bɛse nwolɛ nyiane la anwo a? Nyɛleɛ ɛhendeɛ ne mɔ awieleɛ a le ewule!

²²Na kɛkala, bɛye bɛ bɛvi ɛtane nu na bɛrayɛ Nyamenle ahanra, bɛ nvasoɛ a le bɛ ɛbɛla mɔɔ bɛte nwolɛ na bɛadu bɛ nwo bɔkɔɔ bɛamaa ye, na ɔlua zo bɛanyia ngoane mɔɔ ɛnlɛ awieleɛ la.

²³Ɔluakɛ ɛtane ahatualɛ a le ewule, na Nyamenle ahyɛlɛdeɛ ne mɔɔ ɔfa ɔmaa mgbane la a le ngoane mɔɔ ɛnlɛ awieleɛ wɔ yɛ Awulae Kelaese Gyisɛse ati.