Read Nzema Wulo 8 Bible Online

Wulo 8 - Nzema bible

Wulo 8

¹Zɔhane ati bɛdabɛ mɔɔ bɛ nee Kelaese Gyisɛse le ko la ɛnlɛ ndeanlɛ biala.

²Ɔluakɛ Sunsum ne mɛla ne mɔɔ Kelaese Gyisɛse ati ɔmaa yɛ ngoane la ɛye me ɛvi ɛtane nee ewule mɛla ne abo.

³Mɔɔ nwonane ne bɛtɛɛyɛlɛ ti mɛla ne angola anyɛ la, Nyamenle ɛyɛ. Yemɔ a le kɛ, ɔzoanle ɔdaye ɔ Ra ne ɔmanle ɔvale sonla nwonane ɛtane ɛhye bie ɔrale na ɔradeanle ɛtane ne mɔɔ de sonla nu la.

⁴Nyamenle yɛle ɛhye, amaa yɛdayɛ mɔɔ yɛde Nyamenle Sunsum ne anu na yɛnde nwonane nu la, mɛla ne ngyehyɛlɛ fɔɔnwo ne ali munli wɔ yɛ nu.

⁵Bɛdabɛ mɔɔ bɛde nwonane nu la adwenle wɔ nwonane nu ninyɛne ɛyɛlɛ zo. Bɛdabɛ noko mɔɔ bɛtɛnla kɛmɔ Sunsum ne kile bɛ la adwenle wɔ Sunsum nu nyɛleɛ zo.

⁶Saa ɛmaa nwonane nu adwenleadwenle keda ɛ nwo zo a, ɔwie ewule; yɛɛ saa ɛmaa Sunsum nu adwenleadwenle keda ɛ nwo zo a, ɔwie ngoane nee anzonudwolɛ.

⁷Yemɔti mɔɔ maa nwonane nu adwenleadwenle keda ɔ nwo zo la le Nyamenle kpɔvolɛ; ɔluakɛ ɔnli Nyamenle mɛla ne azo, yɛɛ ɔdi zo bɔbɔ a ɔnrɛyɛ boɛ;

⁸ɔboalekɛ bɛdabɛ mɔɔ bɛdi bɛ sonlabaka ne atiakunluwɔzo nzi la ɛngola ɛnzɔ Nyamenle anye.

⁹Na bɛmɛ, bɛnde bɛmmaa bɛ sonlabaka ne, na saa Nyamenle Sunsum ne wɔ bɛ nu a, ɛnee noko bɛde bɛmaa Sunsum ne. Mɔɔ ɛnlɛ Kelaese Sunsum ne bie wɔ ye nu la ɛnle Kelaese ɛdeɛ.

¹⁰Na saa Kelaese de bɛ nu a, ɛnee saa ɛtane ti bɛwu nwonane nu bɔbɔ a, Sunsum ne anu bɛlɛ ngoane, ɔboalekɛ bɛlie bɛ bɛmaa bɛzɔ Nyamenle anye.

¹¹ Na saa Nyamenle Sunsum ne, mɔɔ dwazole Gyisɛse vile ewule nu la de bɛ nu a, ɛnee noko mɔɔ dwazole Gyisɛse vile ewule nu la bamaa bɛdabɛ noko bɛ sonlabaka ye mɔɔ wu la ngoane wɔ ye Sunsum ne mɔɔ wɔ bɛ nu la ati.

¹²Zɔhane ati, me mediema, ɛzonle la yɛ nwo zo kɛ ɔnle kɛ yɛtɛnla yɛmaa yɛ sonlabaka ne.

¹³Ɔluakɛ saa bɛtɛnla bɛmaa bɛ sonlabaka ne a, bɛbawu; na saa bɛtɛnla bɛmaa Sunsum ne a, bɛbahu nyɛleɛ ɛtane ne mɔɔ wɔ bɛ nu la, na bɛanyia ngoane.

¹⁴Bɛdabɛ mɔɔ Nyamenle Sunsum ne yɛ bɛ tataa la le Nyamenle amra.

¹⁵ Ɔluakɛ Sunsum ne mɔɔ Nyamenle ɛva ɛmaa bɛ la ɛnyɛ bɛ ahanra, na ɔmmaa bɛnyɛ avoanvoanle. Sunsum ne maa bɛyɛ Nyamenle amra, na ɔlua Sunsum ne tumi zo yɛkola yɛfɛlɛ Nyamenle kɛ, “Egya! Me Papa.”

¹⁶Nyamenle Sunsum ne nee yɛ ɛdeɛ ne bɔ nu maa yɛkola yɛka kɛ yɛle Nyamenle amra.

¹⁷Na saa yɛle ɔ mra a, ɛnee yɛdi agya, yɛɛ ye ɛlolɛ ne mɔɔ yeva yezie ɛkɛ yemaa ɔ mra la yɛbanyia bie, na yɛ nee Kelaese ava mɔɔ Nyamenle ɛva ɛzie ɛkɛ ɛmaa ye la, ɔluakɛ saa yɛ nee Kelaese di nyane a yɛ nee ye kɛnyia ye anyunlunyia ne.

¹⁸Menea a amaneɛ mɔɔ yɛlɛnwu ye ɛke la kpole ɛnrɛdo kenlebie anyunlunyia mɔɔ yɛbanyia ye la.

¹⁹Abɔdeɛ muala ɛlɛkendɛ anwolɔlɛ kpole nu kɛ Nyamenle kɛye ɔ mra kɛhile.

²⁰Ɔluakɛ abɔdeɛ muala mgbane mɔɔ ɛyɛ la, tɛ ɔdaye ye ɛhulolɛ zo ɔ, na Nyamenle ngyehyɛlɛ ɔ. Noko anyelazo ɛhye wɔ ɛkɛ ne kɛ

²¹kenle ko dedee bɛbaye abɔdeɛ muala bɛavi ɛkpɔlɔlɛ akɛlɛzonlenlɛ nu na yeanyia anyunlunyia fanwodi ne mɔɔ Nyamenle amra lɛ ye la.

²²Ɔluakɛ yɛze kɛ toonwo mɔɔ yeradwu ɛnɛ la abɔdeɛ muala ɛlɛte nyane kɛ asɛɛ yevo awolɛ zo.

²³ Na tɛ abɔdeɛ ngome; yɛdayɛ noko mɔɔ yɛnyia Sunsum ne kɛ Nyamenle ahyɛlɛdeɛ mɔɔ lumua la, yɛte nyane wɔ yɛ nu, wɔ mekɛ mɔɔ yɛlɛkendɛ Nyamenle kɛ ɔkɛyɛ yɛ ɔ mra na ɔkɛlie yɛ sonlabaka ne la.

²⁴Anyelazo ɛhye azo yɛɛ ɔlua mɔɔ bɛlie yɛ ngoane a. Na yemɔ a le kɛ, awie ɛmmaa ɔ nye ɛnla debie mɔɔ ɔ nye gyi nwolɛ la azo. Na nwane bɔbɔ yɛɛ kɛmaa ɔ nye kɛla debie mɔɔ ɔ nye gyi nwolɛ la azo a?

²⁵Saa yɛmaa yɛ nye da debie mɔɔ yɛ nye ɛngyi nwolɛ la azo a, yɛɛ yɛfa abotane yɛkendɛ ye ɛnyianlɛ a.

²⁶Zɔhane ala yɛɛ kɛmɔ yɛnlɛ anwosesebɛ la, Sunsum Nwuanzanwuanza ne baboa yɛ a. Ɔluakɛ yɛnze nzɛlɛlɛ yɛ, kɛmɔ ɔwɔ kɛ yɛyɛ la. Sunsum ne ɔdaye a ɔsɛlɛ Nyamenle ɔmaa yɛ wɔ nyanedelɛ nee ɛkponlenlɛ mɔɔ ɛnloanlɛ ɛnrɛhola ye ka la anu a.

²⁷Nyamenle mɔɔ neɛnlea menli kɔsɔɔti ahonle nu la ze sunsum nu adwenleadwenle biala kɛ si de la, ɔluakɛ Sunsum ne kpa ye menli ti kyɛlɛ, ɔsɛlɛ, kɛmɔ Nyamenle ɛhulolɛdeɛ ne de la.

²⁸Yɛze kɛ wɔ debie biala anu, Nyamenle maa debie biala yɛ kpalɛ maa bɛdabɛ mɔɔ bɛkulo ye la, meka bɛdabɛ mɔɔ yevɛlɛ bɛ, kɛmɔ ye ngyehyɛlɛ ne de la.

²⁹Bɛdabɛ mɔɔ Nyamenle ɛkpa nu ɛye bɛ la, yeva bɛ yezie ahane kɛ bɛbayɛ kɛ ɔ Ra ne la, amaa Ralɛ ne ayɛ mediema dɔɔnwo adiema kpanyinli.

³⁰Yemɔti bɛdabɛ mɔɔ Nyamenle ɛkpa nu ɛye bɛ la yɛɛ ɔfɛlɛ bɛ na ɔdielie bɛ ɔmaa bɛsɔ ɔ nye, na ɔ nee bɛ tɛnla anyunlunyia nu a.

³¹Saa ɔle zɛhae ɛdeɛ a, ɛnee akee kɛ yɛzi yɛha ye ɛ? Saa Nyamenle gyi yɛ nzi a nwane a kɛhola yɛ a?

³²Nea, yeanva ɔ Ra ne yeanyɛ yɛ abokɛ na yeva ye yebɔ azu wɔ yɛ muala yɛ ti! Na saa yeva ɔ Ra ne yemaa wɔ yɛ ti a, ɛnee fane nyɛ yɛɛ akee ɔnrɛva ninyɛne muala ɔnrɛboka ɔ Ra ne anwo ɔnrɛmaa yɛ a?

³³Nwane a kɛhola kɛdo Nyamenle menli ne mɔɔ yekpa nu yeye bɛ la ɛzonle a? Nyamenle ɔdaye yebua bɛ benle!

³⁴Nwane a kɛhola kɛbua bɛ fɔlɛ a? Asoo Kelaese Gyisɛse, mɔɔ wule, na bɛdwazole ye bɛrale ngoane nu, na ɔde Nyamenle asa fema zo ɛlɛsɛlɛ Nyamenle amaa yɛ la ɔ?

³⁵Nwane a kɛhola kɛhwe yɛ kɛvi Kelaese ɛhulolɛ ne anwo a? Amaneɛnwunlɛ anzɛɛ anwongyelelɛ, kpɔdekpɔdeyɛlɛ anzɛɛ ɛhɔne, ehyia, anwubɛnyunlu anzɛɛ ewule?

³⁶ Nyamenle Edwɛkɛ ne se, “Bɛdabɛ bɛ ti yɛgyi ewule avinli alehyenlɛ muala; na bɛyɛ yɛ kɛ mboane mɔɔ bɛ nee bɛ ɛlɛkɔ ahunleɛ.”

³⁷Kyɛkyɛ, wɔ ninyɛne ɛhye mɔ kɔsɔɔti anu, yɛlua mɔɔ hulole yɛ la anwo zo yɛdi konim!

³⁸Ɔluakɛ meze ye wienyi kɛ debie biala ɛnrɛhola ɛnrɛkpɔkye yɛ ɛnrɛvi Kelaese ɛhulolɛ ne anwo; ewule o, ngoane o, Nyamenle soanvolɛma o, anzɛɛ awozinli nu tumivolɛma biala, wɔ ɛnɛ edwɛkɛ mɔɔ bazi anzɛɛ kenlebie ɛdeɛ mɔɔ bara la anu,

³⁹yɛɛ tumi anzɛɛ debie biala ɛnle ewiade ye anu, anwuma anzɛɛ azɛlɛ ti anu, anzɛɛ ewiade ye anu debie biala ɛnle ɛkɛ mɔɔ kɛhola kɛkpɔkye yɛ kɛvi Nyamenle ɛhulolɛ ne mɔɔ ɔlua yɛ Awulae Kelaese Gyisɛse anwo zo yɛnyia ye la anwo.