Read Nzema Wulo 9 Bible Online

Wulo 9 - Nzema bible

Wulo 9

¹Kelaese ati nɔhalɛ kpalɛ a melɛka meahile bɛ la, membɔ adalɛ. Me adwenle nu wienyi, Sunsum Nwuanzanwuanza ne ɔdaye ɔze kɛ membɔ adalɛ,

²yɛɛ ɔze nyane mɔɔ melɛdi wɔ me ahonle nu

³meamaa medame me mbusuafo Dwuuma la. Bɛ ti me kunlu a anrɛɛ Nyamenle ɛdua me kakɛ na yekpɔkye me yevi Kelaese anwo.

⁴ Bɛle Yizilayɛma mɔɔ le Nyamenle ɔdaye ye menli mɔɔ yeyɛ bɛ ɔ mra, yeye ye anyunlunyia yehile bɛ, ɔ nee bɛ ɛyɛ ngyekyeleɛ, na yeva ye mɛla yemaa bɛ a; bɛlɛ nɔhalɛ ɛzonlenlɛ kpalɛ ne; bɛnyia Nyamenle ɛwɔkɛ ne.

⁵Bɛ bo vi Hibulu abusua mgbole ne mɔ anu, yɛɛ Kelaese ne bayɛ sonla la, ɔvi bɛ nu. Ayɛlɛyelɛ ɛha Nyamenle mɔɔ di ɔ muala azo belemgbunli la dahuu. Amen.

⁶Na menga kɛ Nyamenle ɛwɔkɛ ne ɛkpo aze, ɔboalekɛ tɛ Yizilayɛma amuala a Nyamenle kpale nu yele bɛ kɛ bɛle ye menli a;

⁷ yɛɛ tɛ bɛmɛ mɔɔ bɛle Ebileham nlɔnra la amuala a le Nyamenle amra a. Nyamenle zele Ebileham kɛ, “Ɔlua Ayezeke anwo zo a ɛbanyia nlɔnra dɔɔnwo a.”

⁸Ɛhye kile kɛ tɛ ngakula mɔɔ bɛwo bɛ wɔ nwonane nu ngyehyɛlɛ zo la amuala a le Nyamenle amra a, na ngakula mɔɔ ɔlua Nyamenle ɛwɔkɛ ne ati bɛwole bɛ la a le bɛdabɛ mɔɔ bɛfa bɛ kɛ bɛle nlɔnra kpalɛ kpalɛ ne a.

⁹ Ɔluakɛ Nyamenle ɛwɔkɛ ne kɛ ɔbɔle ye la ɛne, “Saa mekɛ ne dwu a mebazia meara na Sɛla bawo ralɛ nrenya.”

¹⁰Tɛ ɔ muala noko ɛne. Ɔluakɛ Relebɛka amra mrenya nwiɔ ne bɛ ze a le yɛ nlenya Ayezeke.

¹¹ Na amaa bɛ nuhua ko ɛvɛlɛlɛ ɛdeɛ ne ali munli, kɛmɔ Nyamenle hyehyɛle la, Nyamenle zele Relebɛka kɛ, “Kpanyinli ne bazonle kakula ne.” Ɔhanle ɛhye kolaa na bɛawo bɛ, na bɛanwu kpalɛ anzɛɛ ɛtane; ɛhye kile kɛ Nyamenle ɛvɛlɛlɛ ne gyi ye ɛhulolɛdeɛ zo na tɛ nyɛleɛ biala mɔɔ bɛyɛle la ati ɔ.

¹³ Nyamenle Edwɛkɛ ne se, “Mengulole Gyekɔbo, na memkpɔle Yisɔ.”

¹⁴Ɛnee kɛ yɛka yɛse ɛ? Yɛha ye kɛ ɛhye ati, ɛnee Nyamenle le amile ɔ? Kyɛkyɛ, ɔnle zɔhane fee.

¹⁵ Ɔluakɛ ɔhanle ɔhilele Mosisi kɛ, “Mɔɔ mekulo kɛ mese ye anwunvɔne la yɛɛ mebaze ye anwunvɔne a, yɛɛ mɔɔ mekulo kɛ medi ɔ nwo nyane la, mebali ɔ nwo nyane.”

¹⁶Yemɔti, Nyamenle anwunvɔnezelɛ ne ɛngyi mɔɔ sonla kpondɛ la, anzɛɛ mɔɔ ɔkɛyele ɔ nwo kɛ ɔyɛ la azo.

¹⁷ Ɔluakɛ Nyamenle Edwɛkɛ ne zele Yigyibiti belemgbunli kɛ, “Menyɛle wɔ belemgbunli kɛ mefa wɔ meahile me tumi mɔɔ melɛ ye, na meamaa me duma adɛlɛ azɛlɛ ye azo amuala.”

¹⁸Yemɔti, Nyamenle ɔdaye ye ɛhulolɛdeɛ zo ɔse bie anwunvɔne yɛɛ ɔmaa bie noko yɛ anzosesebɛ.

¹⁹Bie babiza me kɛ, “Saa ɔle zɛhae a, ɛnee kɛ ɔyɛ mɔɔ Nyamenle tɛnwu nvonleɛ wɔ sonla nwo ɛ? Nwane yɛɛ kɛhola kɛzi Nyamenle ɛhulolɛdeɛ ne aze a?”

²⁰ Na ayi, ɛdawɔ bɔbɔ a le nwane na wɔayeye Nyamenle anloa azo? Buakɛ ɛngola ɛmbiza mɔɔ nwonle ye la kɛ, “Duzu ati a ɛnwonle me zɛhae ɛ?”

²¹Mɔɔ nwo buakɛ la lɛ adenle fa ndɛtɛlɛ ne yɛ debie biala mɔɔ ɔdaye ɔkulo la, ɔkola ɔfa ndɛtɛlɛ ɛdɔkɛ ko ne ala ɔnwo mbuakɛ nwiɔ, ɔfa ko ɔyɛ ye debie mɔɔ le kɛnlɛma na ɔhyia ye la, na ɔfa ko ne noko ɔyɛ debie mɔɔ ɛnle kɛnlɛma na ɔ nwo ɛngyia kpalɛ biala la.

²²Zɔhane ala yɛɛ Nyamenle ɛyɛ a. Ɔkpondɛ kɛ ye ɛya ne nee ye tumi ne da ali wienyi. Yemɔti ɔsi abotane kpole kpalɛ ɔnea bɛdabɛ mɔɔ ye ɛya ne wɔ bɛ nwo zo na ɔbazɛkye bɛ la.

²³Eza noko ɔkulo kɛ ye anyunlunyia ne da ɛkɛ, na ɔwola ɔgua yɛdayɛ mɔɔ ɔwɔ kɛ ɔnwu yɛ anwunvɔne, na yeziezie yɛ kɛ yɛnyia ye anyunlunyia ne la anwo zo.

²⁴Ɔluakɛ yɛmɛ yɛɛ yevɛlɛ yɛ yevi Dwuuma nee bɛdabɛ mɔɔ bɛnle Dwuuma la avinli a.

²⁵ Nyamenle Edwɛkɛ ne mɔɔ bɛhɛlɛ ye wɔ Hozia buluku ne anu la se: “Menli ne mɔɔ anrɛɛ ɛnle me menli la, mebavɛlɛ bɛ ‘Me menli’. Maanle ne mɔɔ meangulo ye la mebavɛlɛ ye ‘Me ɛhulolɛ maanle’.

²⁶ Na ɛleka mɔɔ bɛwɔ a bɛzele bɛ kɛ, ‘Bɛnle me menli’ la, ɛkɛ ne ko ne ala yɛɛ bɛbavɛlɛ bɛ tease Nyamenle ne amra a.”

²⁷ Ayezaya hanle ye wɔ Yizilayɛma anwo kɛ, “Saa Yizilayɛma zonle kɛ ɛnweazo anwea bɔbɔ a, ekyi bie yɛɛ bɛbalie bɛ ngoane a,

²⁸ɔluakɛ Awulae babu ɔdaye nee ewiade ye bɛ avinli mgbonda ne fenlefenle ndɛndɛ.”

²⁹ Ayezaya hanle dole ɛkɛ ne bieko kɛ, “Saa Tumivolɛ Awulae angyakyi menli wɔ yɛ nzi a, yɛbayɛ kɛ Sodɔm nee Gomɔla la.”

³⁰Ɛnee akee kɛ yɛha yɛze ɛ? Yɛka ɛhye, kɛ bɛdabɛ mɔɔ bɛnle Dwuuma, na bɛandwenle nwolɛ ɛlɛ kɛ bɛkɛzɔ Nyamenle anye la, ɛlua diedi zo ɛzɔ ɔ nye.

³¹Na Yizilayɛma mɔɔ ɛlɛkpondɛ mɛla mɔɔ kɛva bɛ kɛbikye Nyamenle la, annwu ye wɔ mɛla ne azolilɛ nu.

³²Duzu ati ɔ? Ɔboalekɛ mɔɔ bɛyɛle la ɛngyi diedi zo, bɛyɛle ye kɛ asɛɛ ɔgyi nyɛleɛ zo la. Ɛhye ati bɛdu koti.

³³Nyamenle Edwɛkɛ ne se, “Nea, melɛfa bolɛ meado Zayɔn mɔɔ bamaa menli akpulokpula a, ɔbayɛ bodane mɔɔ bamaa bɛadu bɛagua a. Na mɔɔ kɛlie ye kɛli la arɛle ɛnrɛbɔ.”