Read Nzema 1 Kɔl 10 Bible Online

1 Kɔl 10 - Nzema bible

1 Kɔl 10

¹ Mediema, mekpondɛ kɛ bɛkakye mɔɔ zile yɛ nlenya mɔ mɔɔ doale Mosisi la anwo zo la. Bɛ muala yɛɛ amungu ne wowale bɛ a, yɛɛ bɛ muala a bɛluale Nyevile Kɔkɔlɛ[3] ne anu bɛpɛle a.

²Bɛzɔnenle bɛ muala kɛ Mosisi ɛdoavolɛma wɔ amungu ne nee nyevile ne anu.

³ Bɛ muala bɛlile sunsum nu aleɛ ko ne ala bie,

⁴ bɛnlonle sunsum nu nzule ko ne ala. Ɔluakɛ bɛ muala bɛnlonle nzule ne mɔɔ vi sunsum nu bodane ne anu vindele zenle lile bɛ nzi la bie; bodane zɔhane a le Kelaese mumua ne.

⁵ Noko akee Nyamenle anye anlie bɛ muala bɛ nwo, yemɔti bɛ nuhua dɔɔnwo totɔle ɛsɛlɛ ne azo.

⁶ Ninyɛne ɛhye mɔ le kɔkɔbɔlɛ maa yɛ, na bɛbɔ yɛ kɔkɔ amaa yɛ ti akunlu amba ninyɛndane ɛyɛlɛ zo, kɛmɔ bɛ bie mɔ yɛle la,

⁷ anzɛɛ yɛanzonle awozonle, kɛmɔ bɛ bie mɔ yɛle la. Nyamenle Edwɛkɛ ne se, “Menli ne mɔ dɛnlanle aze lile na bɛnlonle na bɛdwazole bɛzile agole.”

⁸ Ɔnle kɛ yɛbɔ adwɔmane ɛbɛla biala kɛmɔ bɛ bie mɔ bɔle a bɛ nuhua apenle ngoko abulanwiɔ nee nsa dɔle kenle ko la.

⁹ Ɔnle kɛ yɛsɔ Awulae yɛnea, kɛmɔ bɛ bie mɔ yɛle a nwɔlɛ kekale bɛ hunle bɛ la.

¹⁰ Eza ɔnle kɛ yɛtendɛ yɛ nzo abo, kɛmɔ bɛ bie mɔ yɛle na Ewule soanvolɛ zɛkyele bɛ la.

¹¹Ninyɛne ɛhye mɔ sisile bɛ nwo zo, amaa yeayɛ kɔkɔbɔlɛ yeamaa awie mɔ, yɛɛ bɛhɛlɛle kɛ bɛfa bɛahilehile yɛ, ɔluakɛ ewiade ne awieleɛ mekɛ a yɛwɔ nu la.

¹²Zɔhane ati bɛmaa mɔɔ dwenle kɛ ɔgyi boɛ la ɛnlea boɛ na yeandɔ aze.

¹³Sɔnea biala mɔɔ ɛdo bɛ la le kɛ mɔɔ to awie biala la. Nyamenle le nɔhalɛ, bɛkola bɛfa bɛ rɛle bɛwula ye nu kɛ ɔnrɛmaa sɔnea mɔɔ bɛnrɛhola ɔ nloa gyinla la ɛnrɛdo bɛ ɛlɛ. Bɛ sɔnea mekɛ nu bɔbɔ, ɔbamaa bɛ anwosesebɛ yeamaa bɛagyinla ɔ nloa, na yeahile bɛ adenle yeamaa bɛavi nu.

¹⁴Ɛhye ati ayi mɔ, bɛhwe bɛ nwo bɛvi awozonle ɛzonlenlɛ nwo.

¹⁵Melɛtendɛ meahile bɛ kɛ bɛle nrɛlɛbɛvolɛma. Bɛdabɛ bɛdwenle mɔɔ melɛka la anwo.

¹⁶ Nyilalɛ dwora ne mɔɔ yɛyɛ Nyamenle mo wɔ nwolɛ la, Kelaese mogya ne a yɛkyɛ yɛno ye nu a, yɛɛ kpanwo ne mɔɔ yɛdie yɛdi la, Kelaese nwonane ne a yɛdi a.

¹⁷Kɛmɔ kpanwo ne mɔɔ yɛbubu la le ko la, saa yɛle dɔɔnwo bɔbɔ a yɛle sonlabaka ko, ɔluakɛ yɛ muala yɛkyɛ kpanwo ko ne ala.

¹⁸ Bɛnlea mɔɔ Yizilayɛma yɛ la. Bɛdabɛ mɔɔ bɛdi azubɔlɛ aleɛ ne la a le menli mɔɔ yɛ gyima wɔ azukponle ne anwo la.

¹⁹Duzu edwɛkɛ a mekpondɛ meaha a? Kɛ bozonle ɛzonlenlɛ anzɛɛ aleɛ mɔɔ bɛfa bɛmaa bozonle la amgba le debie ɔ?

²⁰ Menga ye zɔhane. Mɔɔ melɛka la a le kɛ ewiade amra fa ninyɛne bɔ azu maa mbɔnsam, bɛmbɔ bɛmmaa Nyamenle. Memkpondɛ kɛ bɛ nee mbɔnsam nyia debie yɛ.

²¹Ɔnle kɛ bɛno Awulae dwora ne anu na eza bɛanlo mbɔnsam dwora nu; yɛɛ ɔnle kɛ bɛtɛnla Awulae ɛkponle nwo na eza bɛahɔdɛnla mbɔnsam ɛkponle nwo.

²² Yɛkulo kɛ yɛka Nyamenle ɛya ɔ? Yɛdwenle kɛ yɛ nwo yɛ se tɛla ye ɔ?

²³ Bɛte kɛ bɛka kɛ, “Yɛlɛ adenle yɛyɛ debie biala.” Ɔle zɔhane, noko tɛ ninyɛne ne amuala a boa a. “Yɛlɛ adenle yɛyɛ debie biala,” noko tɛ ninyɛne ne amuala a maa ngɔzo a.

²⁴Awie biala mmadwenle ɔ ngome ye boɛyɛlɛ nwo. Bɛdwenle bɛ gɔnwo mɔ ɛdeɛ nwo.

²⁵Bɛli nane biala mɔɔ bɛtɔne ye wɔ gua nu la, bɛmmadwenle nwolɛ bɛbizebiza nwolɛ edwɛkɛ,

²⁶ ɔluakɛ Nyamenle Edwɛkɛ ne se, “Azɛlɛ ye nee zolɛ ninyɛne kɔsɔɔti le Nyamenle ɛdeɛ.”

²⁷Saa bɛdabɛ mɔɔ bɛnlɛ diedi la bie to ɛsalɛ fɛlɛ bɛ wɔ ye ɛkponledolɛ bo na bɛkɔ a, bɛli debie biala mɔɔ bɛkɛva bɛkɛzie bɛ nyunlu la, na bɛmmadwenle nwolɛ bɛbizebiza nwolɛ edwɛkɛ.

²⁸Na saa awie se bɛ kɛ, “Ɛhye le aleɛ mɔɔ bɛva bɛzɔ amonle anzɛɛ bɛdo bɛmaa bozonle” a, ɛnee ahenle ne adwenle mɔɔ kɛzɛkye la ati, bɛmmadi;

²⁹tɛ kɛ bɛmɛ bɛ adwenle nu kɛyɛ bɛ kesee la ati ɔ, na ahenle ne ɛdeɛ ne ati, bɛmmadi. Awie kɛbiza kɛ, “Duzu ati a awie yemɔ ye adwenle mɔɔ kɛzɛkye la ati me ti anwo ɛlilɛ kɛbɔ me ɛ?

³⁰Saa meyɛ Nyamenle mo wɔ mɔɔ medi la anwo a, ɛnee kɛmɔti a awie kɛdendɛ me wɔ aleɛ mɔɔ meyɛ Nyamenle mo wɔ nwolɛ la anwo a?”

³¹Bɛdie ɛ. Debie biala mɔɔ bɛyɛ la, saa aleɛ a bɛdi o, saa nzule a bɛno o, bɛyɛ bɛde Nyamenle anyunlu.

³²Bɛbɔ bɛ ɛbɛla ne mɔɔ bɛndenda Dwuuma anzɛɛ bɛdabɛ mɔɔ bɛnle Dwuuma la nee Nyamenle menli ne agyakɛ anu a.

³³Bɛyɛ ye kɛmɔ meyɛ ye ala la. Mendwenle me ngome me kpalɛyɛlɛ nwo; mebɔ mɔdenle kɛ menwɔyɛ mɔɔ le kpalɛ maa awie biala la, amaa bɛalie bɛ ngoane.