Read Nzema 1 Kɔl 11 Bible Online

1 Kɔl 11 - Nzema bible

1 Kɔl 11

¹ Ɛhye ati, bɛva me gyakɛ, kɛmɔ meva Kelaese agyakɛ la.

²Mekanvo bɛ, ɔluakɛ dahuu bɛkakye me na bɛdi me ngilehilelɛ zo.

³Noko mekpondɛ kɛ bɛte ɔ bo kɛ nrenya biala amenle a le Kelaese, raalɛ biala amenle a le ɔ hu, yɛɛ Kelaese amenle a le Nyamenle.

⁴Yemɔti nrenya biala mɔɔ ɛlɛyɛ nzɛlɛlɛ anzɛɛ ɛlɛka Nyamenle edwɛkɛ ne na ɔkɛheda ɔ ti zo la gua Kelaese anyunlu aze.

⁵Raalɛ biala noko mɔɔ ɛlɛyɛ nzɛlɛlɛ anzɛɛ ɛlɛka Nyamenle edwɛkɛ na yeangeda ɔ ti zo la gua ɔ hu anyunlu aze; ngakyile biala ɛnle ye nee raalɛ mɔɔ bɛkpa ɔ ti la avinli.

⁶Saa raalɛ ne ɛnrɛheda ɔ ti zo a, ɛnee ɔwɔ kɛ ɔpepɛ anzɛɛ ɔkpa ɔ ti enrinli ne. Na saa ɔyɛ ye zɔhane na ɔyɛ ye anyiemgba a, ɛnee noko ɔwɔ kɛ ɔkeda zo.

⁷ Ɔnle kɛ nrenya keda ɔ ti zo, ɔluakɛ nrenya da Nyamenle su ne nee ye anyunlunyia ne ali,

⁸ ɔluakɛ Nyamenle ambɔ nrenya anvi raalɛ nu. Ɔbɔle raalɛ ɔvile nrenya nu;

⁹yɛɛ tɛ raalɛ ti a bɛbɔle nrenya a. Nrenya ti a bɛbɔle raalɛ a.

¹⁰Zɔhane ati, ɔlua anwuma soanvolɛma ne mɔ ati, ɔwɔ kɛ raalɛ biala keda ɔ ti zo.

¹¹Noko akee, Awulae ati nrenya ɛngɔ ɛngyakyi raalɛ, yɛɛ raalɛ ɛngɔ ɛngyakyi nrenya.

¹²Ɔluakɛ kɛmɔ bɛbɔle raalɛ bɛvile nrenya nu la, zɔhane ala yɛɛ raalɛ wo nrenya a, yɛɛ ninyɛne kɔsɔɔti vi Nyamenle.

¹³Bɛdabɛ bɛbua: asoo ɔle kpalɛ kɛ raalɛ mɔɔ angeda ɔ ti zo la kɛzɛlɛ wɔ Nyamenle anyunlu?

¹⁴Aloa bɔle la enrinli ndendenle gua nrenya nyunlu aze,

¹⁵yɛɛ raalɛ fa ye ɛdeɛ ne bɔ abɔfo; ɔluakɛ bɛva enrinli ndendenle bɛmaa ye kɛ ɔva ɔheda ɔ ti zo.

¹⁶Saa awie kulo kɛ ɔsu ɛhye anwo kpolera a, mɔɔ melɛ ye meka la a le kɛ yɛmɛ anzɛɛ Nyamenle asɔnema ne mɔ, yɛnlɛ amaamuo fofolɛ bieko wɔ ɛzonlenlɛ nu kɛ ɛhye ala.

¹⁷Ɛhye mɔɔ melɛka la ɛnle bɛ ɛhanvolɛ, ɔluakɛ bɛ ɛzonlenlɛ nyianu ne mɔ ɛnwie kɛnlɛma yɛ.

¹⁸Mɔɔ lumua, mede kɛ bɛyia nu a ɛnee bɛ avinli ɛkpakyekpakye. Na ɔyɛ medame noko kɛ ɛhye foa ko bie le nɔhalɛ.

¹⁹(Kɛ ɔkɛyɛ biala la ɔwɔ kɛ mgbakyemgbakye ba bɛ nu, amaa bɛdabɛ mɔɔ bɛgyi pi la anwo ala ali kpalɛ.)

²⁰Saa bɛyia a, tɛ Awulae Aleɛ ne a bɛdi la,

²¹ɔluakɛ saa bɛlɛdi a, bɛ nuhua biala di ye aleɛ mɔɔ ɔ nee ye kɛhɔ la, amaa ɔlua zo, mɔɔ ɛhɔne ɛlɛku bie mɔ la ɛnee bie mɔɔ ɛbo.

²²Duzu ati ɔ? Bɛnlɛ bɛ azua nu mɔɔ bɛdi na bɛno ɔ? Anzɛɛ bɛmbu Nyamenle menli ne bie na bɛkulo kɛ bɛgua ehyianvolɛma mɔɔ wɔ bɛ avinli la anyunlu aze ɔ? Duzu edwɛkɛ a menga mengile bɛ wɔ ɛhye anwo a? Menganvo bɛ ɔ? Kyɛkyɛ! Meyɛ ye zɔhane a ɔnrɛyɛ boɛ!

²³Ngilehilelɛ ne mɔɔ menyianle ye menvile Awulae lɔ la a menvale memanle bɛ a, yemɔ a le kɛ, nɔe ne mɔɔ bɛyele Awulae Gyisɛse bɛmanle la, ɔvale kpanwo,

²⁴ɔyɛle Nyamenle mo, ɔbule nu, na ɔzele kɛ, “Ɛhye a le me nwonane ne mɔɔ bɛva bɛmaa bɛ la. Bɛyɛ ɛhye bɛva bɛhakye me.”

²⁵ Zɔhane ala yɛɛ mɔɔ bɛwiele aleɛ ne di la, ɔvale dwora ne, na ɔzele kɛ, “Dwora ɛhye a le Nyamenle Ngyekyeleɛ Fofolɛ ne mɔɔ bɛva me mogya ne bɛhye ɔ bo la. Kenle biala mɔɔ bɛlɛno nu la, bɛyɛ ye zɔhane bɛva bɛhakye me.”

²⁶Ɔluakɛ kenle biala mɔɔ bɛlɛdi kpanwo ɛhye, na bɛlɛno dwora ye anu la, bɛyɛ ye zɔhane bɛfa bɛbɔ Awulae ewule ne nolo kɔkpula mekɛ mɔɔ ɔkɛra bieko la.

²⁷Zɔhane ati awie biala mɔɔ kɛli Awulae kpanwo ne anzɛɛ kɛnlo ye dwora ne anu wɔ adenle mɔɔ ɛnfɛta la anu la kɛli Awulae nwonane ne nee ye mogya ne anwo fɔlɛ.

²⁸Yemɔti ɔwɔ kɛ awie biala dumua neɛnlea ye ahonle nu kpalɛ na yeali kpanwo ne, yeanlo dwora ne anu.

²⁹Ɔluakɛ saa awie ambu Awulae nwonane ne bie wɔ mekɛ mɔɔ ɔlɛdi kpanwo ne, na ɔlɛno dwora ne anu la a, ɔtwehwe ndeanlɛ ɔmaa ɔ nwo.

³⁰Ɛhye ati yɛɛ bɛ nuhua dɔɔnwo anwo ɛyɛ bɛ bɛtɛɛ, bɛ nwo ɛtoto bɛ, na bie mɔ ɛwu la.

³¹Na saa yɛdumua yɛneɛnlea yɛ ahonle nu kpalɛ a Nyamenle ɛnrɛdea yɛ.

³²Na Awulae tea yɛ, ɔtwe yɛ nzo amaa bɛanva yɛ bɛamboka ewiade amra anwo bɛambua yɛ ewule fɔlɛ.

³³Zɔhane ati, me mediema, saa bɛyia nuhua kɛ bɛdi Awulae aleɛ ne a, anrɛɛ bɛhendɛ bɛ nwo.

³⁴Saa ɛhɔne ɛlɛku bie a, ɔlumua ɔli debie wɔ sua nu, amaa bɛbayia nu a Nyamenle andea bɛ. Mɔɔ fane edwɛkɛ ne mɔ mɔɔ ɛha la anwo, meba a mebaha nwolɛ bie.