Read Nzema 1 Kɔl 13 Bible Online

1 Kɔl 13 - Nzema bible

1 Kɔl 13

¹Saa mekola menli nee anwuma soanvolɛma aneɛ ngakyile ne mɔ ka, na menlɛ ɛhulolɛ a, me ɛdendɛlɛ le kɛ ɛlawule anzɛɛ awa mɔɔ ɛlɛyɛ alɛra la.

² Saa melɛ ahyɛlɛdeɛ mɔɔ mefa metendɛ Nyamenle anloa azo, na saa mebe nwoma nu kpole, mete fealeranu edwɛkɛ muala abo, na melɛ diedi mɔɔ maa mekola metudu awoka, na menlɛ ɛhulolɛ a, menzɔho sonla.

³Saa mefa me nwo ninyɛne muala mekyɛ ehyianvolɛma na mefa me sonlabaka ye memaa kɛ bɛyela ye,[5] na menlɛ ɛhulolɛ a, nvasoɛ biala ɛnle zolɛ.

⁴Ɛhulolɛ lɛ abotane, ɔ ti akunlu le kɛnlɛma; ɛhulolɛ ɛnle anyebolo, ɔmbu ɔ nwo, yɛɛ ɔmmemaa ɔ nwo zo;

⁵ɛhulolɛ ɛnyɛ ninyɛne mgbane mgbane, yɛɛ ɔndendɛ ɛtane ɔntia awie; ɔnle angomedi, ɔnva ɛya yɛɛ ɔmbu ɛtane nwo mgbonda;

⁶ɛhulolɛ anye ɛnlie ninyɛndane nwo, ɔdi fɛlɛko wɔ mɔɔ le nɔhalɛ la anwo.

⁷Ɛhulolɛ ɛmkpo aze ɛlɛ; ɔlɛ diedi wɔ debie biala anu, ɔlɛ debie biala anwo anyelazo yɛɛ ye abotane bo ɛndu ɛlɛ.

⁸Ɛhulolɛ ɛmbɔ aze ɛlɛ. Nyamenle anloa azo ɛdendɛlɛ ɛdeɛ, ɔbakpa nwo. Ahyɛlɛdeɛ mɔɔ bɛfa bɛtendɛ aneɛ ngakyile ne mɔ la bazi aze, yɛɛ nwoma ɛnwunlɛ mgbole bapɛ nu aze.

⁹Ɔluakɛ yɛ nwoma mɔɔ yɛze nee yɛ Nyamenle anloa azo ɛdendɛlɛ le afoa afoa.

¹⁰Na saa nuhua ne mɔɔ di munli la ba a, ɔbaminliminli ninyɛne mɔɔ le afoa afoa la abo zo.

¹¹Mekɛ mɔɔ mele kakula la, mendendɛle kɛ kakula, mendwenlenle kɛ kakula, yɛɛ menzuzule edwɛkɛ nwo kɛ kakula. Kɛkala mɔɔ meyɛ kpanyinli la, megyakyi ngakula ninyɛne ne mɔ ɛyɛlɛ.

¹²Kɛkala, mɔɔ yɛnwu ye la le kɛ nvoninli monzomonzo bie wɔ neanleɛ nu, na kenle bie yɛ nye bayia zo. Kɛkala, mɔɔ meze la ɛnli munli, na kenle bie ɔbali munli, kɛmɔ Nyamenle si ze me la.

¹³Yemɔti, ninyɛne nsa ɛhye mɔ a wɔ ɛkɛ ne mɔɔ ɛmpɛ nu ɛnze yɛɛ ɛmkpa ɛlɛ a, bɛmɛ a le: diedi, anyelazo, yɛɛ ɛhulolɛ, na bɛ nuhua kpole kpalɛ mɔɔ sonle bolɛ la a le ɛhulolɛ.