Read Nzema 1 Kɔl 14 Bible Online

1 Kɔl 14 - Nzema bible

1 Kɔl 14

¹Bɛkpondɛ ɛhulolɛ bo zo na bɛmaa bɛ nye ɛbolo bɛkpondɛ sunsum nu ahyɛlɛdeɛ ne mɔ, titile, Nyamenle edwɛkɛ ne nolobɔlɛ.

²Awie mɔɔ ka aneɛ ngakyile la ɛndendɛ ɛngile menli; ɔtendɛ ɔkile Nyamenle, ɔluakɛ awie biala ɛnde mɔɔ ɔka la abo. Mɔɔ ɔyɛ la a le kɛ ɔdua Nyamenle Sunsum ne tumi zo ɔka fealeranu ninyɛne ne mɔ anwo edwɛkɛ.

³Na mɔɔ bɔ Nyamenle edwɛkɛ ne nolo la tendɛ kile menli, ɔboa bɛ, ɔmaa bɛ akɛnrazilɛ na ɔkyekye bɛ rɛle.

⁴Mɔɔ ka aneɛ ngakyile la boa ɔ ngomekye ɔ nwo na mɔɔ bɔ Nyamenle edwɛkɛ ne nolo la boa asɔnema amuala.

⁵Mekulo kɛ anrɛɛ bɛ muala bɛkɛha aneɛ ngakyile ne mɔ bie, noko me kunlu a anrɛɛ eza bɛ muala bɛkola bɛbɔ Nyamenle edwɛkɛ ne nolo kpalɛ. Ɔluakɛ sonla mɔɔ bɔ Nyamenle edwɛkɛ ne nolo la anwo hyia kpalɛ tɛla sonla mɔɔ ka aneɛ ngakyile la, kyesɛ awie wɔ ɛkɛ ne mɔɔ kola kile mɔɔ ɔka la abo a, amaa yeayɛ moalɛ yeamaa asɔnema amuala.

⁶Mediema, saa meba bɛ nwo lɔ na mebaka aneɛ ngakyile mekile bɛ a, duzu nvasoɛ a bɛkɛnyia ye bɛkɛvi me ɛkɛ ne a? Bɛnrɛnyia ɛhwee, kyesɛ melɛ yekile bie vi Nyamenle ɛkɛ anzɛɛ deɛnwunlɛ bie anzɛɛ nrɛlaleɛ bie vi Nyamenle lɔ, anzɛɛ ngilehilelɛ bie mebɛlɛ bɛ.

⁷Saa bɛlɛbɔ ninyɛne bɔbɔ mɔɔ ɛnlɛ ngoane wɔ bɛ nu, mɔɔ le kɛ fulutu anzɛɛ getaa la na ɛnelɛ ne mɔ ɛnvinde kpalɛ a, kɛ ɔkɛyɛ na bɛanwu edwɛne holɛ ko mɔɔ bɛlɛbɔ la ɛ?

⁸Saa bɛbɔ mangɛta na ɔ ne anvɛlɛ boɛ a, nwane a kɛboɔboa ɔ nwo kɛ ɔkɔ konle a?

⁹Zɔhane ala yɛɛ bɛdabɛ noko bɛ ɛdeɛ ne de a. Saa bɛ bie ka aneɛ ngakyile mɔɔ awie ɛnde ɔ bo la a, kɛ ɔkɛyɛ na awie anwu mɔɔ bɛha la ɛ? Ɔba ye zɛhae a ɛnee ɔle kɛ bɛlɛtendɛ bɛahile anwoma la.

¹⁰Aneɛ ngakyile dɔɔnwo wɔ ewiade ye anu, noko nuhua ko biala lɛ ndelebɛbo.

¹¹Na saa mende aneɛ ne a, ɛnee ahenle mɔɔ ɛlɛka la le me nye zo ɛyɛvolɛ, yɛɛ medame noko mele ɔ nye zo ɛyɛvolɛ.

¹²Zɔhane ala yɛɛ kɛmɔ bɛ nye ɛbolo kɛ bɛkɛnyia Nyamenle Sunsum nu ahyɛlɛdeɛ ne mɔ bɛkɛdɛla debie biala la, bɛbɔ mɔdenle na bɛnyia ahyɛlɛdeɛ ne mɔ mɔɔ boa maa asɔne ne kɔ ɔ nyunlu la.

¹³Zɔhane ati, awie mɔɔ ka aneɛ ngakyile la ɛzɛlɛ kɛ ɔkɛnyia ahyɛlɛdeɛ ne mɔɔ bɛfa bɛkile mɔɔ ɔka la abo la.

¹⁴Ɔluakɛ saa mesɛlɛ adenle zɛhae anu a, ɛnee me sunsum amgba ɛlɛsɛlɛ, noko me adwenle ɛnle nu.

¹⁵Ɛnee duzu a ɔwɔ kɛ meyɛ a? Mebava me sunsum meazɛlɛ, yɛɛ mebava me adwenle noko meazɛlɛ; mebava me sunsum meado ayɛlɛyelɛ edwɛne, yɛɛ mebava me adwenle noko meado ayɛlɛyelɛ edwɛne.

¹⁶Na saa bɛyɛ Nyamenle mo wɔ sunsum nu ala a, ɛnee kɛ ɔkɛyɛ na awie gyɛne mɔɔ wɔ nyianu ne anu la alie bɛ moyɛlɛ nzɛlɛlɛ ne azo “Amen” ɛ? Ɔngola ɔnyɛ ye zɔhane, ɔluakɛ ɔnde mɔɔ bɛlɛka la abo.

¹⁷Bɛ moyɛlɛ nzɛlɛlɛ ne le kpalɛ bɔbɔ ɛdeɛ, noko sonla zɔhane ɛnnyia moalɛ biala wɔ nwolɛ.

¹⁸Meyɛ Nyamenle mo kɛ meka aneɛ ngakyile metɛla bɛ nuhua biala a.

¹⁹Noko akee saa yɛyia nuhua kɛ yɛsonle a, menwɔhulo kɛ menwɔha edwɛkɛ agbɔkɛ nnu mɔɔ menli te ɔ bo la, amaa meava meahilehile awie mɔ, tɛla kɛ menwɔha edwɛkɛ agbɔkɛ apenle ngoko bulu wɔ aneɛ ngakyile nu mɔɔ awie ɛnrɛde ɔ bo la.

²⁰Mediema, bɛmmadwenle ngakula adwenle. Bɛyɛ bɛ nwo kɛ mbɔdɔma mɔɔ ɛnze ɛtaneyɛlɛ deɛ holɛ la, na bɛva mgbanyinli adwenle.

²¹ Bɛhɛlɛ ye wɔ Nyamenle Edwɛkɛ ne anu kɛ, “Awulae se, Mebalua menli bie mɔɔ ka aneɛ ngakyile nee nyɛvolɛ anloa ɛdendɛlɛ zo meadendɛ meahile menli ɛhye mɔ; noko bɛnrɛdie me edwɛkɛ bɔbɔ.”

²²Ɛhye ati, aneɛ ngakyile ɛhanlɛ ahyɛlɛdeɛ ne ɛnle sɛkɛlɛneɛ ɛmmaa diedima. Ɔle sɛkɛlɛneɛ ɔmaa bɛdabɛ mɔɔ bɛnlie bɛnli la, yɛɛ Nyamenle edwɛkɛ ne nolobɔlɛ ahyɛlɛdeɛ ne le sɛkɛlɛneɛ maa diedima. Ɔnle sɛkɛlɛneɛ ɔmmaa bɛdabɛ mɔɔ bɛnlie bɛnli la.

²³Yemɔti, saa asɔnema kɔsɔɔti yia nu na awie biala bɔ ɔ bo kɛ ɔka aneɛ ngakyile, na saa menli mɔɔ ɛnze Nyamenle anzɛɛ bɛnlie bɛnli la bie mɔ ba ayia ne abo a, asoo bɛnrɛha kɛ bɛ muala bɛbɔ ɛlane ɔ?

²⁴Na saa bɛ muala bɛbɔ Nyamenle edwɛkɛ ne nolo na awie mɔɔ ɛnlie ɛnli, anzɛɛ ɛnze Nyamenle la ba ayia ne bie a, edwɛkɛ mɔɔ ɔkɛde la kɛmaa ɔkɛnwu ye ɛtane, yɛɛ mɔɔ ɔbade la babua ye ndɛne

²⁵aye ɔ ti anu edwɛkɛ ahile ye, na yeamaa yeabɔ ɔ ti aze yeazonle Nyamenle, na yeaha yeado gua kɛ, “Amgba Nyamenle nee bɛ de!”

²⁶Me mediema, mɔɔ mekpondɛ meaha la a le kɛ, saa bɛyia nu kɛ bɛsɛlɛ a, mɔɔ lɛ edwɛne la ɛdo, mɔɔ lɛ ngilehilelɛ la ɛhilehile, mɔɔ Nyamenle ɛye debie ɛhile ye la ɛla ye ali, mɔɔ lɛ Nyamenle nrɛlaleɛ wɔ aneɛ ngakyile nu la ɛha, na mɔɔ lɛ ahyɛlɛdeɛ fa kile aneɛ ngakyile bo la ɛhile edwɛkɛ ne mɔɔ bɛha la abo. Bɛyɛ ɛhye mɔ amuala bɛva bɛboa asɔne ne anyunluhɔlɛ.

²⁷Mekɛ mɔɔ bɛkɛyia nu la saa awie mɔ baha aneɛ ngakyile a, bɛmaa menli nwiɔ anzɛɛ yebo zolɛ la, menli nsa ɛdendɛ. Bɛha ye ngoko ngoko, na sonla ko ɛhile mɔɔ bɛlɛka la abo.

²⁸Na saa awie ɛnle asɔne ne anu mɔɔ kɛhola kɛhile mɔɔ bɛlɛka la abo a ɛnee ahenle mɔɔ ka aneɛ ngakyile ne la ɛyɛ koonwu na ɔdendɛ ɔhile ɔ nwo nee Nyamenle.

²⁹Bɛmaa bɛdabɛ mɔɔ bɛlɛ Nyamenle nrɛlaleɛ la anu nwiɔ anzɛɛ nsa ɛdendɛ, na mɔɔ ɛha la ɛdie ɛvedevede mɔɔ bɛha la anu.

³⁰Saa awie mɔɔ wɔ ayia ne anu la kulo kɛ ɔda mɔɔ Nyamenle ɛye ɛhile ye la ali a, bɛmaa ahenle mɔɔ gyi gua nu ɛlɛtendɛ la ɛmua ɔ nloa.

³¹Ɔluakɛ bɛ muala bɛlɛ adenle bɛtendɛ bɛbɔ Nyamenle edwɛkɛ ne nolo ngoko ngoko, amaa bɛ muala bɛazukoa na bɛ nwo ayɛ se.

³²Mɔɔ ka Nyamenle nrɛlaleɛ la ɛzɔ ɔ nwo,

³³ɔluakɛ Nyamenle ɛnle basabasa Nyamenle. Ɔle anzonudwolɛ Nyamenle. Kɛmɔ bɛyɛ ye wɔ Nyamenle asɔnema ne mɔ amuala anu la,

³⁴mraalɛ ɛmua bɛ nloa wɔ asɔne nyianu ne mɔ anu. Bɛnlɛ adenle kɛ bɛkɛdendɛ, kɛmɔ Dwuuma mɛla ne se la, ɔwɔ kɛ bɛboa mrenya ne mɔ abo.

³⁵Saa edwɛkɛ bie a, bɛbiza bɛ hu mɔ wɔ sua nu, ɔluakɛ ɔyɛ anyiemgba bɔbɔ kɛ raalɛ kɛdendɛ asɔne sua nu a.

³⁶Na duzu ati ɔ? Bɛ nuhua yɛɛ Nyamenle edwɛkɛ ne vi rale ɔ? Anzɛɛ bɛ ngome yɛɛ Nyamenle edwɛkɛ ɛra bɛ ɛkɛ a?

³⁷Saa bɛ nuhua bie bu ɔ nwo kɛ ɔle Nyamenle kpɔmanvolɛ, anzɛɛ ɔlɛ sunsum nu ahyɛlɛdeɛ a ɛnee ɔlie ɔdo nu kɛ mɔɔ melɛkɛlɛ la vi Awulae ɛkɛ.

³⁸Na saa ɔnlie ɔndo nu a, bɛdabɛ noko bɛmmadie ye bɛto nu.[6]

³⁹Zɔhane ati, me mediema, bɛmaa bɛ nye ɛbolo kɛ bɛkɛbɔ Nyamenle edwɛkɛ ne nolo, yɛɛ bɛmmatua aneɛ ngakyile ɛhanlɛ.

⁴⁰Bɛlua ndenle kpalɛ nee ngɛnlɛma zo bɛyɛ debie biala pɛpɛ.