Read Nzema 1 Kɔl 16 Bible Online

1 Kɔl 16 - Nzema bible

1 Kɔl 16

¹ Mɔɔ fane ezukoa ne mɔɔ bɛwowɔ bɛahɔboa Nyamenle menli ne mɔ mɔɔ wɔ Dwudiya maanzinli nu la anwo la, bɛyɛ ye kɛ mɔɔ mengyehyɛle memanle asɔne ne mɔ mɔɔ wɔ Galeehyea maanzinli nu la.

²Molɛ biala, bɛ nuhua ko biala ɛde ezukoa mɔɔ yenyia ye dapɛne ne anu la bie ɛdo ahane, na bɛva bɛzie, amaa saa meba a yeangyia kɛ bɛkɛwowɔ ezukoa.

³Meba a mebahɛlɛ kɛlata meamaa bɛdabɛ bɛ menli mɔɔ bɛkɛdu bɛ la, na bɛava bɛ ahyɛlɛdeɛ ne bɛahɔ Gyɛlusalɛm.

⁴Na saa ɔhyia kɛ mekɔ bie noko a ɛnee bɛ nee me ahɔ.

⁵ Saa mevi Masidonea a mebara bɛ nwo ɛkɛ, ɔluakɛ mekakpɔsa Masidonea maanzinli ne anu.

⁶Wɔannea a mebali mekɛ ekyi anzɛɛ fɔsɛlɛ ne bɔbɔ wɔ bɛ nwo ɛkɛ, na akee bɛaboa me bɛamaa meazɔ me adendulɛ ne azo meahɔ ɛleka biala mɔɔ ɔwɔ kɛ mekɔ la.

⁷Mengulo kɛ menwu bɛ ala a ɛnee me gyakɛ gyi nu. Saa Awulae maa adenle a, me nye la kɛ me nee bɛ badɛnla ahyɛ ekyii.

⁸Mebadɛnla Ɛfɛsɛse ɛke kɔkpula Pɛntekɔso Ɛvoyia ne.

⁹Agbɔvolɛ zonle ɛke bɔbɔ ɛdeɛ, noko gyima bedevinli bie mɔɔ anwo hyia la anye ɛrala ɛkɛ ne ɛmaa me kɛ ɔwɔ kɛ medi.

¹⁰Saa Temɔte ba bɛ nwo lɔ a, bɛlie ye gyɛlɛɛnye bɛmaa ɔ nye ɛlie, ɔluakɛ ɔlɛyɛ Awulae gyima ne kɛmɔ melɛyɛ la.

¹¹Bɛmmamaa awie biala bu ye kɛ ɔle kakula na ye adwenle ɛtɛtinle, bɛboa ye bɛmaa ɔzɔ ye adendulɛ ne azo anzonudwolɛ nu, amaa yeanyia adenle yeazia yeara me nwo ɛke, ɔluakɛ me nye la ye nee mediema mɔɔ ɛha la ade.

¹²Akee mɔɔ fane adiema Apɔlɔso anwo la, mekɛ dɔɔnwo ne ala mezuzu mehile ye kɛ ɔ nee mediema ɛhendeɛ ne mɔ bɛrakpɔla bɛ, noko ɔngulo[8] kɛ ɔba kɛkala. Ɔnyia adenle a ɔbarakpɔla bɛ.

¹³Bɛyɛ bɛ nye gyɛlɛmgbɛɛnye, bɛgyinla kpundii wɔ diedi ne anu, bɛnyia akɛnrasesebɛ, bɛmaa bɛ nwo ɛyɛ se.

¹⁴Bɛva ɛhulolɛ bɛyɛ debie biala mɔɔ bɛyɛ la.

¹⁵Mediema, bɛze kɛ Setɛfanase nee ye sua nu amra a lumuale liele Kelaese lile wɔ Akaya (Giliki maanle nu) a, yɛɛ bɛdu bɛ nwo bɛmaa kɛ bɛkɛzonle Nyamenle menli ne.

¹⁶Me mediema, mebodo mesɛlɛ bɛ, bɛli menli mɔɔ le zɛhae, nee awie biala mɔɔ nee bɛ yɛ gyima nee bɛ sonle la ngilehilelɛ zo.

¹⁷Me nye ɛlie Setɛfanase nee Fɔtunatɛse nee Akeeyaekɛse ɛralɛ ne anwo, ɔluakɛ bɛlɛdi gyima mɔɔ saa bɛdabɛ a bɛwɔ ɛke a anrɛɛ bɛkɛli la;

¹⁸ɔluakɛ bɛmaa me nye ɛlie, kɛmɔ bɛ nye liele la. Menli mɔɔ le zɛhae la anwo hyia, anrɛɛ bɛnlea bɛ boɛ.

¹⁹Asɔnema mɔɔ wɔ Ehyea maanle ye anu la biza bɛ ahye. Mediema Akoyela nee Pelesela, nee asɔnema mɔɔ yia bɛ sua nu ɛkɛ ne la lɛ Awulae duma ne biza bɛ ahye kpalɛ kpalɛ.

²⁰Mediema mɔɔ wɔ ɛke la biza bɛ ahye. Bɛva mediema ɛhulolɛ bɛyɛ bɛ nwo atuu.

²¹Medame Pɔɔlo me sa anloa ɛne. Mebiza bɛ ahye.

²²Awie biala mɔɔ ɛngulo Awulae la, munzule ɛha ye. Yɛ Awulae, bɛla![9]

²³Awulae Gyisɛse ɛlolɛ ne nee bɛ ɛdɛnla.

²⁴Kelaese Gyisɛse ati me ɛhulolɛ nee bɛ muala ɛdɛnla.