Read Nzema 1 Kɔl 2 Bible Online

1 Kɔl 2 - Nzema bible

1 Kɔl 2

¹Me mediema, mekɛ mɔɔ membale bɛ nwo lɔ kɛ mebabɔ Nyamenle nɔhalɛ edwɛkɛ ne mɔɔ vea la nolo meahile bɛ la, meanga ye kɛ mele sonla mɔɔ me nloa ɛde na meze nrɛlɛbɛ kpole la.

²Ɔluakɛ membɔle me ti anu kpɔkɛ kɛ me rɛle kɛvi debie biala wɔ mekɛ mɔɔ me nee bɛ de la na ɔkɛha Gyisɛse Kelaese angome nee ye meanubaka ne azo ewule ne ala,

³Yemɔti menvale bɛtɛɛyɛlɛ, ɛzulolɛ nee anwowozolɛ kpalɛ a me nee bɛ dɛnlanle a;

⁴yɛɛ meanva sonla nrɛlɛbɛ nee anloanu kolokolo a mengilehilele bɛ, membɔle edwɛkɛ ne nolo a; menluale Nyamenle Sunsum ne tumi zo,

⁵amaa bɛ diedi ne agyinla Nyamenle tumi ne azo na yeangyinla sonla nrɛlɛbɛ zo.

⁶Ɔle nɔhalɛ kɛ yɛbɔ nrɛlɛbɛ nwo nolo yɛkile bɛdabɛ mɔɔ bɛnyi sunsum nu la. Tɛ ewiade ɛhye anu nrɛlɛbɛ ɛdeɛ ne anwo nolo ɔ, yɛɛ tɛ ewiade tumivolɛma mɔɔ bɛ tumililɛ ne ɛnrɛhyɛ na yeavi bɛ sa la nrɛlɛbɛ ɛdeɛ ne anwo nolo ɔ.

⁷Nrɛlɛbɛ ne mɔɔ yɛbɔ ye nolo la le Nyamenle nrɛlɛbɛ mɔɔ vea na menli ɛnze a. Nyamenle vale ziele yɛ ɛkɛ dɛba kolaa na yeabɔ ewiade ye kɛ ɔbava yeade yɛ nyunlu.

⁸Nrɛlɛbɛ ɛhye, bɛdabɛ mɔɔ bɛsie ewiade la annwu ye, ɔluakɛ saa bɛnwunle ye a, anrɛɛ bɛambɔ anyunlunyia Awulae ne meanubaka nu.

⁹ Nyamenle Edwɛkɛ ne se, “Debie mɔɔ sonla ɛtɛnwunle ye anzɛɛ ɛtɛtele ɛlɛ, debie mɔɔ sonla andwenle kɛ ɔkɛzi ɛlɛ la, yemɔ a le deɛ ne mɔɔ Nyamenle ɛziezie ɛdo ɛkɛ ne ɛmaa bɛdabɛ mɔɔ bɛkulo ye la a.”

¹⁰Yɛmɛ yɛɛ Nyamenle ɛlua ye Sunsum ne azo ɛye fealeranu debie zɛhae ɛhile yɛ a, ɔluakɛ Sunsum ne fedevede ninyɛne kɔsɔɔti anu, bɔbɔ kɛ Nyamenle ngyehyɛlɛ ne kuma ne kuloonwu si de la.

¹¹Awie biala ɛnze sonla adwenle kyesɛ ɔdaye mumua ne ye sunsum ne mɔɔ wɔ ye nu la. Zɔhane ala yɛɛ Nyamenle Sunsum ne angome ala a ze Nyamenle adwenle nu a.

¹²Tɛ ewiade ɛhye anu sunsum a yɛnyia ye a. Sunsum ne mɔɔ vi Nyamenle ɛkɛ ne la a yɛnyia ye a, amaa yɛanwu ninyɛne mɔɔ Nyamenle ɛva ɛlo yɛ la amuala.

¹³Zɔhane ati, mɔɔ yɛka la ɛnle edwɛkɛ mɔɔ sonla nrɛlɛbɛ a kilehile yɛ a. Nyamenle Sunsum ne kilehile yɛ wɔ mekɛ mɔɔ yɛkɛha kɛ yɛkilehile sunsum nu nɔhalɛ ne yɛahile bɛdabɛ mɔɔ Nyamenle Sunsum ne wɔ bɛ nu la.

¹⁴Sonla mɔɔ Nyamenle Sunsum ne ɛnle ye nu la ɛngola ɛnnyia Nyamenle Sunsum nu ahyɛlɛdeɛ ne mɔ. Sonla zɛhae ɛnde ninyɛne ɛhye mɔ abo; bɛle ɔ nye zo ɛzɛlɛ edwɛkɛ, ɔboalekɛ kyesɛ sunsum nu ala na bɛade ɔ bo.

¹⁵Sonla mɔɔ Nyamenle Sunsum ne wɔ ye nu la kola neɛnlea debie biala anu, na yemɔ awie biala ɛngola ɛnneɛnlea ye nu.

¹⁶ Nyamenle Edwɛkɛ ne se, “Nwane a ze Nyamenle ati anu a? Nwane a kola tu ye folɛ a?” Noko yɛmɛ, yɛlɛ Kelaese adwenle ne bie.