Read Nzema 1 Kɔl 3 Bible Online

1 Kɔl 3 - Nzema bible

1 Kɔl 3

¹Mediema, edwɛkɛ nɔhalɛ, meangola meandendɛ meangile bɛ kɛ menli mɔɔ ɛnyia Nyamenle Sunsum ne la; mendendɛle mengilele bɛ kɛ ewiade ɛhye anu amra, kɛ bɛle mbɛda wɔ Kelaese diedi ne anu.

² Menvale nyɛfonzule a menlile bɛ adane a, ɔboalekɛ ɛnee bɛtɛdwule mɔɔ bɛkposa aleɛ a; yɛɛ kɛkala bɔbɔ bɛtɛdwule,

³ɔluakɛ bɛtɛgua zolɛ bɛtɛbɔ bɛ ɛbɛla kɛ ewiade ɛhye anu amra la. Asoo mɔɔ nungule ɛhwenlɛ nee butulelilɛ ɛnzea bɛ adenle la, ɛnee ɛhye ɛngile kɛ bɛ nee ewiade ɛhye anu amra bɔ bɛ ɛbɛla ko?

⁴ Mekɛ mɔɔ bɛ nuhua ko ɛlɛka kɛ, “Mewɔ Pɔɔlo afoa,” na bie noko se, “Mewɔ Apɔlɔso afoa” la, ɛnee bɛmbɔ bɛ ɛbɛla kɛ ewiade amra la ɔ?

⁵Na Apɔlɔso bɔbɔ a le nwane? Pɔɔlo noko a le nwane? Yɛle Nyamenle sonvolɛma ala mɔɔ bɛluale yɛ nwo zo bɛliele Edwɛkpa ne bɛlile a. Yɛ nuhua ko biala yɛ ye gyima mɔɔ Awulae vale manle ye kɛ ɔyɛ la.

⁶ Menluale ma ne yɛɛ Apɔlɔso guguale zolɛ nzule, na Nyamenle a manle ɔnyinle a.

⁷Mɔɔ dua nee mɔɔ gugua zolɛ nzule la anwo ɛngyia dɔɔnwo. Nyamenle a anwo hyia a, ɔluakɛ yemɔ a ɔmaa baka ne nyi a.

⁸Ngakyile ɛnle mɔɔ dua nee mɔɔ gugua zolɛ nzule la avinli. Nyamenle badua ko biala kakɛ wɔ ye gyima mɔɔ yeyɛ la anwo kɛmɔ ɔfɛta la.

⁹Ɔluakɛ yɛ mu nwiɔ yɛle Nyamenle egyinli nu gyimayɛvoma yɛɛ bɛmɛ a bɛle egyinli ne a. Eza bɛle Nyamenle sua.

¹⁰Menvale ahyɛlɛdeɛ ne mɔɔ Nyamenle ɛva ɛlo me la mendole sua ne abo kɛ suasivolɛ kpalɛ, yɛɛ awie ɛlɛto zolɛ a. Na ɔwɔ kɛ awie biala nea kɛ ɔsi ɔto zolɛ la boɛ.

¹¹Sua bo ɛwulalɛ fofolɛ bieko ɛnle ɛkɛ, ɔluakɛ Nyamenle ɛva Gyisɛse Kelaese ɛyɛ sua ne adiabo ɛwie.

¹²Bie mɔ bava ezukoa nvutuke anzɛɛ dwɛtɛ fufule anzɛɛ ezukoa awolɛ mɔɔ sonle bolɛ la azɔ sua ne azo; bie mɔ noko bava ndaboa anzɛɛ ɛhonle anzɛɛ manra.

¹³Na kɛ awie biala gyima si de la bala ali wienyi wɔ Kenle ne mɔɔ Kelaese bara la. Kenle zɔhane senle ne bamaa awie biala gyima ala ali; senle ne bazɔ awie biala gyima mɔɔ yeyɛ la anlea na yeaye ye kɛ ɔde la yeahile.

¹⁴Na saa senle ne angola sua ne mɔɔ awie dole ye wɔ sua ne adiabo ne azo la yela a, mɔɔ zile la kɛnyia nwolɛ ahyɛlɛdeɛ.

¹⁵Na saa senle ne yela sua ne a, ɛnee ahenle mɔɔ zile la ɛminli debie, noko Nyamenle balie ɔdaye mumua ne ngoane kɛ sonla mɔɔ bɛlie ye bɛvi senle nu la.

¹⁶ Bɛnze kɛ bɛle Nyamenle Ɛzonlenlɛ Sua na Nyamenle Sunsum ne de bɛ nu ɔ?

¹⁷Saa awie sɛkye Nyamenle Ɛzonlenlɛ Sua ne a, Nyamenle bazɛkye ɔdaye noko, ɔluakɛ Nyamenle Ɛzonlenlɛ Sua ne anwo te, na sua zɔhane, yemɔ a le ɛdawɔ.

¹⁸Awie biala mmabɛlɛbɛla ɔ nwo. Saa bɛ nuhua bie dwenle kɛ ɔle ewiade ɛhye anu nrɛlɛbɛvolɛ a, ɛnee ɔyɛ ɔ nwo kɔnwɔne na yeanwu nrɛlɛbɛ kpalɛ.

¹⁹ Ɔluakɛ ewiade ye anu nrɛlɛbɛ le ɛzɛlɛ debie wɔ Nyamenle anyunlu. Nyamenle Edwɛkɛ ne se, “Nyamenle dua nrɛlɛbɛvolɛma agyibadolɛ zo kye bɛ;”

²⁰ yɛɛ Nyamenle Edwɛkɛ ne bieko ka kɛ, “Awulae ze kɛ nrɛlɛbɛvolɛma adwenle ɛvalɛ biala le mgbane.”

²¹Ɛhye ati ɔnle kɛ awie biala fa ye adwenle sɔ sonla. Ɔluakɛ debie biala le bɛ ɛdeɛ;

²²Pɔɔlo o, Apɔlɔso o, Sifase o, ewiade ye o, ngoane o, ewule o, ɛnɛ mekɛ ye o, kenlebie o, ɔ muala le bɛ ɛdeɛ,

²³yɛɛ bɛle Kelaese ɛdeɛ, yɛɛ Kelaese le Nyamenle ɛdeɛ.