Read Nzema 1 Kɔl 5 Bible Online

1 Kɔl 5 - Nzema bible

1 Kɔl 5

¹ Kɛkala menli ɛraha kɛ bɛlɛbɔ adwɔmane ɛbɛla bie mɔɔ bɛdabɛ mɔɔ bɛnzonle Nyamenle bɔbɔ la ɛnrɛbɔ a. Mede kɛ kpavolɛ bie ɛva ɔ ze aye.

²Ɛhye ɛnyɛ bɛ nyiane bɔbɔ? Bɛli nwolɛ nyane na bɛye sonla zɔhane mɔɔ ɛbɔ munzule ɛbɛla ɛhye la wɔ bɛ avinli.

³Saa menle bɛ nwo lɔ wɔ nwonane nu bɔbɔ a, me nee bɛ wɔ lɔ wɔ sunsum nu, na melua Awulae Gyisɛse duma nu mebua sonla zɔhane mɔɔ ɛbɔ munzule ɛbɛla ɛhye la ndɛne kɛ asɛɛ me nee bɛ a wɔ lɔ la.

⁴Saa me sunsum ne nee bɛ di ayia a, bɛlua Awulae Gyisɛse tumi ne mɔɔ boka yɛ nwo la azo

⁵bɛye sonla ɛhye bɛwula Seetan asa anu amaa ye nwonane ne azɛkye na ye ɛkɛla anyia ngoane wɔ Awulae Kenle ne.

⁶ Bɛ adubɛnwo ye ka bie! Bɛnze kɛ, “Fɛlɛ ko dɔ sonlɛ na ɔla fɛlɛ dɔɔnwo avinli a ɔsɛkye bɛ muala.”

⁷ Bɛye fɛlɛ ne mɔɔ ɛlɔ azonlɛ la wɔ bɛ avinli na bɛ nwo ade saanwu, amaa bɛayɛ menli fofolɛ mɔɔ evinli biala ɛnle bɛ nwo a, kɛmɔ meze ye wienyi kɛ amgba bɛde la. Ɔluakɛ kɛkala mɔɔ bɛhu Kelaese, yɛ Akpabɛnwo boaneralɛ ne bɛbɔ azu la,

⁸ bɛmmamaa yɛfa yɛ ɛtane nee yɛ amumuyɛ subane nvinli ne yɛdi Akpabɛnwo Ɛvoyia ne, na yɛva atiakunlu wienyi nee nɔhalɛlilɛ yɛli.

⁹Menganle ye wɔ me kɛlata ne anu kɛ bɛ nee menli mɔɔ bɔ ɛbɛla mgbane mgbane la mmatu.

¹⁰Meanga meammaa bɛdabɛ mɔɔ bɛnze Nyamenle na bɛbɔ ɛbɛla mgbane mgbane mɔɔ le kɛ anyebolo anzɛɛ awule na eza bɛsonle awozonle la; ɔluakɛ mɔɔ bɛkahola bɛade bɛ nwo bɛavi ewiade amra ɛhye mɔ anwo bɔkɔɔ la ɛnee kyesɛ bɛfi ewiade ye anu bɔkɔɔ.

¹¹Na mɔɔ mekpondɛ meaha la a le kɛ, bɛ nee awie biala mɔɔ fɛlɛ ɔ nwo Keleseɛnenli na ɔbɔ ɛbɛla mgbane mgbane, ɔle anyebolo, ɔsonle awozonle, ɔ nloa ɛdendɛlɛ ɛnyɛ fɛ, ɔle nzanli anzɛɛ ɔle awule la mmatu. Bɛ nee sonla zɛhae mmatɛnla ɛkponle nwo bɔbɔ di debie.

¹² Ɔnle me gyima kɛ menwɔbua bɛdabɛ mɔɔ bɛnle yɛ ekpunli ye anu la ndɛne. Nyamenle ɔdaye ɔbabua bɛ ndɛne. Na tɛ bɛmɛ mɔɔ bɛwɔ asɔne ne anu la a ɔwɔ kɛ bɛbua bɛ asɔnema ne mɔ ndɛne ɔ? Bɛye amumuyɛ sonla ɛhye bɛvi bɛ avinli.