Read Nzema 1 Kɔl 7 Bible Online

1 Kɔl 7 - Nzema bible

1 Kɔl 7

¹Akee mɔɔ fane edwɛkɛ ne mɔ mɔɔ bɛhɛlɛle me nwolɛ la, ɔle kpalɛ kɛ anrɛɛ nrenya ɛnrɛva ɔ sa ɛnrɛha raalɛ bɔbɔ.[1]

²Na sɔnea mɔɔ maa sonla bɔ adwɔmane ɛbɛla la zonle la ati, ɔhyia kɛ nrenya biala nyia ɔ ti anwo ɔ ye, na raalɛ biala nyia ɔ ti anwo ɔ hu.

³Wɔ nla nu, ɔwɔ kɛ nrenya biala yɛ mɔɔ fɛta kɛ kunli yɛ la maa ɔ ye, na yelɛ noko yɛ zɔhane ala maa ɔ hu. Ɔwɔ kɛ bɛ mu nwiɔ bɛsosɔ bɛ nwo.

⁴Yelɛ ɛnlɛ tumi wɔ ɔdaye ye nwonane ne azo, ɔ hu a lɛ nwolɛ tumi a; yɛɛ kunli ɛnlɛ tumi wɔ ɔdaye ye nwonane ne azo, ɔ ye a lɛ zolɛ tumi a.

⁵Bɛmmabɔ bɛ nwo abolɛ, kyesɛ bɛ mu nwiɔ bɛdumua bɛkponle zolɛ kɛ bɛyɛ ye zɔhane na bɛanyia alagye bɛazɛlɛ; nzinlii bɛzia bɛyia nu bieko, amaa yeamba ye kɛ bɛangola bɛ nwo sɔ la ati Seetan azɔ bɛ anlea.

⁶Menga ɛhye kɛ ɔle mɛla; ɔle adenle ɛhilelɛ ala.

⁷Me kunlu a anrɛɛ bɛ muala bɛle kɛ mɔɔ mede la; noko Nyamenle ɛmaa awie biala ɔ ti anwo ahyɛlɛdeɛ, asolo biala ɛdeɛ.

⁸Akee bɛdabɛ mɔɔ bɛngya bie nee bɛdabɛ mɔɔ bɛle ahunlanvolɛ la, meka meahile bɛ kɛ ɔle kpalɛ ɔmaa bɛ kɛ bɛ ngome bɛkɛhɔ zo bɛkɛdɛnla, kɛmɔ meyɛ ye la.

⁹Na saa bɛnea na bɛnrɛhola bɛ nwo sɔ a, ɛnee bɛgya bie; ɔle kpalɛ kɛ bɛkɛgya bie tɛla kɛ bɛ nwo kɛhyele bɛ na bɛnrɛhola bɛ nwo sɔ a.

¹⁰ Melɛ ɛhye, kɛ ɔle mɛla mɔɔ vi Awulae ɛkɛ memaa bɛdabɛ mɔɔ bɛle nwuvolɛ la kɛ yelɛ mmagyakyi ɔ hu;

¹¹yɛɛ saa ɔgyakyi ye a ɔmmakɔ agyalɛ fofolɛ; anzɛɛ ɔzia ɔ nee ɔ hu dɛba ne ɛhɔbɔ nu. Kunli biala noko mmabɔ ɔ ye ewole.

¹²Akee mɔɔ medame noko (tɛ Awulae o,) meka meahile bɛdabɛ mɔɔ bɛha la a le ɛhye: saa Kelaese ɛdoavolɛ nrenya bie aye ɛnle diedinli na yelɛ ne kponle zolɛ kɛ ɔ nee ye kɛdɛnla a, ɔmmabɔ ye ewole.

¹³Zɔhane ala yɛɛ saa Kelaese ɛdoavolɛ raalɛ bie ɔ hu ɛnle diedinli na kunli ne kponle zolɛ kɛ ɔ nee ye kɛdɛnla a, ɔmmabɔ ewole a.

¹⁴Ɔluakɛ diedinli yelɛ ne te kunli ne mɔɔ ɛnlɛ diedi la anwo maa ɔsɔ Nyamenle anye, yɛɛ diedinli nrenya ne te ɔ ye ne mɔɔ ɛnlɛ diedi la anwo maa ɔsɔ Nyamenle anye. Saa yeamba ye zɔhane a bɛ mra ne mɔ anwo ɛnrɛde, na ɔnle zɔ, bɛ nwo te.

¹⁵Na saa awie mɔɔ ɛnle diedinli la kulo kɛ ɔbɔ ewole a, bɛmaa ye adenle. Saa ɔba ye zɔhane a, Kelaese ɛdoavolɛ nrenya ne anzɛɛ raalɛ ne lɛ adenle kɛ ɔbɔ ewole ne. Ɔluakɛ Nyamenle ɛvɛlɛ bɛ kɛ bɛdɛnla anzonudwolɛ nu.

¹⁶Kelaese ɛdoavolɛ raalɛ, saa wɔmɔ a ɛbalie ɛ hu ngoane a, asoo ɛze? Kelaese ɛdoavolɛ nrenya, saa wɔmɔ a ɛbalie ɛ ye ngoane a, asoo ɛze?

¹⁷Awie biala ɛlua ahyɛlɛdeɛ mɔɔ Nyamenle ɛva ɛlo ye la azo ɛdɛnla kɛmɔ ɛnee ɔde mɔɔ Nyamenle vɛlɛle ye la. Ɛhye yɛɛ mehyehyɛ memaa asɔne ne mɔ amuala a.

¹⁸Saa Nyamenle fɛlɛ awie la ɛnee yeyɛ ye mrenyanu nzonlɛ a, ɔmmapele kɛ ɔminliminli nzonlɛ ne abo zo; saa ɔfɛlɛ ye la ɛnee bɛtɛyɛle ye mrenyanu nzonlɛ a, ɔmmayɛ.

¹⁹Ɔluakɛ bɛyɛ wɔ mrenyanu nzonlɛ o, bɛanyɛ o, ɔngyia. Debie mɔɔ hyia la a le Nyamenle mɛla ne mɔ azo ɛlilɛ.

²⁰Awie biala ɛdɛnla, kɛmɔ ɛnee ɔde mɔɔ Nyamenle vɛlɛle ye la.

²¹Nyamenle vɛlɛle wɔ la ɛnee ɛle akɛlɛ ɔ? Ɔnle debie, mmadwenle nwolɛ; noko saa adenle bie azo ɛkɛhola ɛkɛkpɔne ɛ nwo a, yɛ ye zɔhane.

²²Ɔluakɛ akɛlɛ mɔɔ Awulae ɛvɛlɛ ye la ɛyɛ dehelɛ wɔ Awulae anu; zɔhane ala yɛɛ mɔɔ le dehelɛ na bɛvɛlɛ ye la, le akɛlɛ maa Kelaese a.

²³Nyamenle dɔle bɛ bolɛ ɛsesebɛ; zɔhane ati bɛmmayɛ bɛ nwo ngɛkɛlɛ bɛmaa menli.

²⁴Mediema, bɛ nuhua ko biala nee Nyamenle ɛlua, kɛmɔ ɔde mɔɔ Nyamenle vɛlɛle ye la.

²⁵Mɔɔ le edwɛkɛ mɔɔ fane bɛdabɛ mɔɔ bɛngya bie la anwo la, menlɛ Awulae ɛkɛ ne mɛla biala memmaa bɛ, medame me adwenle a meka a, kɛ sonla mɔɔ Awulae ɛnwu ye anwunvɔne na menli kola die ye di la.

²⁶Saa menea kɛkala mekɛ ye anu anwongyelelɛ mɔɔ ɛra la a, ɛnee medwenle kɛ ɔle kpalɛ kɛ sonla biala kɛdɛnla, kɛmɔ ɔde ye ala la.

²⁷Ɛgya raalɛ ɔ? Ɛnee mmabɔ ye ewole. Ɛngya bie ɔ? Ɛnee mmadwenle bie ɛgyalɛ nwo.

²⁸Na saa ɛgya bie noko a, ɛnee ɛtɛyɛle ɛtane, yɛɛ saa raalɛ mɔɔ bɛtɛgyale ye la kɔ agyalɛ a, ɛnee ɔtɛyɛle ɛtane. Ewiade ye anu edwɛkɛ dɔɔnwo maa nwuvolɛ nwo kyele bɛ kpalɛ, na ɛhye yɛɛ mekulo kɛ ɔkpa bɛ ti a.

²⁹Mediema, mɔɔ mekpondɛ meaha la a le ɛhye: mekɛ ne ɛwie, na ɔvi ɛnɛ mɔɔ kɔ la, kunlima ɛdɛnla kɛ bɛngya mraalɛ;

³⁰bɛdabɛ mɔɔ bɛsu la ɛyɛ bɛ nwo kɛ bɛnli nyane; bɛdabɛ mɔɔ bɛ nye ɛlie la ɛyɛ bɛ nwo kɛ bɛnli fɛlɛko; bɛdabɛ mɔɔ bɛtɔ ninyɛne la ɛyɛ bɛ nwo kɛ mɔɔ bɛtɔ la ɛnle bɛ ɛdeɛ;

³¹na bɛdabɛ mɔɔ bɛli ewiade ninyɛne nzi la ɛyɛ kɛ asɛɛ bɛngyia ninyɛne ne mɔ anwo la. Ɔluakɛ ewiade ɛhye, kɛ ɔde ye kɛkala la, ɔnrɛhyɛ na yeapɛ nu.

³²Mekpondɛ kɛ bɛye adwenleadwenle muala bɛfi ɛkɛ. Nrenya mɔɔ ɛngya raalɛ la dwenle Awulae gyima ne anwo, ɔluakɛ ɔbɔ mɔdenle kɛ ɔkɛzɔ Awulae anye;

³³na nrenya mɔɔ gya raalɛ la dwenledwenle ewiade ninyɛne nwo, ɔluakɛ ɔkpondɛ kɛ ɔmaa ɔ ye anye die.

³⁴Zɔhane ati ye adwenle ne ɛhyɛ nwiɔ. Raalɛ mɔɔ bɛtɛgyale ye la dwenledwenle Awulae gyima ne anwo, ɔluakɛ ɔkpondɛ kɛ ɔtu ye sonlabaka ne nee ye ɛkɛla ne ɔmaa Nyamenle; na awuvolɛ raalɛ dwenledwenle ewiade ninyɛne nwo, ɔluakɛ ɔkpondɛ kɛ ɔmaa ɔ hu anye die.

³⁵Melɛka ɛhye wɔ bɛ kpalɛyɛlɛ ti. Mensisi bɛ nwo zo. Mekpondɛ kɛ bɛyɛ mɔɔ le kpalɛ na ɔfa adenle nu la, na bɛfa bɛ nwo amuala bɛsonle Awulae wɔ adenle biala anu.

³⁶Saa nrenya bie yia bɛlɛra bie na bɛ mu nwiɔ bɛyɛ bɛ adwenle kɛ bɛnrɛgya bɛ nwo, na nzinlii nrenya ne nwu kɛ debie mɔɔ ɔlɛyɛ bɛlɛra ne la ɛnle kpalɛ, na ɔdaye mumua ne ɔngola ɔ nwo sɔ na ɔnwu kɛ ɔwɔ kɛ bɛgya bɛ nwo a, bɛgya bɛ nwo, kɛmɔ bɛkpondɛ la. Ɔnle ɛtane.[2]

³⁷Na saa nrenya mɔɔ debie biala ɛnkyekye ye kɛ ɔwɔ kɛ ɔyɛ debie zɛhae, na yezi ye ahonle kɛ ɔnrɛgya raalɛ ne mɔɔ yeyia ye la, na ɔkola ɔsɔ ɔ nwo, na yeyɛ ye adwenle kɛ ɔkɛnlea raalɛ ne mɔɔ yeyia ye la a, ɔle kpalɛ kɛ ɔkɛyɛ ye zɔhane.

³⁸Yemɔti, mɔɔ gya raalɛ ne mɔɔ yeyia ye la, yɛ ye boɛ; noko mɔɔ ɛngya bie la yɛ ye boɛ kpalɛ.

³⁹Ɔnle kɛ raalɛ te ɔ nwo fi ɔ hu anwo wɔ mekɛ mɔɔ ɔ hu de ngoane nu la. Na saa ɔ hu wu a, ɔlɛ adenle kɛ ɔgya nrenya biala mɔɔ ɔkulo la, noko ɔwɔ kɛ nrenya ne yɛ Keleseɛnenli.

⁴⁰Saa raalɛ ne kɛdɛnla mɔɔ ɔngɔ agyalɛ a anrɛɛ mese ɔ nye balie. Kɛ me adwenle se me la ɛne, yɛɛ medie medi kɛ medame noko Nyamenle Sunsum ne wɔ me nu.