Read Nzema 2 Kɔl 11 Bible Online

2 Kɔl 11 - Nzema bible

2 Kɔl 11

¹Me kunlu a anrɛɛ saa mele kɔnwɔne bɔbɔ a, bɛkɛva me zɔ. Mebodo bɛ, bɛyɛ ye zɔhane.

²Metwe bɛ nwo nungule, kɛmɔ Nyamenle yɛ ye ala la. Bɛle kɛ bɛlɛra mɔɔ ɛnze nrenya mɔɔ meyia ye kɛ megya ye meamaa nrenya kokye, Kelaese mumua ne.

³ Noko mesulo kɛ, kɛmɔ ɛwɔlɛ ne vale adalɛ nrɛlɛbɛ bɛlɛbɛlale Yivi la, zɔhane ala yɛɛ bɛbazɛkye bɛ adwenle a, amaa bɛahwe bɛ nwo bɛavi Kelaese ɛzonlenlɛ kpalɛ ne mɔɔ di munli la anwo.

⁴Ɔluakɛ bɛ nye die awie biala mɔɔ ba bɛ nwo nehane na ɔbabɔ Gyisɛse fofolɛ bie, mɔɔ tɛ yemɔ a ɔle Gyisɛse ne mɔɔ yɛbɔle ye nolo yɛhilele bɛ la anwo edwɛkɛ la anwo. Eza bɛdie sunsum nee edwɛkpa bie mɔɔ asolo bɛ na tɛ Nyamenle Sunsum ne nee Kelaese anwo Edwɛkpa ne mɔɔ bɛnyianle ye bɛvile yɛ lɔ la bɛto nu.

⁵Menlie menli kɛ bɛ “ɛzoanvolɛma kpalɛ” ne mɔ tɛla me.

⁶Saa me nloa yɛɛ ɛtɛtele bɔbɔ a, tɛ nwoma nu ɔ; yɛɛ yɛla ɛhye ali wienyi yɛhile bɛ wɔ ndenle dɔɔnwo nee debie biala anu.

⁷Yemɔti kɛmɔ membɔle Nyamenle Edwɛkpa ne nolo mengilele bɛ mɔɔ meanlie bɛ ɛhwee, na menganle me nwo aze, amaa meamaa bɛ zo la, se ɛnee me ɛtane mɔɔ meyɛ la ɛne?

⁸Mekɛ mɔɔ meyɛ gyima ne wɔ bɛ avinli la, ɛnee asɔne ne bie mɔ a nea me a, yɛɛ saa meka ye kpalɛ a, ɛnee melɛwua asɔne ne mɔ, amaa meaboa bɛmɛ.

⁹ Mekɛ mɔɔ me nee bɛ de la, saa mekyia a mengyegye bɛ kɛ bɛboa me; mediema mɔɔ vi Masidonea rale la a rɛlɛle me debie biala mɔɔ mengyianle nwolɛ la a. Na kɛmɔ meanyɛ ye dɛba la, zɔhane ala yɛɛ menrɛva kpomgbolo biala menrɛkpolo bɛ kɔme a.

¹⁰Meka Kelaese anwo edwɛkɛ nɔhalɛ ne mɔɔ wɔ me nu la kɛ, me nwo ɛdulɛ ɛhye awie biala ɛnrɛhola ɛnrɛdua me wɔ ɛleka biala wɔ Akaya (Giliki) maanzinli ye anu!

¹¹Duzu ati a melɛka ɛhye a? Mengulo bɛ edwɛkɛ ɔ? Nyamenle ze kɛ mekulo bɛ.

¹²Mebahɔ zolɛ meayɛ mɔɔ melɛyɛ ye kɛkala la, amaa ɛzoanvolɛma zɔhane mɔ annyia kpɔkɛ angyinla zolɛ andu bɛ nwo kɛ bɛyɛ bɛ gyima, kɛmɔ yɛyɛ ye la.

¹³Menli zɔhane mɔ le ɛzoanvolɛma alane mɔɔ adalɛ gyima a bɛyɛ a; bɛhakyi bɛ nwo kɛ asɛɛ bɛle Kelaese ɛzoanvolɛma!

¹⁴Na ɔnyɛ nwanwane. Seetan bɔbɔ kola kakyi ɔ nwo yɛ kɛ ɔle wienyi nu soanvolɛ.

¹⁵Yemɔti ɔnyɛ ɛzulolɛ kɛ Seetan sonvolɛma kɛhakyi bɛ nwo kɛ bɛle Nyamenle sonvolɛma kpalɛ a. Bɛbanyia ninyɛne mɔɔ bɛyɛ la anwo ahatualɛ mɔɔ fɛta la wɔ awieleɛ ne.

¹⁶Mesi zolɛ bieko: bɛ nuhua biala mmadwenle kɛ mele kɔnwɔne; na saa bɛbu me zɔhane bɔbɔ a, ɛnee eza noko bɛlie me kɛ kɔnwɔne, amaa meanyia bie meadu me nwo ekyii.

¹⁷Mɔɔ melɛka ye kɛkala la ɛnle edwɛkɛ mɔɔ melua Awulae Tumi zo a melɛka a, ɔluakɛ melɛtendɛ adubɛnwo nu kɛ mele kɔnwɔne.

¹⁸Kɛmɔ dɔɔnwo ne ala fa ewiade ye anu ninyɛne tu bɛ nwo la, medame noko metu me nwo bie.

¹⁹Bɛmɛ bɛdabɛ, bɛ nrɛlɛbɛ somasoma ti, bɛ nye die kɔnwɔnema anwo.

²⁰Bɛ nye die awie biala mɔɔ yɛ bɛ kɛ ahanra, awie mɔɔ sisi bɛ, awie mɔɔ tu ɔ nloa anu na ɔkpakyekpakye bɛ nye zo la anwo.

²¹Ɔyɛ me nyiane kɛ melɛka kɛ yɛyɛle foanvoanle na yɛangola ɛhye mɔ bie yɛ a. Na saa awie kola fa debie tu ɔ nwo a ɛnee kɛmɔ melɛtendɛ kɛ kɔnwɔne la, medame noko mekola bie yɛ.

²²Saa bɛle Hibuluma a, medame mele Hibulunli. Saa bɛle Yizilayɛma a, medame mele Yizilayɛnli. Saa bɛle Ebileham nlɔnra a, medame mele Ebileham anlɔnra.

²³ Saa bɛle Kelaese sonvolɛma a, ɛnee ɔkɛyɛ kɛ mezɛ bɔbɔ ɛdeɛ, noko mele sonvolɛ kpalɛ metɛla bɛ. Meyɛ gyima ɛsesebɛ kpalɛ, mela efiade fane dɔɔnwo medɛla bɛ, bɛbila me empele fane kɛyɛ nyɛ, yɛɛ mekɛ dɔɔnwo ne ala, ɔhale me nee ewule.

²⁴ Dwuuma ɛbila me mbaka abulasa nee ngɔnla ne fane nnu.

²⁵ Wulomuma ɛbila me empele fane nsa; bɛzi me awolɛ ko, mebutu nyevile nu fane nsa, yɛɛ meminli nyevile nye ko dɔnehwele abulanwiɔ nee nna.

²⁶ Wɔ me adendulɛ dɔɔnwo ne mɔ anu, meyia esiane dɔɔnwo mɔɔ le kɛ azuyilɛ, ahɔdiawu, yɛɛ medame me gɔnwo mɔ Dwuuma, nee bɛdabɛ mɔɔ bɛnle Dwuuma la asa anu esiane; meyia azua mgbole zo esiane, esiane wɔ fienemgbole nu, yɛɛ meyia agɔnwolɛma adalɛ asa anu esiane.

²⁷Meli gyima nee mgbelera dɔɔnwo; aleɛ dwo a nafelɛ ɛngɔ me nye zo; ɛhɔne nee nzuhɔne ku me; mekye ɛhɔne, ɛyɛlɛ ku me yɛɛ melɛ me nwo zɔ ɛlɛ.

²⁸Yeanga ɛhye mɔ angome, asɔne asɔne ne mɔ anwo adwenleadwenle le adesoa kpole mɔɔ mezo ye dahuu a.

²⁹Saa awie yɛ bɛtɛɛ a, ɛnee medame me nwo ɛgolo me; yɛɛ saa bɛtwe awie bɛkɔ ɛtane nu a, ɛnee me kunlu yelɛyela me.

³⁰Saa ɔwɔ kɛ metu me nwo a, menwɔyɛ ye zɔhane wɔ ninyɛne mɔɔ kile kɛ mele bɛtɛɛ la anwo.

³¹Nyamenle mɔɔ le Awulae Gyisɛse ɔ Ze ne, yemɔ yɛɛ nyilalɛ ɛha ye duma ne dahuu a, ɔluakɛ ɔze kɛ membɔ adalɛ.

³² Mekɛ mɔɔ mewɔ Dɛmasekɛse la, Belemgbunli Alɛtase amɛnlado ne vale sinzavolɛma gyinlegyinlanle suakpole ne nlenkɛ mgbole ne mɔ anloa kɛ bɛhye me.

³³Na bɛdɛnlanle me kɛndɛne nu bɛwulale me suakpole ne bane ne tokule ne mɔ bie anu bɛdwulale me aze, na menvile ɔ sa.