Read Nzema 2 Kɔl 12 Bible Online

2 Kɔl 12 - Nzema bible

2 Kɔl 12

¹Ɔwɔ kɛ metu me nwo, saa nvasoɛ ɛnle zolɛ bɔbɔ a, ɔwɔ kɛ metu me nwo. Noko meka ninyɛne mɔɔ Awulae ɛlolɛ zo yemaa menwu bɛ nee mɔɔ yeye yehile me la.

²Meze Kelaese ɛdoavolɛ bie mɔɔ ɛvolɛ bulu nee nna mɔɔ ɛraze ɛhɔ la, bɛvale ye bɛhɔle anwuma wɔ Nyamenle anwo lɔ la; (saa nwonane nu o, saa sunsum nu o, menze, Nyamenle a ze a.)

³Mɔɔ meze la a le kɛ bɛvale nrenya ɛhye bɛhɔle Paladaese, (menze saa bɛvale ye nwonane nu o, saa sunsum nu o, Nyamenle a ze a)

⁴na ɛkɛ ne yɛɛ ɔdele edwɛkɛ mɔɔ bɛka a ɔnga, yɛɛ dasanli biala ɛnlɛ nwolɛ adenle kɛ ɔkɛha a.

⁵Sonla zɛhae ati yɛɛ metu me nwo a, na ɔhale medame me ngome a, anrɛɛ menrɛdu me nwo ɛlɛ, kyesɛ wɔ ninyɛne mɔɔ kile kɛ mele bɛtɛɛ la anwo.

⁶Saa mekulo kɛ metu me nwo a anrɛɛ menle kɔnwɔne wɔ nwolɛ, ɔluakɛ menwɔha nɔhalɛ ne. Noko menrɛdu me nwo, ɔboalekɛ memkpondɛ kɛ awie bu me bie maa ɔtɛla mɔɔ yenwu kɛ meyɛ nee mɔɔ yede kɛ meka la, anwo.

⁷Amaa me ti anu anyɛ me fɛ na meadu me nwo wɔ nwanwane ninyɛne dɔɔnwo ne mɔ mɔɔ Nyamenle ɛye ɛhile me la anwo la, bɛwulale debie me nwonane ye anu, Seetan soanvolɛ bie ɔ, ɔgyegye me na ɔbɛlɛ me aze, amaa meandu me nwo.

⁸Ɛhye ati menzɛlɛle Nyamenle fane nsa wɔ ɛhye anwo kɛ ɔye zɔhane ewule ne me nwo.

⁹Na ɔbuale me kɛ, “Me ɛlolɛ ne le kpalɛ maa wɔ, ɔluakɛ me tumi ne anu yɛ se maa wɔ kpalɛ kpalɛ wɔ mekɛ mɔɔ ɛkɛyɛ bɛtɛɛ la.” Yemɔti medi fɛlɛko kpole kpalɛ na metu me nwo wɔ me bɛtɛɛyɛlɛ nwo, amaa Kelaese tumi ne aheda me nwo zo.

¹⁰Kelaese ati, me kunlu dwo me nwo wɔ me bɛtɛɛyɛlɛ, aholoba ɛbɔlɛ, ngyegyelɛ, kpɔdekpɔdeyɛlɛ, yɛɛ munzule nu, ɔluakɛ mɔɔ menwɔyɛ bɛtɛɛ la ɛnee me nwo ɛyɛ se kpalɛ.

¹¹Se bɛnwu kɛ meyɛ kɔnwɔne, noko bɛdabɛ a bɛmaa meyɛ a. Bɛmɛ a bɛle menli mɔɔ anrɛɛ ɔwɔ kɛ bɛdie me bɛto nuhua a, ɔluakɛ saa mendo awie biala bɔbɔ a, bɛ “ɛzoanvolɛma zɔhane mɔ” ɛndɛla me wɔ adenle biala anu.

¹²Menvale abotane kpole a menyɛle ninyɛne mɔɔ kile kɛ mele ɛzoanvolɛ la wɔ bɛ nu a; bɛnwunle sɛkɛlɛneɛ nee nwanwane ninyɛne nee gyima mɔɔ kile Nyamenle tumi ne la amuala.

¹³Saa ɛye kɛ meangakyi kpomgbolo meamkpolo bɛ kɔme la ɛsie ahane a, ɛnee duzu debie kpalɛ a bɛyɛle bɛmanle asɔne ne mɔ mɔɔ ɛha, mɔɔ bɛanyɛ bɛammaa bɛmɛ a? Saa mevo bɛ wɔ ɛhye anu a, ɛnee bɛva bɛhyɛ me.

¹⁴Ye fane nsa mɔɔ meboɔboa me nwo kɛ mebakpɔla bɛ la ɛne; saa meba a menrɛrakpolo bɛ kɔme, ɔluakɛ bɛdabɛ mumua ne a mekpondɛ bɛ a, na tɛ mɔɔ bɛlɛ ye la ɔ. Tɛ mralɛ a kpondɛ sie awovolɛma a, awovolɛma a kpondɛ sie mralɛ a.

¹⁵Ɔkɛyɛ me kɛnlɛma kɛ menwɔva mɔɔ melɛ la amuala, nee medame me sonlabaka ne menwɔboa bɛ. Na saa mekulo bɛ edwɛkɛ kpole zɛhae a, ɛnee kɛmɔti yɛɛ bɛmɛ bɛngulo me edwɛkɛ fee ɛ?

¹⁶Bɛdabɛ bɛze kɛ meanyɛ kpomgbolo meamkpolo bɛ kɔme, noko bɛmɛ bɛse mele kɛdɛba, na menvale mɛlɛbɛla a mengyele bɛ a.

¹⁷Asoo menluale menli mɔɔ menzoanle bɛ la bie anwo zo mensisile bɛ?

¹⁸Menzɛlɛle Taetɛse, na menzoanle ye nee adiema nrenya ko wɔ bɛ nwo lɔ, na ɛnee Taetɛse a rasisile bɛ a? Asoo ɔ nee me yɛ adwenle anyɛ ko, yɛɛ yɛmbɔ yɛ ɛbɛla ko?

¹⁹Wɔannea a bɛkɛdwenle kɛ yɛbɔ mɔdenle yɛaza yɛ ne wɔ bɛ nyunlu. Ɔnle zɔhane fee! Yɛtendɛ, kɛmɔ Kelaese kulo kɛ yɛtendɛ wɔ Nyamenle anyunlu la. Ayi mɔ, debie biala mɔɔ yɛyɛ la, bɛdabɛ bɛ kpalɛ ti ɔ.

²⁰Mesulo ɔ nzi kɛ meba a menwɔrado bɛ wɔ adenle bie anu mɔɔ menrɛhulo a, anzɛɛ bɛdabɛ noko bɛkɛnwu me wɔ adenle bie anu mɔɔ bɛnrɛhulo a. Mesulo kɛ mebarado bɛ nee butulelilɛ, nungule ɛhwenlɛ, ɛya mgbole ɛvalɛ, angomedi, aholoba ɛbɔlɛ, nzekuebɔlɛ, mgbanyizonle ɛyɛlɛ, yɛɛ basabasayɛlɛ nu.

²¹Ɔyɛ me kɛ meba bieko a me Nyamenle ne baha me aze wɔ bɛ nyunlu, na meazu meagua bɛdabɛ mɔɔ bɛyɛle ɛtane na bɛtɛnunle bɛ nwo wɔ bɛ nyɛleɛ mgbane mgbane mɔɔ anwo ɛnde, nee adwɔmanebɔlɛ nwo la ati zo.