Read Nzema 2 Kɔl 13 Bible Online

2 Kɔl 13 - Nzema bible

2 Kɔl 13

¹ Ɛhye a tɔ zolɛ fane nsa mɔɔ melɛba mearakpɔla bɛ a. Nyamenle Edwɛkɛ ne se, “Ɔwɔ kɛ menli nwiɔ anzɛɛ nsa foa ɛzonle biala mɔɔ bɛkɛdo awie la azo di daselɛ.”

²Mekakye bɛdabɛ mɔɔ bɛyɛ ɛtane dɛba, nee bɛdabɛ mɔɔ bɛha la amuala kɛ, meha ye dɛba wɔ mekɛ mɔɔ membamkpɔlale bɛ mɔɔ tɔ zolɛ nwiɔ la, yɛɛ melɛka ye bieko kɛkala mɔɔ menle bɛ nwo lɔ la kɛ, saa meba a bɛ nuhua biala mɔɔ ɛyɛ ɛtane la ɛnrɛva ɔ nwo dwɔɔ.

³Bɛkɛnwu kɛ amgba Kelaese dua me nwo zo tendɛ. Ɔ nee bɛ bali ye ɛsesebɛ na bɛanwu kɛ ɔnle bɛtɛɛ na ɔlɛ tumi.

⁴Na saa ɔyɛle bɛtɛɛ ɔwule meanubaka ne azo bɔbɔ a, ɔlua Nyamenle tumi zo ɔde ngoane nu. Yɛdayɛ noko yɛle bɛtɛɛ wɔ Kelaese ati, na ɔlua Nyamenle tumi ne azo yɛ nee ye badɛnla na yɛ nee bɛ ali.

⁵Bɛnleɛnlea bɛ ahonle nu, na bɛnlea kɛ bɛtɛdɛ bɛ diedi ne anu. Bɛzɔ bɛ nwo bɛnlea; asoo bɛnnwu kɛ Kelaese Gyisɛse wɔ bɛ nu? Ɛnee kyesɛ bɛangola sɔnea ne anloa gyinla.

⁶Me nye la kɛ bɛkɛnwu kɛ yɛnle menli mɔɔ ɛkpo aze a.

⁷Yɛsɛlɛ Nyamenle kɛ bɛnrɛyɛ ɛtane, tɛ kɛ amaa bɛanwu kɛ yɛho yɛdɔ zolɛ ɔ, na amaa yɛmɛ, saa ɔzɔho kɛ yɛkpo aze bɔbɔ a, bɛmɛ bɛayɛ mɔɔ le fɔɔnwo la.

⁸Yɛngola yɛnyɛ debie biala yɛntia nɔhalɛ ne. Mɔɔ yɛkola ye yɛ la, yɛyɛ yɛboa nɔhalɛ ne.

⁹Yɛdi fɛlɛko kɛ bɛkɛyɛ se na yɛmɛ yɛkɛyɛ bɛtɛɛ. Yɛsɛlɛ kɛ bɛkɛli munli.

¹⁰Ɛhye ati yɛɛ kɛmɔ menle bɛ nwo lɔ la, melɛkɛlɛ bɛ kɛlata ɛhye a, amaa saa meba a me nee bɛ anli ye ɛsesebɛ, kɛmɔ tumi ne mɔɔ Awulae ɛva ɛmaa me la de la. Bɛ boɛyɛlɛ ti yɛɛ bɛvale tumi ne bɛmanle me a, na tɛ bɛ ɛzɛkyelɛ ti ɔ.

¹¹Mediema, akee mewie, mebiza bɛ ahye. Bɛhakyi bɛ subane; bɛli me folɛdulɛ ne mɔ azo, bɛmaa bɛ nloa ɛzɛ bɛ nwo na bɛdɛnla anzonudwolɛ nu. Na ɛhulolɛ nee anzonudwolɛ Nyamenle ne nee bɛ badɛnla.

¹²Bɛva mediema ɛhulolɛ bɛyɛ bɛ nwo atuu. Nyamenle menli ne kɔsɔɔti biza bɛ ahye.

¹³Awulae Gyisɛse Kelaese ɛlolɛ ne, Nyamenle ɛhulolɛ ne, nee Sunsum Nwuanzanwuanza agɔnwolɛyɛlɛ ne nee bɛ muala ɛdɛnla.