Read Nzema 2 Kɔl 3 Bible Online

2 Kɔl 3 - Nzema bible

2 Kɔl 3

¹Asoo mɔɔ meha la eza kile kɛ yɛlɛtu yɛ nloa anu? Anzɛɛ ɔhyia kɛ yɛfa nganvolɛ kɛlata yɛbakile bɛ, anzɛɛ yɛdie bie wɔ bɛ ɛkɛ ne, kɛmɔ bie mɔ yɛ la ɔ?

²Bɛmɛ a bɛle yɛ nganvolɛ kɛlata mɔɔ bɛhɛlɛ ye wɔ yɛ ahonle[1] ne mɔ anu mɔɔ awie biala nwu ye na ɔkenga a.

³ Ɔla ali wienyi kɛ Kelaese ɔdaye yɛɛ ɔhɛlɛle kɛlata ɛhye na ɔvale ɔzoanle yɛ a. Yeanva “ɛnke” a ɔhɛlɛle a, yɛɛ yeangɛlɛ ye wɔ bolɛ zo, ɔhɛlɛle ye wɔ menli ahonle zo.

⁴Yɛlɛka ɛhye, ɔluakɛ ɔlua Kelaese anwo zo yɛlɛ diedi wɔ Nyamenle anu.

⁵Yɛnlɛ debie biala wɔ yɛ nu mɔɔ maa yɛka kɛ yɛkola yɛyɛ gyima ɛhye a. Yɛ munlililɛ vi Nyamenle ɛkɛ;

⁶ yemɔ yɛɛ yeyɛ yɛ Ngyekyeleɛ Fofolɛ ne sonvolɛma a. Ngyekyeleɛ Fofolɛ ɛhye ɛnle mɛla mɔɔ bɛhɛlɛle a, ɔle Nyamenle Sunsum. Mɛla ne mɔɔ bɛhɛlɛle la fa ewule ba, na Nyamenle Sunsum ne maa ngoane mɔɔ ɛnlɛ awieleɛ.

⁷ Nyamenle anyunlunyia ne lale ali wɔ mekɛ mɔɔ ɔlɛ mɛla ne mɔɔ bɛhɛlɛle ye bolɛ zo la ɔlɛmaa Mosisi la. Na saa ɛnee Mosisi anyunlu ne mɔɔ dale la ɛlɛnu bɔbɔ a, mekɛ ne anu ɔdale kpole kpalɛ mɔɔ ɛnee Yizilayɛma ɛngola ɔ nyunlu nea a. Na saa mɛla ne mɔɔ zolɛ ɛlilɛ fa ewule ba la luale anyunlunyia zɛhae anu a rale a,

⁸ɛnee kɛ ɔkɛyɛ mɔɔ Nyamenle Sunsum ne ɛzonlenlɛ ɛnrɛnyia anyunlunyia kpole kpalɛ ɛnrɛdɛla ɛhye ɛ?

⁹Saa ɛzonlenlɛ mɔɔ maa bɛbu menli ewule fɔlɛ la yɛle anyunlunyia a, ɛnee Nyamenle Sunsum ne ɛzonlenlɛ mɔɔ maa bɛbu menli benle la le anyunlunyia kpole kpalɛ mɔɔ bo zolɛ a!

¹⁰Yɛkola yɛka kɛ kɛmɔ kɛkala anyunlunyia ne le kpole kpalɛ la ati, yeheda dɛba ne anyunlunyia ɛdeɛ ne azo.

¹¹Ɔluakɛ saa mɔɔ ɛngyɛ na yeanlu la lɛ anyunlunyia a, ɛnee mɔɔ wɔ ɛkɛ ne dahuu na ɔnnu ɛlɛ la anyunlunyia ɛdeɛ ne bo zolɛ.

¹²Kɛmɔ yɛlɛ anyelazo ɛhye la ati, yɛtendɛ a yɛnzulo.

¹³ Yɛnle kɛ Mosisi mɔɔ vale ɛdanlɛ hedale ɔ nyunlu amaa Yizilayɛma annwu kɛ ɔ nyunlu ɛdalɛ ne ɛlɛnu la.

¹⁴Bɛhedale bɛ adwenle zo amgba; ɔluakɛ ɛnɛ nee ɛnɛ ala, saa bɛlɛkenga Ngyekyeleɛ Dɛba ne a, ɔle kɛ asɛɛ ɛdanlɛ ko ne ala tɛkeda zolɛ, ɔboalekɛ ɔlua Kelaese angome anwo zo ala yɛɛ bɛkola bɛye ɛdanlɛ ne a.

¹⁵Ɛhɛe, ɛnɛ bɔbɔ, saa bɛka kɛ bɛkenga Mosisi mɛla ne mɔ a, ɛnee ɔle kɛ ɛdanlɛ ne tɛkeda bɛdabɛ mɔɔ bɛlɛtie la adwenle zo.

¹⁶ Na saa sonla twe bikye Awulae a, bɛkɛye ɛdanlɛ ne ɔ ti zo.

¹⁷Awulae ne a le Nyamenle Sunsum ne, yɛɛ ɛleka mɔɔ Awulae Sunsum ne wɔ la, fanwodi wɔ ɛkɛ.

¹⁸Bɛye yɛ muala yɛ nyunlu ndanlɛ ne mɔ a Awulae anyunlunyia ne bada alielie yɛ nyunlu. Anyunlunyia ɛhye mɔɔ vi Awulae, mɔɔ le Nyamenle Sunsum ne ɛkɛ la ɛlɛkakyihakyi yɛ yeamaa yɛayɛ ye sɔhovolɛ wɔ anyunlunyia mɔɔ bo zolɛ la anu.