Read Nzema 2 Kɔl 4 Bible Online

2 Kɔl 4 - Nzema bible

2 Kɔl 4

¹Nyamenle ɛlolɛ nu ala yɛɛ yeva gyima ɛhye yewula yɛ sa nu a, zɔhane ati yɛ rɛle ɛmbɔ.

²Yɛkpo awozinli nu nee anyiemgba nyɛleɛ muala; yɛmbɔ alane ɛbɛla, yɛɛ yɛmbɔ adalɛ wɔ Nyamenle edwɛkɛ ne ɛhanlɛ nu yɛngakyi ye. Yɛlua nɔhalɛ wienyi ne anu yɛbɔ yɛ ɛbɛla wɔ Nyamenle anyunlu kɛ awie biala kɛnyia yɛ nwo adwenle kpalɛ.

³Na saa edwɛkɛ ne mɔɔ yɛbɔ ye nolo la bɛheda zolɛ a, ɛnee bɛheda zolɛ bɛmaa bɛdabɛ mɔɔ bɛlɛminli la ala.

⁴Bɛnlie bɛnli, ɔluakɛ ɛtane ewiade ɛhye nyamenle ne ɛzi bɛ adwenle ne anye. Ɔmmaa bɛnnwu wienyi ne mɔɔ ɛlɛta fi Edwɛkpa ne mɔɔ fane Kelaese, mɔɔ le Nyamenle sɔhovolɛ kpalɛ ne anyunlunyia ne anwo la.

⁵Yɛmbɔ yɛdayɛ yɛ ngome yɛ nwo nolo; yɛbɔ Gyisɛse Kelaese anwo nolo kɛ ɔle Awulae, yɛɛ Gyisɛse ati yɛmɛ yɛle bɛmɛ bɛ sonvolɛma.

⁶ Nyamenle ne mɔɔ zele kɛ, “Wienyi vi awozinli nu ɛda” la a le Nyamenle ko ne ala mɔɔ manle ye wienyi ne dale yɛ ahonle nu la, amaa yɛanwu Nyamenle anyunlunyia ne mɔɔ ɛlɛta Kelaese anyunlu la.

⁷Noko yɛmɛ mɔɔ yɛlɛ Sunsum nu anwonyia ɛhye la yɛle kɛ mbuakɛ ala, amaa yeala ali kɛ tumi bedevinli ne le Nyamenle ɛdeɛ, na ɔnle yɛ ɛdeɛ.

⁸Ndenle dɔɔnwo anu bɛgyegye yɛ, na bɛngola bɛnzɛkye yɛ; bɛmaa yɛ adwenle nu yɛ kpomgbondee, noko yɛ agbɔkɛ nu ɛntuto;

⁹bɛyɛ yɛ kpɔdekpɔde, noko yɛtɛkyianle agɔnwolɛ nwo ɛlɛ; yɛɛ ɔdwu mekɛ ne bie bɔbɔ a bɛbobɔ yɛ, noko yɛtɛwule.

¹⁰Dahuu yɛte Gyisɛse ewule ne nyane wɔ yɛ sonlabaka ye anu, amaa menli anwu ye ngoane ne noko wɔ yɛ sonlabaka ye anu.

¹¹Yɛ ngoane mekɛ nu amuala ewule sianle yɛ wɔ Kelaese ati, amaa menli anwu ye ngoane ne wɔ yɛ sonlabaka ɛhye ala anu.

¹²Ɛhye kile kɛ ewule di gyima wɔ yɛ nu, noko ngoane di gyima wɔ bɛmɛ bɛ nu.

¹³ Kɛmɔ yɛ diedi ne le kɛ Nyamenle Edwɛkɛ ne mɔɔ se, “Mendendɛle, ɔluakɛ menliele menlile” la, yɛdayɛ noko yɛtendɛ, ɔboalekɛ yɛdie yɛdi.

¹⁴Yɛze kɛ Nyamenle mɔɔ dwazole Awulae Gyisɛse rale ngoane nu la badwazo yɛ aboka Gyisɛse anwo, na yeava yɛ nee bɛ yeahɔ ɔ nyunlu ɛkɛ.

¹⁵Ɛhye mɔ amuala lua bɛmɛ bɛ ti, amaa mɔɔ Nyamenle ɛlolɛ ne ɛlɛtɛlɛ ahɔ menli dɔɔnwo anwo zo la, bɛava moyɛlɛ bɛawula Nyamenle anyunlunyia.

¹⁶Ɔlua ɛhye ati yɛmkpo aze. Saa yɛ nwonane ɛlɛwie bɔbɔ a, Nyamenle kakyi yɛ sunsum nu nwonane ne alehyenlɛ biala.

¹⁷Nyane sikalɛ ekyi ɛhye mɔɔ yɛlɛnwu ye la bava anyunlunyia mɔɔ ɛnlɛ awieleɛ na ɔle kpole kpalɛ ɔtɛla nyane ɛhye la arɛlɛ yɛ.

¹⁸Ɛhye ati yɛ nye ɛnla ninyɛne mɔɔ ɛnyelɛ nwu bɛ la azo; yɛ nye la ninyɛne mɔɔ ɛnyelɛ ɛnnwu bɛ la azo. Ninyɛne mɔɔ ɛnyelɛ nwu bɛ la ɛngyɛ na apɛ nu aze, na mɔɔ ɛnyelɛ ɛnnwu bɛ la wɔ ɛkɛ ne dahuu.