Read Nzema Gal 2 Bible Online

Gal 2 - Nzema bible

Gal 2

¹ Ɛvolɛ bulu nee nna pɛle nu la me nee Banabase yɛhɔle Gyɛlusalɛm bieko. Menvale Taetɛse membokale yɛ nwo yɛhɔle.

²Mengɔle, ɔluakɛ ɛnee Nyamenle ɛye ɛhile me kɛ ɔwɔ kɛ mekɔ. Mengɔndwule la me nee mgbanyima ne mɔ yiale nu ahane na mengilehilele Edwɛkpa ne mɔɔ mebɔ ye nolo mekile bɛdabɛ mɔɔ bɛnle Dwuuma la anu mengilele bɛ, amaa gyima ɛhye mɔɔ melɛyɛ nee mɔɔ meyɛ ye dɛba la anyɛ gyɛne.

³Na Taetɛse bɔbɔ mɔɔ le Gilikinli na ɔ nee yɛ a hɔle la, bɛanga kɛ ɔyɛ ye mrenyanu nzonlɛ.

⁴Ɛnee adalɛma bie mɔɔ ɛyɛ bɛ nwo kɛ bɛdie Kelaese bɛdi la ɛpele ɛpe adenle bie azo ɛra ayia ne bie. Menli ɛhye mɔ rale kɛ bɛbanlea kɛ yɛmɛ mɔɔ yɛdie Kelaese Gyisɛse yɛdi la yɛ nwo ɛzi ɛdɔ yɛ la. Bɛ adwenle a le kɛ bɛmaa yɛazia yɛayɛ ahanra wɔ Dwuuma mɛla ne abo,

⁵na yɛammaa bɛ adenle fee, amaa yɛazie nɔhalɛ ne mɔɔ fane Edwɛkpa ne anwo, kɛmɔ kɛkala ɔde la gyɛlɛɛnye yɛamaa bɛ.

⁶ Mengilehilele Edwɛkpa ne mɔɔ mebɔ ye nolo la anu menwiele la, menli zɛhae mɔ, mɔɔ bɛse bɛle mgbanyima la anga kɛ debie bieko wɔ ɛkɛ mɔɔ ɔwɔ kɛ meyɛ a. Bɛle duzu menli bɔbɔ a, ɔnvane me nwo, ɔboalekɛ menli kɔsɔɔti sɛ wɔ Nyamenle anyunlu.

⁷Mɔɔ bɛnwunle ye la a le kɛ amgba Nyamenle ɛva ye Edwɛkpa ne ɛwula me nloa na yezoa me kɛ membɔ ye nolo mengile bɛdabɛ mɔɔ bɛnle Dwuuma la, kɛmɔ yeva yewula Pita anloa kɛ ɔbɔ ye nolo ɔhile Dwuuma la.

⁸Bɛnwunle ye wienyi kɛ Nyamenle ko ne ala mɔɔ manle Pita rayɛle ɛzoanvolɛ wɔ Dwuuma ati la, ye ko ne ala yɛɛ ɛyɛ me ye ɛzoanvolɛ ɛmaa bɛdabɛ mɔɔ bɛnle Dwuuma la a.

⁹Gyemise, Pita, yɛɛ Dwɔn mɔɔ diedima ne bu bɛ kɛ bɛle mgbanyima la liele dole nu kɛ, nɔhalɛ, mame a Nyamenle ɛva ɛlolɛ gyima ɛhye ɛwula me sa nu a. Yemɔti bɛzomanle me nee Banabase, bɛyɛle yɛ mo nee yɛ, bɛhilele kɛ bɛlie yɛ bɛdo nu. Akee yɛ muala yɛliele yɛdole nu kɛ yɛmɛ yɛhɔbɔ nolo ne wɔ bɛdabɛ mɔɔ bɛnle Dwuuma la anu na bɛdabɛ noko bɛhɔ Dwuuma anu.

¹⁰Mɔɔ bɛzele yɛ la a le kɛ anrɛɛ yɛhakye na yɛboa mediema mɔɔ le ehyianvolɛma la, na ɛhye a le debie titile mɔɔ me nye bolole nwolɛ kɛ meyɛ a.

¹¹Na mɔɔ Pita rale Anteɔko la, ɔmanle mendwile ɔ nyunlu, ɔluakɛ ɛnee mɔɔ ɔlɛyɛ la ɛnle kpalɛ.

¹²Alumua ne mɔɔ ɛnee menli bie mɔɔ Gyemise zoanle bɛ la ɛtɛbale la, ɛnee Pita nee mediema mɔɔ ɛnle Dwuuma la a di debie a. Na mɔɔ menli ne mɔ dwule ala la yɛɛ Pita hwenle ɔ nwo a, kɛ akee ɔ nee bɛ ɛnrɛdo ɛsalɛ bieko, ɔboalekɛ ɔsulo bɛdabɛ mɔɔ bɛ adwenle a le kɛ ɔwɔ kɛ bɛyɛ bɛ mrenyanu nzonlɛ la.

¹³Mediema Dwuuma mɔɔ ɔradole bɛ la, bɛdabɛ noko bɛyɛle bɛ nwo avoanvoanle kɛ Pita la, bɛmanle Banabase bɔbɔ ɔdaye ɔbɔle bɛ foanvoanle ɛbɛla ɛhye bie.

¹⁴Na menwunle kɛ bɛnlua nɔhalɛ adenle ne azo, kɛmɔ Edwɛkpa ne kile la, menzele Pita wɔ bɛ kɔsɔɔti bɛ nyunlu ɛkɛ ne kɛ, “Ɛle Dwuunli, noko wɔ ɛbɛla ne ɛngile kɛ ɛle Dwuunli. Na duzu ati a akee ɛkpondɛ kɛ bɛmɛ mɔɔ bɛnle Dwuuma la bɛkakyi bɛyɛ Dwuuma mgbemgbene nu ɛ?”

¹⁵Ɔle nɔhalɛ kɛ bɛwole yɛ Dwuuma, na yɛnle kɛ menli mɔɔ ɛnle Dwuuma mɔɔ ɛnze Nyamenle la.

¹⁶ Noko mɔɔ yɛnwu ye la a le kɛ, tɛ mɛla ne azo ɛlilɛ yɛɛ maa sonla sɔ Nyamenle anye a, kyesɛ yɛdie Gyisɛse Kelaese yɛdi kolaa na yɛazɔ Nyamenle anye. Yɛdayɛ bɔbɔ, yɛliele Kelaese Gyisɛse yɛlile kolaa na Nyamenle alua zolɛ yeamaa yɛazɔ ɔ nye, na tɛ mɛla ne mɔɔ yɛlile zolɛ la ati ɔ. Ɔluakɛ sonla biala mɔɔ di mɛla ne azo la ɛnrɛzɔ Nyamenle anye ɛlɛ.

¹⁷Saa yɛdayɛ mɔɔ yɛdie Kelaese Gyisɛse yɛali na yɛazɔ Nyamenle anye la eza yɛdi fɔlɛ a, se ɛnee Kelaese a twehwe yɛ kɔ ɛtane nu a? Egya ɛkpa ɛgua!

¹⁸Saa mekpo mɛla adenle ne na eza mesia me nzi kɛ akee medi mɛla ne azo a, ɛnee mehile kɛ medi fɔlɛ na medo mɛla ne.

¹⁹Mame, mɛla ne anyunlu a, mewu; mɛla ne a hunle me a, amaa meadɛnla ngoane nu meamaa Nyamenle.

²⁰Me nee Kelaese a bɛhunle yɛ wɔ meanubaka ne azo a, yemɔti saa mede ngoane nu a ɛnee tɛ medame ɔ, na Kelaese mɔɔ de me nu la ɔ. Ngoane ɛhye mɔɔ mede nu la, mede ye kɛ medie Nyamenle Ara ne mɔɔ hulole me na ɔdole ye ngoane aze ɔmanle me la medi la ati ɔ.

²¹Nyamenle ɛlo me kpole, yemɔti menrɛkpo ye amunli. Ɔluakɛ saa sonla di mɛla ne azo kolaa na yeazɔ Nyamenle anye a, ɛnee noko Kelaese wule ewule mgbane.