Read Nzema Gal 4 Bible Online

Gal 4 - Nzema bible

Gal 4

¹Na bɛmaa mengile ɛhye anu bieko; ɔle kɛ kakula mɔɔ ɛli agya la. Mekɛ mɔɔ ɔle kakula la, ɔde ye kɛ asɛɛ ɔle akɛlɛ la wɔ sua nu ɛkɛ, noko ɔdaye a ɔlɛ debie biala mɔɔ wɔ awuke ne anu la a.

²Ye ngakula nu, ɔlɛ sonla mɔɔ nea ye nee ye ninyɛne ne mɔ azo a, kɔkpula mekɛ mɔɔ ɔ ze ne mɔɔ ɔlile ye agya la hilele la.

³Zɔhane ala yɛɛ yɛdayɛ noko yɛde a; mɔɔ ɛnee yɛle ngakula wɔ sunsum nu la yɛyɛle ngakula yɛmanle ewiade ye anu tumi muala.

⁴Na mɔɔ mekɛ ne dwule la, Nyamenle zoanle ɔ Ra ne manle ɔrale ewiade. Raalɛ a nrenzɛle Ralɛ ɛhye a, na ɔwole ye ɔdole Dwuuma maamɛla ne anu,

⁵ kɛ ɔralie bɛdabɛ mɔɔ mɛla ne ɛlɛbu bɛ kɔme la, amaa bɛarayɛ Nyamenle amra.

⁶Kɛmɔ bɛle ɔ mra la, Nyamenle ɛzoa ɔ Ra ne Sunsum ne yemaa yerayi yɛ ahonle ne mɔ tɛkɛɛ, yemɔti yɛkola yɛka kɛ, “Egya! Me Papa!”

⁷Ɛhye kile kɛ bɛnle ngɛkɛlɛ bieko, na bɛle Selɛ ne amra. Na saa bɛle ɔ mra a, ɛnee bɛdi agya.

⁸Dɛba ne mɔɔ bɛnze Nyamenle la, ɛnee bɛle ngɛkɛlɛ bɛmaa ninyɛne mgbane mgbane mɔɔ ɔnle kɛ bɛsonle bɛ la.

⁹Kɛkala mɔɔ bɛnwu Nyamenle la anzɛɛ bɛmaa menga kɛ, kɛkala mɔɔ Nyamenle ɛkpondɛ bɛ bo zo la, duzu ati a eza bɛkulo kɛ bɛsia bɛkɔsonle sunsum ɛtane ɛtane, anwo anwunvɔne ɛhye mɔ bieko ɛ? Duzu ati a eza bɛkulo kɛ bɛsia bɛyɛ bɛ nwo ngɛkɛlɛ bɛmaa bɛ ɛ?

¹⁰Bɛsie kenle, siane, ɛlobɔ, yɛɛ ɛvolɛ mɔɔ ko biala ɛvoyia dwu a bɛdi na bɛkyi ɔ nloa a.

¹¹Ɔyɛ me kɛ bɛmaa mevɛ mgbane!

¹²Me mediema, mesɛlɛ bɛ, bɛva me gyakɛ, ɔluakɛ mele kɛ bɛdabɛ la. Bɛtɛyɛle me ɛtane biala.

¹³Bɛdabɛ bɛze kɛ me nwo mɔɔ dole me la ati a menyianle adenle membɔle Edwɛkpa ne nolo mengilele bɛ a.

¹⁴Noko mekɛ ne anu bɔbɔ mɔɔ ɛnee me anwondolɛ ne kpondɛ ayɛ dwɛwɔlɛ amaa bɛ la, bɛamkpo me. Bɛliele me kɛmɔ bɛkɛlie Nyamenle soanvolɛ anzɛɛ Kelaese Gyisɛse ɔdaye mumua ne la.

¹⁵Na kɛkala, bɛ atiakunlukɛnlɛma ne wɔ nienwu? Ɛnee medi daselɛ kɛ saa bɛyɛ na ɔkɛyɛ boɛ bɔbɔ a, anrɛɛ bɛdudule bɛ nye bɛmanle me.

¹⁶Na kɛ ɔyɛ mɔɔ kɛkala angome bɛmaa meyɛ bɛ kpɔvolɛ kɛ meha nɔhalɛ ne mehile bɛ la ɛ?

¹⁷Menli zɔhane mɔ yɛ kɛ asɛɛ bɛ nye die bɛ nwo, noko tɛ adenle kpalɛ zo a bɛ nee bɛ lua la! Mɔɔ menli zɔhane mɔ kpondɛ la a le kɛ bɛkɛhwe bɛ bɛkɛvi me nwo, amaa bɛdabɛ noko bɛ nye alie bɛmɛ bɛ nwo.

¹⁸Ɔle kpalɛ kɛ menli kɛnyia bɛ nwo ɛhulolɛ, noko bɛmaa ɔyɛ zɔhane wɔ adenle kpalɛ nu, na bɛyɛ ye zɔhane dahuu, bɔbɔ wɔ mekɛ mɔɔ me nee bɛ ɛnde la.

¹⁹O me mra ngakula, medi bɛ nwo nyane, na mete ye wɔ me nwonane nu kɛ raalɛ mɔɔ ɛvo awolɛ zo la, na ɔbahɔ zo zɔhane kɔkpula mekɛ mɔɔ bɛkɛnyia Kelaese su ne wɔ bɛ nu la.

²⁰Me kunlu a anrɛɛ me nee bɛ a wɔ lɔ a, na meanwu mɔɔ ɔwɔ kɛ meka la. Medwenle bɛ nwo somaa!

²¹Bɛmaa membiza bɛdabɛ mɔɔ bɛkulo kɛ bɛboa mɛla ne abo la kɛ, asoo bɛnde mɔɔ mɛla mumua ne se la?

²² Nyamenle Edwɛkɛ ne se Ebileham wole mralɛ mrenya nwiɔ. Ko ɔ nli le akɛlɛ yɛɛ ko ɔ nli le dehelɛ.

²³Ebileham nee ɔ ye akɛlɛ ne bɛ ra ne, bɛwole ye kɛ bɛwo ralɛ biala la, na ɔ nee dehelɛ ne bɛ ra ne, yemɔ bɛluale Nyamenle ɛwɔkɛ zo a bɛwole ye a.

²⁴Debie zɛhae ka yɛ edwɛkɛ mɔɔ ndelebɛbo wɔ nu a: mraalɛ nwiɔ ne gyi ɛkɛ maa ngyekyeleɛ nwiɔ. Raalɛ ne mɔɔ wole ɔ mra ɛdeɛ ne wɔ akɛlɛ ɛzonlenlɛ nu la a le Heega; ɔgyi ɛkɛ ɔmaa ngyekyeleɛ ne mɔɔ bɛyɛle ye wɔ Boka Saenae azo la.

²⁵Yemɔti Heega gyi ɛkɛ maa Boka Saenae mɔɔ wɔ Areleebea la, na yemɔ a le ɛnɛ mekɛ ye suakpole Gyɛlusalɛm. Ɔ nee menli mɔɔ wɔ zolɛ la amuala wɔ akɛlɛ ɛzonlenlɛ bo.

²⁶Na suakpole Gyɛlusalɛm kpalɛ ne mɔɔ wɔ anwuma la ɛnle akɛlɛ ɛzonlenlɛ bo. Yemɔ ɔle dehelɛ, na ɔle yɛ sua zo kpalɛ nee yɛ nli.

²⁷ Nyamenle Edwɛkɛ ne se, “Wɔmɔ raalɛ mɔɔ ɛtɛwole ɛlɛ a, wɔmɔ mɔɔ ɛtɛtele awolɛ nyane ɛlɛ a, di fɛlɛko, maa ɛ nye ɛlie, ɔluakɛ raalɛ ne mɔɔ bɛkpole ye la, lɛ mralɛ dɔɔnwo tɛla raalɛ ne mɔɔ lɛ agyalɛ mumua ne la.”

²⁸Mediema, ɛwɔkɛ ne mɔɔ Nyamenle bɔle Ebileham la ati, yɛle ɔdaye Nyamenle ɔ mra, kɛmɔ Ayezeke de la.

²⁹ Mekɛ ne anu ralɛ ne mɔɔ bɛwole ye kɛ bɛwo ralɛ biala la yɛle mɔɔ bɛluale Nyamenle Sunsum ne tumi zo bɛwole ye la kpɔdekpɔde. Zɔhane ala noko yɛɛ kɛkala ɔde a.

³⁰ Na Nyamenle Edwɛkɛ ne se duzu? Ɔse, “To akɛlɛ ne nee ɔ ra ne adenle zo, ɔluakɛ akɛlɛ ralɛ nee dehelɛ ralɛ ɛmbɔ nu ɛnli agya.”

³¹Yemɔti, mediema, bɛnwu ye kɛ yɛnle akɛlɛ ne amra na yɛle dehelɛ ne amra.