Read Nzema Gal 5 Bible Online

Gal 5 - Nzema bible

Gal 5

¹Yɛlɛ fanwodi; Kelaese ɛraye yɛ kɔme kpomgbolo. Yemɔti, bɛgyinla kpundii kɛ bɛdi bɛ ti anwo, na bɛmmamaa adenle bɛmaa bɛyɛ bɛ ngɛkɛlɛ bieko.

²Bɛdie! Medame Pɔɔlo yɛɛ melɛka meahile bɛ a. Saa bɛmaa adenle bɛmaa bɛyɛ bɛ mrenyanu nzonlɛ a, ɛnee bɛhile kɛ Kelaese anwo ɛnlɛ nvasoɛ ɛmmaa bɛ.

³Mekakye bɛ bieko, mɔɔ kɛmaa adenle kɛmaa bɛkɛyɛ ye mrenyanu nzonlɛ la ɛmaa adenle kɛ mɛla ne ɛkyekye ye, na ɔwɔ kɛ ɔdi mɛla ne amuala azo.

⁴Bɛdabɛ mɔɔ bɛdwenle kɛ bɛdi mɛla ne azo a bɛkɛzɔ Nyamenle anye la ɛhwe bɛ nwo ɛvi Kelaese anwo, na bɛnrɛnyia Nyamenle ɛlolɛ ne bie.

⁵Yɛmɛ, ɔlua Nyamenle Sunsum ne azo, kɛmɔ yɛdie Kelaese Gyisɛse yɛdi la ati, yɛ nye la kɛ Nyamenle ɔdaye ɔbamaa yɛazɔ ɔ nye.

⁶Ɔluakɛ saa yɛ nee Kelaese Gyisɛse yɛ ko a, yɛyɛ yɛ mrenyanu nzonlɛ o, yɛanyɛ o, ɔngyia. Mɔɔ hyia la a le kɛ yɛkɛnyia diedi mɔɔ fa ɛhulolɛ yɛ gyima la.

⁷Alumua ne ɛnee bɛlɛbɔ mɔdenle kpalɛ! Na nwane a ɛze bɛ kɛ bɛmmadie nɔhalɛ ne bɛdi a?

⁸Tɛ Nyamenle mɔɔ ɛvɛlɛ bɛ la a eza ɛze bɛ kɛ bɛyɛ ɛhye a.

⁹ Amgba, ɔle kɛ mɔɔ bɛka la, “Fɛlɛ ko dɔ sonlɛ na ɔla fɛlɛ dɔɔnwo avinli a, ɔsɛkye bɛ muala.”

¹⁰Melɛ diedi wɔ Awulae anu kɛ bɛnrɛnyia adwenle fofolɛ biala kɛ me ɛdeɛ ne ala. Na ahenle holɛ ko mɔɔ ɔdaye ɔse ɔkɛgyegye bɛ la, Nyamenle badua ye kakɛ!

¹¹Na mediema, asoo medame, saa mrenyanu nzonlɛyɛlɛ yɛɛ mebɔ nwolɛ nolo a anrɛɛ ɛnee duzu ati a bɛlɛyɛ me kpɔdekpɔde ɛ? Anrɛɛ Kelaese meanubaka ne mɔɔ mebɔ nwolɛ nolo la ɛnyɛ ngyegyelɛ biala ɛmmaa awie biala.

¹²Me kunlu a anrɛɛ menli mɔɔ ɛlɛgyegye bɛ la kɛhɔ zo zɛhae ala na bɛkɛza bɛ nwo bɔbɔ.

¹³Na bɛmɛ me mediema, Nyamenle ɛvɛlɛ bɛ, ɛye bɛ kɔme kpomgbolo. Yemɔti bɛmmadi bɛ atiakunluwɔzo nzi na bɛfa bɛ fanwodi ne bɛyɛ mɔɔ bɛdabɛ bɛkulo la. Bɛva ɛhulolɛ bɛzonle bɛ nwo ngoko.

¹⁴ Ɔluakɛ mɛla ne amuala, bɛbɔ ye kpɔkɛ ko bɛmaa yɛ kɛ, “Kulo ɛ gɔnwo kɛ ɛdawɔ mumua ne ɛ nwo.”

¹⁵Na saa bɛyɛ bɛ nwo kɛ ɛbɔ nu nane, bɛkeka bɛ nwo, na bɛyɛ bɛ nwo anwula a, ɛnee noko bɛnlea boɛ na bɛanguhu bɛ nwo.

¹⁶Mɔɔ meka meahile bɛ la a le kɛ, bɛmaa Nyamenle Sunsum ne ɛhilehile bɛ adenle na bɛmmadi bɛ nwonane ne atiakunluwɔzo nzi.

¹⁷ Ɔluakɛ sonla atiakunluwɔzo ne ko tia Nyamenle Sunsum ne, yɛɛ Nyamenle Sunsum ne ɛhulolɛdeɛ ne ko tia sonla atiakunluwɔzo ne. Bɛ mu nwiɔ bɛnga fee, amaa bɛdabɛ noko bɛanyɛ mɔɔ bɛkulo kɛ bɛyɛ la.

¹⁸Saa bɛmaa Nyamenle Sunsum ne kile bɛ adenle a, mɛla ne ɛngola ɛnkyekye bɛ bieko.

¹⁹Sonla su ne gyima mɔɔ di la da ali wienyi. Bɛmɛ a le adwɔmane, ɛbɛla mgbane mgbane mɔɔ anwo ɛnde la ɛbɔlɛ,

²⁰bozonle ɛzonlenlɛ nee ayɛne ɛbɛla. Ɛkpɔlɛ, konle, nungule, ɛya, angomedi, ngyehyɛnu nee ngilehilenu,

²¹anyebolo, kɔdiawuyɛlɛ,[2] nza ɛbolɛ, anyelielɛ mgbane mgbane nee ninyɛne mɔɔ le zɛhae mɔ la. Meha mehile bɛ dɛba, na eza mekakye bɛ bieko kɛ bɛdabɛ mɔɔ bɛyɛ ninyɛne ɛhye mɔ la ɛnrɛnwu Nyamenle Belemgbunlililɛ ne.

²²Nyamenle Sunsum ne ma a le ɛhye mɔ: ɛhulolɛ, anyelielɛ, anzonudwolɛ, abotane, atiakunlukɛnlɛmayɛlɛ, kpalɛyɛlɛ, nɔhalɛlilɛ,

²³mɛlɛbɛnwoaze, yɛɛ bɛ nwo zo ɛhomolɛ. Ɛhye mɔ, mɛla biala ɛnle ɛkɛ mɔɔ tia bɛ a.

²⁴Bɛmɛ mɔɔ bɛle Kelaese Gyisɛse ɛdeɛ la, ɛbɔ bɛ su dɛba ne nee bɛ nwonane ne atiakunluwɔzo mgbane mgbane ne mɔ amuala meanubaka nu.

²⁵Saa Nyamenle Sunsum ne ɛmaa yɛ ngoane a, ɛnee bɛmaa Sunsum ne ɛli yɛ nyunlu wɔ yɛ ɛbɛlabɔlɛ nu.

²⁶Ɔnle kɛ yɛmemaa yɛ nwo zo, yɛka yɛ gɔnwo mɔ ɛya, na yɛ nye bolo bɛ.