Read Nzema Ɛfɛ 2 Bible Online

Ɛfɛ 2 - Nzema bible

Ɛfɛ 2

¹ Dɛba ne, bɛ mɛladonlɛ nee bɛ ɛtane ne mɔ manle bɛwule sunsum nu.

²Mekɛ ne anu bɛlile ewiade ye ɛbɛla mgbane mgbane ne mɔ anzi; bɛdiele anwomanyunlu tumivolɛma mɔɔ kɛkala sie bɛdabɛ mɔɔ bɛnzonle Nyamenle la edwɛkɛ.

³Nɔhalɛ, ɛnee yɛdayɛ noko yɛle kɛ bɛdabɛ ala la; yɛbɔle ɛbɛla mɔɔ yɛdayɛ yɛkulo la, yɛyɛle mɔɔ yɛ nwonane ne atiakunluwɔzo nee yɛ adwenle zele yɛ la, na ɔlua zo yɛhanle Nyamenle ɛya kɛ awie biala la.

⁴Noko Nyamenle anwunvɔnezelɛ ne zonle, yɛɛ ye ɛhulolɛ mɔɔ wɔ yɛ nwo zo la le kpole bo zolɛ,

⁵yemɔti mekɛ mɔɔ ɛnee yɛwu sunsum nu wɔ yɛ mɛladonlɛ ti la, ɔvale yɛ nee Kelaese ɔrale ngoane nu. Ɔlua Nyamenle ɛlolɛ ti yɛɛ bɛlie bɛ ngoane a.

⁶Yɛ nee Kelaese Gyisɛse ɛyɛ ko la ati, Nyamenle ɛdwazo yɛ nee Kelaese kɛ yɛ nee ye ɛhɔli belemgbunli wɔ anwuma.

⁷Ɔyɛle ɛhye amuala ɔhilele ye ɛlolɛ totohyia ne mɔɔ bɛngola bɛnzuzu la nee atiakunlukɛnlɛma mɔɔ ɔlua Kelaese Gyisɛse ati dahuu ɔlɛ ye wɔ yɛ nwo la.

⁸Ɔluakɛ Nyamenle ɛlolɛ zo yɛɛ bɛ diedi ti yelie bɛ ngoane a.

⁹Tɛ bɛ nyɛleɛ nwo ɔ. Ɔle Nyamenle ahyɛlɛdeɛ ala, amaa awie biala andu ɔ nwo wɔ nwolɛ.

¹⁰Yɛle Nyamenle asa anloa gyima, yɛɛ yelua yɛ nee Kelaese Gyisɛse yɛ koyɛlɛ ne azo yebɔ yɛ yemaa ɛbɛla kpalɛ ne mɔɔ ɔhyehyɛle ɔdole yɛ ɛkɛ ne dɛba kɛ yɛbɔ la.

¹¹Bɛmɛ mɔɔ bɛnle Dwuuma la, bɛhakye kɛ dɛba ne ɛnee Dwuuma fɛlɛ bɛ kɛ bɛle menli mɔɔ ɛnze Nyamenle a. Ɔluakɛ Dwuuma yɛ bɛ mrenyanu nzonlɛ na bɛmɛ mɔɔ bɛnle Dwuuma la bɛnyɛ bɛ mrenyanu nzonlɛ.

¹²Bɛhakye kɛ mekɛ ne anu ɛnee bɛ nee Kelaese avinli twe, ɛnee bɛle nyɛvolɛ mɔɔ bɛmboka Yizilayɛ maanlema ne anwo a, ɛnee bɛnze ngyekyeleɛ ne mɔ mɔɔ ɔlua zo a Nyamenle bɔle ye menli ne ɛwɔkɛ la anwo bie. Bɛdɛnlanle ewiade ye anu kɛ menli mɔɔ ɛnlɛ anyelazo na bɛnze Nyamenle la.

¹³Kɛkala, bɛ nee Kelaese Gyisɛse ɛyɛ ko, amaa ɔlua zo bɛmɛ mɔɔ anrɛɛ bɛwɔ moa moa la, bɛlua Kelaese mogya ne mɔɔ ɔhwinle ɔguale la azo bɛhwe bɛ bɛbikye Nyamenle.

¹⁴Kelaese a le yɛ anzonudwolɛmaavolɛ a. Ɔluakɛ yeva Dwuuma nee bɛdabɛ mɔɔ bɛnle Dwuuma la yebɔ nu yeyɛ bɛ menli ko, na yegologolo bane ne mɔɔ gya bɛ ɛweɛne mɔɔ maa bɛyɛ bɛ nwo agbɔvolɛ la yegua.

¹⁵ Ɔluale ye sonlabaka ne azo ɔpɛle Dwuuma mɛla ne nee nwolɛ ngyehyɛlɛ ne mɔ anu na ɔlua Kelaese ati ɔmanle menli ekpunli nwiɔ ɛhye yɛle menli fofolɛ ko na yɛnyianle anzonudwolɛ.

¹⁶ Kelaese luale ye ewule mɔɔ ɔwule meanubaka ne azo la yele ɛkpɔlɛ wɔ bɛ avinli na ɔhanle Dwuuma nee bɛdabɛ mɔɔ bɛnle Dwuuma la ɔbɔle nu ɔmanle Nyamenle.

¹⁷ Yemɔti Kelaese rabɔle anzonudwolɛ nwo Edwɛkpa nolo ne hilele menli kɔsɔɔti; ɔbɔle ɔhilele bɛmɛ mɔɔ bɛnle Dwuuma, mɔɔ bɛwɔ moa moa la yɛɛ Dwuuma mɔɔ bikye ye la.

¹⁸Ɔlua Gyisɛse anwo zo yɛɛ yɛ muala, Dwuuma nee bɛdabɛ mɔɔ bɛnle Dwuuma la yɛkola yɛdua Sunsum ko ne ala azo yɛkɔ Selɛ ne anyunlu a.

¹⁹Yemɔti, bɛmɛ mɔɔ bɛnle Dwuuma la bɛnle nyɛvolɛ anzɛɛ maanle zo amra bieko; kɛkala bɛle mandimase wɔ Nyamenle menli ne avinli na bɛbɔ Nyamenle abusua eku ne bie.

²⁰Bɛdabɛ noko a bɛle sua mɔɔ bɛlɛsi ye wɔ ɛzoanvolɛma nee Nyamenle kpɔmanvolɛma adiabo ne mɔɔ bɛwula la azo a, na Kelaese ɔdaye mumua ne a ɔle sua ne mgbɛnezo sika ne mɔɔ hyia kpole kpalɛ la a.

²¹Kelaese a sɔ sua mumua ne maa ɔgyinla ɔyɛ ɛzonlenlɛ sua nwuanzanwuanza ɔmaa Awulae a.

²²Kɛmɔ bɛ nee Kelaese ɛyɛ ko la, bɛdabɛ noko bɛlua Nyamenle Sunsum ne azo bɛlɛsi bɛ nee menli kɔsɔɔti kɛ sua la na Nyamenle adɛnla nu.