Read Nzema Ɛfɛ 3 Bible Online

Ɛfɛ 3 - Nzema bible

Ɛfɛ 3

¹Ɔlua ɛhye ati medame Pɔɔlo, mɔɔ bɛmɛ mɔɔ bɛnle Dwuuma la ati bɛhye me nuokɛ bɛmaa Kelaese Gyisɛse la, mesɛlɛ dahuu memaa bɛ.

²Medie medi kɛ bɛde kɛ Nyamenle ɛlolɛ zo ala yɛɛ yeva gyima ɛhye yemaa me kɛ menyɛ a, wɔ bɛ kpalɛ ti.

³Nyamenle yele ye ngyehyɛlɛ ne mɔɔ vea la hilele me. (Mehɛlɛ ɛhye anwo edwɛkɛ sikalɛ,

⁴ na saa bɛkenga mɔɔ mehɛlɛ la a anrɛɛ bɛkɛnwu me ndelebɛbo ne mɔɔ fane Kelaese anwo edwɛkɛ ne mɔɔ vea la anu.)

⁵Dɛba dɛba ne bɛanga edwɛkɛ ɛhye mɔ mɔɔ vea la bɛangile sonla biala, noko kɛkala, Nyamenle lua Sunsum ne azo ɛye ɛhile ye ɛzoanvolɛma nwuanzanwuanza ne nee Nyamenle kpɔmanvolɛma.

⁶Edwɛkɛ mɔɔ ɛnee vea ɛkɛ ne la a le kɛ, ɔlua Edwɛkpa ne azo, bɛdabɛ mɔɔ bɛnle Dwuuma nee Dwuuma bɔ nu nyia Nyamenle nyilalɛ ne mɔ; bɛyɛ menli ko na bɛnyia Nyamenle ɛwɔkɛ ne mɔɔ Kelaese Gyisɛse ati ɔbɔle la.

⁷Nyamenle ɛlua ye tumi ne gyimalilɛ zo ɛmaa me ahyɛlɛdeɛ mɔɔ sonle bolɛ, kɛ menyɛ Edwɛkpa ne anwo sonvolɛ.

⁸Mele Nyamenle menli ne anu kakula bɔkɔɔ, noko Nyamenle ɛmaa me adenle ɛhye kɛ membɔ Edwɛkpa ne mɔɔ fane Kelaese anwonyia ne mɔɔ ɛnlɛ neɛnleanu la anwo nolo mengile bɛdabɛ mɔɔ bɛnle Dwuuma la,

⁹na memaa menli kɔsɔɔti ɛnwu kɛ nwanwane ngyehyɛlɛ ne mɔɔ vea la bazi ahɔ zolɛ la. Nyamenle mɔɔ yemɔ a ɔbɔle ninyɛne muala la vale ngyehyɛlɛ ɛhye veale mekɛ dɔɔnwo mɔɔ ɛraze ɛhɔ la,

¹⁰amaa mekɛ ɛhye anu ala ɔlua Asɔne ne azo anwuma tumivolɛma nee mgbolema anwu Nyamenle nrɛlɛbɛ kpole ne.

¹¹Nyamenle yɛle ɛhye kɛmɔ ye damɛnlangoate ngyehyɛlɛ ne mɔɔ ɔlua Kelaese Gyisɛse yɛ Awulae ne anwo zo ɔmanle ɔlile munli la de la.

¹²Yɛ nee Kelaese yɛ koyɛlɛ ne, nee diedi mɔɔ yɛlɛ ye wɔ ye nuhua la ati, yɛkola yɛbɔ kpɔkɛ na yɛsi yɛ kɛnra yɛfinde Nyamenle anyunlu.

¹³Yemɔti, mesɛlɛ bɛ kɛ bɛmmamaa amaneɛ mɔɔ melɛnwu ye wɔ bɛ ti la bɔ bɛ rɛle; ɔle kpalɛ ɔmaa bɛ.

¹⁴Kɛmɔ ɛnee melɛka la, ɛhye ala ati yɛɛ mekoto mesɛlɛ Selɛ ne

¹⁵mɔɔ ye nehane a abusua biala mɔɔ wɔ anwuma nee aze la nyia ye nɔhalɛ duma la,

¹⁶kɛ ye anyunlunyia ne kpole ti, ɔlua ye Sunsum ne azo ɔmaa bɛ anwosesebɛ ɔmaa bɛgyinla kpundii wɔ adwenle nu,

¹⁷na ɔlua bɛ diedi zo ɔmaa Kelaese ɛdɛnla bɛ ahonle nu. Mesɛlɛ kɛ bɛkɛgyinla kpundii wɔ ɛhulolɛ nu,

¹⁸amaa bɛahola bɛ nee Nyamenle menli ne anyia anwosesebɛ ade kɛ Kelaese ɛhulolɛ ne tɛtɛlɛ nee ye tendenle, ye anwumahɔlɛ nee ye kuma si de la abo.

¹⁹Mesɛlɛ kɛ anrɛɛ bɛanwu ye ɛhulolɛ ne mɔɔ bo sonla adwenle zo la, na Nyamenle su ne mɔɔ maa sonla sɔ Nyamenle anye la ayi bɛ tɛkɛɛ.

²⁰Anyunlunyia ɛlua asɔne ne nee Kelaese Gyisɛse anwo zo ɛha Nyamenle mɔɔ dua tumi ne mɔɔ yɛ gyima yɛ nu la azo maa ɔbo mɔɔ yɛbiza nee mɔɔ yɛdwenle nwo la azo la, wɔ ɛnɛ nee mekɛ mɔɔ ɛnlɛ awieleɛ! Amen.