Read Nzema Ɛfɛ 4 Bible Online

Ɛfɛ 4 - Nzema bible

Ɛfɛ 4

¹Zɔhane ati, mesɛlɛ bɛ, meze kɛ Awulae ɛzonlenlɛ ne ati mela efiade bɔbɔ ɛdeɛ, noko bɛbɔ ɛbɛla mɔɔ fɛta Nyamenle ɛvɛlɛlɛ ne mɔɔ yemɔti yevɛlɛ bɛ la.

² Dahuu bɛbɛlɛ bɛ nwo aze, bɛyɛ bɛtɛɛ na bɛnyia abotane. Bɛde bɛmaa bɛ gɔnwo mɔ ngoko ngoko wɔ ɛhulolɛ nu.

³Bɛbɔ mɔdenle kɛ bɛkɛdɛnla anzonudwolɛ nu na bɛmaa koyɛlɛ ne mɔɔ Sunsum ne ɛva ɛmaa bɛ la ɛwoa ɛkɛ ne dahuu.

⁴Asɔne ko yɛɛ Sunsum ko a wɔ ɛkɛ a, yɛɛ anyelazo ko anu a Nyamenle ɛvɛlɛ bɛ a;

⁵Awulae ko, diedi ko, yɛɛ ɛzɔnenlɛ kokye ala a wɔ ɛkɛ a.

⁶Nyamenle kokye mɔɔ le menli kɔsɔɔti yɛ Ze na ɔle abɔdeɛ muala bɛ Awulae na ɔyɛ gyima wɔ bɛ muala bɛ nu la a de bɛ muala bɛ nu a.

⁷Bɛmaa yɛ nuhua ko biala ahyɛlɛdeɛ mɔɔ sonle bolɛ na ɔla mɔɔ Kelaese ɛzuzu ɛva ɛmaa ye la anwo.

⁸ Nyamenle Edwɛkɛ ne se, “Mekɛ mɔɔ ɔvole ɔhɔle anwuma la, ɔhyele menli dɔɔnwo nuokɛ ɔ nee bɛ hɔle; na ɔvale ahyɛlɛdeɛ ɔmanle aleɛabo amra.”

⁹Akee “ɔhɔle anwuma” ne abo a le duzu? Yemɔ a le kɛ saa ɔvole a ɛnee noko alumua ne ɔdwule ɔhɔle azɛlɛ ti anu.

¹⁰Yemɔti ahenle mɔɔ dwule la ɔdaye ko ne ala a ɔhɔle anwuma wɔ anwumaneamra anzi lɔ a, amaa ewiade kpokpoti anwu ye.

¹¹Ye ahyɛlɛdeɛ a le kɛ ɔmaa bie mɔ yɛ ɛzoanvolɛma, bie mɔ yɛ Nyamenle kpɔmanvolɛma, bie mɔ yɛ Edwɛkpa ne nolobɔlɛma, yɛɛ bie mɔ noko yɛ sɛlɛvolɛma nee kilehilevolɛma.

¹²Ɔyɛle ɛhye ɔvale ɔzieziele Nyamenle menli kɔsɔɔti ɔmanle Keleseɛn ɛzonlenlɛ gyima ne, amaa bɛayɛ Kelaese asɔnema

¹³kɔdwu kɛ awieleɛ ne, kɛmɔ yɛdie yɛdi na yɛze Nyamenle Ara ne la ati, yɛkɛbɔ nu yɛkɛyɛ ko na yɛayɛ kɛ menli mɔɔ bɛ adwenle ɛdi na bɛ nee Kelaese ɛzɛ atipɛne la.

¹⁴Ɛnee akee yɛnle ngakula bieko mɔɔ adalɛma fa bɛ ngilehilelɛ nee agyiba ne mɔ mɔɔ bɛfa bɛtwe menli bɛkɔ ɛtane nu la bɔ yɛ kɔ ba kɛ selɛkye nee anwoma la.

¹⁵Saa yɛfa ɛhulolɛ yɛka nɔhalɛ ne a, Kelaese ati yɛbanyi wɔ adenle biala anu. Kelaese a gyi yɛ ti

¹⁶ mɔɔ yɛ nwonane ye nvɛyeba ne mɔ amuala sosɔ ye na ɔmaa biala yɛ ye gyima kɛmɔ ɔfɛta la, na nwonane ne nyi ɛhulolɛ nu a.

¹⁷Mekakye bɛ wɔ Awulae duma nu; bɛmmabɔ bɛ ɛbɛla kɛ awozonle ɛzonlenlɛma la bieko mɔɔ bɛndwenle adwenle kpalɛ a.

¹⁸Menli zɔhane mɔ adwenle nu le awozinli, bɛnlɛ ndelebɛbo yɛɛ bɛmboka ngoane ne mɔɔ Nyamenle fa maa la anwo, ɔluakɛ bɛnze ɛhwee yɛɛ eza bɛ nzo yɛ se.

¹⁹Nyiane ɛnle bɛ nye zo, bɛyɛ ninyɛndane yɛɛ bɛkulo ɛbɛla mgbane mgbane ɛbɔlɛ.

²⁰Na bɛmɛ, tɛ mɔɔ bɛzukoale ye wɔ Kelaese ɛkɛ ne la ɛne.

²¹Nɔhalɛ, bɛde ɔ nwo edwɛkɛ yɛɛ bɛhilehile bɛ nɔhalɛ ne, kɛmɔ ɔwɔ Gyisɛse anu la.

²² Zɔhane ati, bɛdu bɛ su dɛba ne mɔɔ manle bɛbɔle ɛbɛla mɔɔ bɛdabɛ bɛkulo na ɔvale ye atiakunluwɔzo ɛtane ne ɔzɛkyele bɛ la bɛgua.

²³Bɛnyia subane fofolɛ.

²⁴ Bɛva bɛ su fofolɛ ne mɔɔ Nyamenle ɛbɔ ye kɛ ɔdaye ye ɛsaso na ɔkile ɔ nwo wɔ nɔhalɛ ɛbɛla mɔɔ tenrɛ na ɔle nwuanzaanwu la anu la bɛwula.

²⁵ Zɔhane ati, bɛmmabɔ adalɛ bieko; awie biala ɛha nɔhalɛ ɛhile ɔ gɔnwo, ɔboalekɛ yɛ muala yɛle menli ko.

²⁶ Saa ɛfa ɛya a, mmamaa ɔfa wɔ ɔkɔ ɛtane nu; eza mmamaa sɛnzɛne ne tɔ wɔ ɛya zo.

²⁷Bɛmmamaa Abɔnsam adenle.

²⁸Mɔɔ le awule la ɛgyakyi ye awule ne na ɔyɛ gyima, amaa yeanyia bie yeanlea ɔ nwo na eza yeanyia bie yeaboa bɛdabɛ mɔɔ bɛhyia la.

²⁹Bɛmmamaa edwɛkɛ ɛtane fi bɛ nloa anu finde; bɛdendɛ kɛnlɛma mɔɔ maa sonla nyia ngɔzo na ɔnyia mɔɔ ɔkpondɛ la, amaa mɔɔ bɛkɛha la biala azo ara nvasoɛ amaa bɛdabɛ mɔɔ bɛtie la.

³⁰Bɛmmabɔ Nyamenle Sunsum Nwuanzanwuanza ne arɛle, ɔluakɛ Sunsum ne a le Nyamenle nzonlɛ mɔɔ yeyɛ ye bɛ nwo mɔɔ kile kɛ bɛle ye ɛdeɛ a; sɛkɛlɛneɛ ɛhye kile kɛ Kenle ne dwu a Nyamenle bakpɔne bɛ.

³¹Bɛye sipe nee ɛkpɔlɛ nee ɛya biala bɛgua. Bɛmmadi butule anzɛɛ bɛmmayɛ aholoba. Bɛye atiakunlu ɛtane biala bɛgua.

³² Bɛyɛ atiakunlukɛnlɛma na bɛze anwunvɔne, bɛva bɛ gɔnwo mɔ ɛtane bɛhyɛ bɛ, kɛmɔ Nyamenle ɛlua Kelaese anwo zo ɛva bɛ ɛtane ne mɔ ɛhyɛ bɛ la.