Read Nzema Ɛfɛ 6 Bible Online

Ɛfɛ 6 - Nzema bible

Ɛfɛ 6

¹ Ngakula, bɛdie bɛ awovolɛma wɔ Awulae ati, ɔluakɛ ɛhye a le debie kpalɛ mɔɔ ɔwɔ kɛ bɛyɛ a.

² “Di ɛ ze nee ɛ nli eni” a le Nyamenle mɛla mɔɔ lumua mɔɔ ɛwɔkɛ wɔ nwolɛ a.

³Ɛwɔkɛ ne a le “amaa wɔayɛ kpalɛ na wɔahyɛ azɛlɛ ye azo.”

⁴ Selɛma, bɛmmaka bɛ mra ɛya; bɛtete bɛ na bɛhilehile bɛ, kɛmɔ Awulae kpondɛ la.

⁵ Ngɛkɛlɛ, bɛva ɛzulolɛ nee anwowozolɛ bɛdie bɛ menle mɔ mɔɔ wɔ ewiade ye anu la kɛ asɛɛ bɛlɛsonle Awulae la.

⁶Tɛ ɛnyelɛ zo yɛkile nu ɔ, na bɛva ahonle kpalɛ bɛyɛ mɔɔ Nyamenle kpondɛ la; bɛyɛ ye kɛ bɛle Kelaese ngɛkɛlɛ,

⁷na bɛva adwenle kpalɛ bɛzonle kɛ asɛɛ bɛyɛ bɛamaa Awulae na tɛ menli ɔ.

⁸Bɛhakye kɛ gyima kpalɛ mɔɔ awie biala kɛyɛ la, saa akɛlɛ o, saa dehelɛ o, Awulae bamaa ye nwolɛ ahatualɛ.

⁹ Menlenlɛma, bɛdabɛ noko bɛyɛ zɔhane ala bɛmaa bɛ ngɛkɛlɛ ne mɔ, na bɛmmanwunlonwunla bɛ anzɛɛ bɛmmasisi bɛ. Bɛhakye kɛ bɛ nee bɛ ngɛkɛlɛ ne mɔ amuala wɔ Menlenlɛ ko ne ala mɔɔ wɔ anwuma la abo. Yemɔ, ɔnli mɔguazo wɔ ye ndɛnebualɛ nu.

¹⁰Awieleɛ ne, bɛlua Awulae tumi bedevinli ne azo bɛmaa bɛ nwo ɛyɛ se.

¹¹Bɛwula Nyamenle konle tɛladeɛ ne mɔ amuala na bɛahola bɛagyinla Abɔnsam agyiba ne mɔ anloa.

¹²Ɔluakɛ, tɛ menli a yɛ nee bɛ ɛlɛko a; sunsum nu tumivolɛma, ewiade arelemgbunli anzɛɛ maanlebuvoma, ewiade amra mɔɔ sie ɛnɛ mekɛ ye awozinli nu amra, yɛɛ sunsum nu anwuma ɛlɔnema amumuyɛ yɛɛ yɛ nee bɛ ɛlɛko a.

¹³Zɔhane ati bɛwula Nyamenle konle tɛladeɛ ne amuala, amaa saa kenle ɛtane ne ba a, bɛahola bɛagyinla kpɔvolɛ ne anyunlu, amaa mɔɔ konle ne kawie la ɛnee bɛgyi bɛ gyakɛ anu kpundii.

¹⁴ Zɔhane ati bɛziezie bɛ nwo bɛzie, bɛva nɔhalɛ bɛyɛ akyeso bɛhye; bɛva pɛlepɛlelilɛ bɛyɛ bulalɛ enyinlike bɛbutu bɛ kɛnra azo

¹⁵ na bɛva anzonudwolɛ Edwɛkpa ne bɛyɛ mgbɔlaboa bɛwula.

¹⁶Mekɛ biala bɛva diedi bɛyɛ bɛ sa nu enyinlike, ɔluakɛ yemɔ a bɛbava bɛalie Abɔnsam senle ɛda ne mɔɔ ɔkɛdo la amuala bɛanlua bɛ a.

¹⁷ Bɛva ngoanelielɛ ahyɛlɛdeɛ ne bɛyɛ bulalɛ kyɛlɛ bɛzoa na bɛva Nyamenle Edwɛkɛ ne kɛ konle dadeɛ mɔɔ Sunsum ne fa maa la.

¹⁸Bɛva nzɛlɛlɛ bɛyɛ ɛhye mɔ amuala na bɛbiza Nyamenle moalɛ. Mekɛ biala bɛzɛlɛ kɛmɔ sunsum ne kile la. Zɔhane ati bɛmaa bɛ nye ɛbolo bɛbodo bɛzɛlɛ kpalɛ wɔ Sunsum ne anu dahuu. Bɛyɛ bɛ nye gyɛlɛmgbɛɛnye na bɛmmamaa bɛ sa kpa; bɛzɛlɛ dahuu bɛmaa Nyamenle menli ne noko,

¹⁹na bɛzɛlɛ bɛmaa medame noko kɛ saa menyia nwo mebadendɛ a, Nyamenle kɛmaa me edwɛkɛ mɔɔ mebaha la, amaa meahola meadendɛ akɛnrasesebɛ zo meabɔ mɔɔ vea Edwɛkpa ne anu la nolo.

²⁰Edwɛkpa ne ati a mela efiade a, noko mele nwolɛ ɛbɔfoɔ. Bɛzɛlɛ kɛ menwɔva akɛnrasesebɛ menwɔha Edwɛkpa ne kɛmɔ ɔfɛta la.

²¹Tekekɛse mɔɔ le adiema kulovolɛ nee sonvolɛ mɔɔ di nɔhalɛ maa Awulae gyima ne la bamaa bɛade me nwo edwɛkɛ muala, amaa bɛanwu kɛ me nwo si de la.

²²Yemɔti yɛɛ melɛsoa ye bɛ nwo lɔ a, amaa bɛanwu kɛ yɛ muala yɛ nwo si de la na eza yeamaa bɛ anwosesebɛ.

²³Nyamenle Selɛ ne, nee Awulae Gyisɛse Kelaese ɛmaa mediema ne mɔ amuala anzonudwolɛ nee diedi nu ɛhulolɛ.

²⁴Nyamenle ɛlolɛ ne nee bɛdabɛ mɔɔ bɛkulo yɛ Awulae Gyisɛse Kelaese ɛhulolɛ mɔɔ ɛmbɔ aze ɛlɛ la ɛdɛnla.