Read Nzema Fel 1 Bible Online

Fel 1 - Nzema bible

Fel 1

¹ Medame Pɔɔlo nee Temɔte, mɔɔ yɛle Kelaese Gyisɛse ngɛkɛlɛ la, yɛɛ yɛlɛkɛlɛ kɛlata ɛhye yɛahɔmaa bɛdabɛ mɔɔ Kelaese Gyisɛse ati bɛyɛ Nyamenle menli nee asɔne neavolɛma nee asɔne boavolɛma mɔɔ wɔ Felepae suakpole ne azo la amuala a.

²Yɛ Ze Nyamenle ne nee Awulae Gyisɛse Kelaese ɛlo bɛ na ɔmaa bɛ anzonudwolɛ.

³Meyɛ Nyamenle mo kɛ dahuu mekakye bɛ a.

⁴Eza kenle biala mefa fɛlɛkolilɛ mesɛlɛ memaa bɛ muala,

⁵wɔ moalɛ mɔɔ bɛva bɛboa me wɔ Edwɛkpa ne anwo gyimalilɛ nu, ɔvi mɔlebɛbo ne amuala toonwo mɔɔ ɛradwu ɛnɛ la.

⁶Zɔhane ati medie medi kɛ Nyamenle mɔɔ bɔle gyima kpalɛ ɛhye abo wɔ bɛ nu la kɛzɔ zolɛ kɛmaa ɔkɛli munli wɔ Kenle ne mɔɔ Kelaese Gyisɛse kɛra la.

⁷Medwenle bɛ nwo somaa! Na ɔle kpalɛ noko kɛ melɛ bɛ nwo adwenle zɛhae a, ɔluakɛ wɔ me efiadenla nu nee Edwɛkpa ne nolobɔlɛ nee ye ɛgyinlalɛ nu, me nee bɛ yɛ muala a yɛnyia Nyamenle ɛlolɛ ne a.

⁸Nyamenle di me daselɛ kɛ me nwo mɔɔ dɔ bɛ la amuala vi Gyisɛse Kelaese ɔdaye mumua ne ahonle nu.

⁹Mesɛlɛ kɛ Nyamenle ɛdo bɛ ɛhulolɛ nu, ɔmaa bɛ nɔhalɛ adwenle nee ndelebɛbo mɔɔ di munli la,

¹⁰amaa bɛnwu mɔɔ le kpalɛ la a bɛanwu ye, na bɛ nwo ade saanwu na bɛanli fɔlɛ wɔ Kenle ne mɔɔ Kelaese kɛra la.

¹¹Bɛzo nɔhalɛ ma kpalɛ ne mɔɔ Gyisɛse Kelaese ala a fa maa la na bɛmaa anyunlunyia nee ayɛlɛyelɛ ɛha Nyamenle.

¹²Me mediema, mekulo kɛ bɛnwu kɛ, mɔɔ ɛzi me nwo zo biala la ɛboa ɛmaa Edwɛkpa ne ɛhɔ zo,

¹³ ɛmaa ɔlua zo suakunlu sinzavolɛma ne mɔ amuala nee bɛdabɛ mɔɔ ɛha la amuala ɛnwu ye kɛ Kelaese ati a mela efiade a.

¹⁴Na me efiadenla ɛhye ɛmaa mediema ne mɔ dɔɔnwo ɛzi pi wɔ Awulae anu na bɛlɛbɔ Edwɛkpa ne nolo mɔɔ bɛnzulo ɛhwee a.

¹⁵Ɔle nɔhalɛ kɛ bie mɔ fa akpule nee aholazilɛ a bɔ Kelaese anwo nolo ne a, yɛɛ bie mɔ noko lɛ adwenle kpalɛ.

¹⁶Menli mɔɔ lɛ adwenle kpalɛ la fa ɛhulolɛ a bɔ nolo ne a, ɔluakɛ bɛze kɛ medame yɛɛ Nyamenle ɛva gyima ɛhye ɛmaa me kɛ mengyinla Edwɛkpa ne anzi na mengilehile nu a.

¹⁷Bɛdabɛ mɔɔ bɛha la, bɛmbɔ Kelaese anwo nolo ne nɔhalɛ nu, bɛbɔ ye manzonlehwenlɛ nu, na bɛdwenle kɛ bɛyɛ ye zɔhane na bɛamaa me nwo ahyele me wɔ efiade ɛke.

¹⁸Ɔnle debie! Medi nwolɛ fɛlɛko, ɔluakɛ saa bɛlɛ adwenle kpalɛ o, saa ɛtane o, Kelaese anwo nolo ala a bɛbɔ a. Ɛhɛe, yɛɛ eza mebahɔ zolɛ meali fɛlɛko,

¹⁹ɔluakɛ meze kɛ ɔlua bɛmɛ bɛ nzɛlɛlɛ nee Gyisɛse Kelaese Sunsum ne moalɛ zo mebavi efiade ɛke.

²⁰Mɔɔ hyia me ɛsesebɛ na me nye la la a le kɛ menrɛze me gyima ne anwo nyiane ɛlɛ, na wɔ ewule nu o, ngoane nu o, menwɔnyia akɛnrasesebɛ menwɔva me nwo amuala menwɔli gyima menwɔwula Kelaese anyunlunyia.

²¹Na mame, mese ngoane a le Kelaese, yɛɛ ewule le nvasoɛ.

²²Saa metɛnla ewiade ye anu a anrɛɛ mebali gyima kpalɛ bie. Noko mennwu mɔɔ memkpa nu menva a.

²³Megyi ninyɛne nwiɔ avinli. Me kunlu a anrɛɛ mevi ewiade ɛhye anu na me nee Kelaese ɛhɔdɛnla, ɛhye le debie kpalɛ totohyia.

²⁴Na bɛmɛ bɛ ti ɔhyia kpole kpalɛ kɛ menwɔdɛnla ewiade ye anu.

²⁵Mesi pi wɔ ɛhye anwo, na meze kɛ metɛnyianle metɛwule. Meze kɛ me nee bɛ yɛ muala yɛbadɛnla, na bɛanyia ngɔzo na bɛ nye alie wɔ diedi nu,

²⁶amaa saa meba bɛ nwo lɔ bieko a bɛanyia anwosesebɛ bɛava me bɛadu bɛ nwo wɔ bɛ ɛbɛla mɔɔ Kelaese ati bɛlɛbɔ la anwo.

²⁷Bɛmaa bɛ ɛbɛlabɔlɛ wɔ menli nu ɛfɛta mɔɔ Kelaese anwo Edwɛkpa ne kilehile la, amaa saa meba bɛ nwo lɔ o, menle lɔ o, meade kɛ bɛlɛ koyɛlɛ nee adwenle ko bɛgyi kpundii kɛ menli mɔɔ wɔ afoa na bɛlɛko kɛ menli kɛzɔ diedi ne anu.

²⁸Bɛmmasulo bɛ agbɔvolɛ ne mɔ; bɛnyia akɛnrasesebɛ, na ɛhye bahile amaa bɛanwu kɛ bɛmɛ bɛli konim na bɛ agbɔvolɛ ne mɔ ɛho ɛdɔ. Ɔluakɛ bɛ ngoane a le Nyamenle.

²⁹Nyamenle a ɛmaa adenle kɛ bɛlie Kelaese bɛli na bɛnwu amaneɛ wɔ ɔ ti a.

³⁰ Kɛmɔ mekɛ bie bɛnwunle kɛ ɛnee melɛko wɔ diedi nu la, zɔhane ala yɛɛ kɛkala noko bɛte kɛ megua zolɛ a. Bɛhakye kɛ bɛdabɛ bɛrazɔ konle ko ne ala anu.