Read Nzema Fel 4 Bible Online

Fel 4 - Nzema bible

Fel 4

¹Zɔhane ati, me mediema kulovolɛma, mɔɔ me nwo dɔ bɛ a, me ahyɛlɛdeɛ mɔɔ me nye die bɛ nwo, na mefa bɛ metu me nwo a! Mediema kpalɛ, bɛgyinla kpundii kɛ bɛle Kelaese ɛdeɛ.

²Mebodo mesɛlɛ Yiwodea nee Senteki kɛ bɛmaa bɛ nloa ɛzɛ bɛ nwo kɛ mediema mraalɛ mɔɔ nee Awulae a lua a.

³Akee wɔmɔ noko, me boavolɛ kpalɛ, mekpondɛ kɛ ɛboa mraalɛ ɛhye mɔ; ɔluakɛ bɛ nee me nee Kelɛmɛnte nee me gɔnwo mɔ gyimayɛvoma mɔɔ ɛha la amuala, mɔɔ bɛ aluma wɔ Nyamenle ngoane buluku ne anu la a lile Edwɛkpa ne ɛkpondenlɛ nwo gyima a.

⁴Bɛmaa bɛ nye ɛlie dahuu kɛ bɛle Awulae ɛdeɛ a; mesi zo bieko: bɛmaa bɛ nye ɛlie!

⁵Bɛmaa awie biala ɛnwu kɛ bɛlɛ abotane molozo. Awulae ɛbikye.

⁶Bɛmmadwenle debie biala anwo. Wɔ debie biala anu bɛyɛ moyɛlɛ nzɛlɛlɛ na bɛva mɔɔ bɛhyia nwolɛ la bɛdo Nyamenle anyunlu.

⁷Na Nyamenle anzonudwolɛ ne mɔɔ bo sonla ndelebɛbo muala azo la bazie bɛ ahonle nee bɛ adwenle gyɛlɛɛnye wɔ Kelaese ati.

⁸Me mediema, mɔɔ meka meadwula me edwɛkɛ ne la a le kɛ, bɛdwenle ninyɛne mɔɔ le nɔhalɛ, mɔɔ lɛ duma, ninyɛne mɔɔ le fɔɔnwo, mɔɔ anwo te, mɔɔ le kɛnlɛma, mɔɔ sɔ ɛnyelɛ, nee mɔɔ di munli na ayɛlɛyelɛ wɔ nwolɛ la anwo.

⁹Bɛyɛ ninyɛne mɔɔ bɛzukoa na bɛlie bɛdo nu bɛvi me ɛdendɛlɛ nee me nyɛleɛ nu la, na Nyamenle ne mɔɔ maa yɛ anzonudwolɛ la nee bɛ badɛnla.

¹⁰Medi fɛlɛko kpole wɔ Awulae ati kɛ mekɛ tendenle ye anzi, eza bɛnyia adenle bɛlɛkile kɛ bɛdwenle me nwo a. Menga kɛ bɛgyakyi me nwo ɛdwenlenlɛ, na ɛnee bɛnnyia adenle.

¹¹Mɔɔ melɛka la ɛngile kɛ me nwo ɛhyele me, ɔluakɛ mezukoa kɛ me kunlu kɛdwo me nwo mekɛ biala wɔ gyinlabelɛ biala mɔɔ mewɔ nu la anu.

¹²Meze ehyia di, meze ezukoa di. Mezukoa ɛhye mɔ ɛyɛlɛ, amaa ɛleka biala nee mekɛ biala anu, saa menyia ye medi o, meannyia ye meanli o, saa melɛ bie o, menlɛ bie o, me kunlu adwo me nwo.

¹³Ɔlua anwosesebɛ ne mɔɔ Kelaese fa maa me la ati, mekola megyinla ninyɛne muala anloa.

¹⁴Noko bɛyɛle ye boɛ kɛ bɛboale me wɔ me anwongyelelɛ ne anu a.

¹⁵ Bɛmɛ Felepaema, bɛdabɛ bɛze ye wienyi kɛ mɔɔ medumua meabɔ Edwɛkpa ne nolo, mɔɔ menvile Masidonea la, bɛmɛ ala a bɛle asɔnema mɔɔ boale me, nleɛnleanle me nvasoɛ nee me kakɛ nu a.

¹⁶ Fane dɔɔnwo ne ala bɛnwanle me wɔ mekɛ biala mɔɔ me nwo kɛhyele me wɔ Tɛsalonaeka la.

¹⁷Tɛ kɛ asɛɛ mekpondɛ nwanle la ati ɔ, na mekpondɛ kɛ mɔɔ bɛyɛ la anwo ba nvasoɛ dɔɔnwo.

¹⁸ Ahyɛlɛdeɛ biala mɔɔ bɛva bɛnwa me la me sa ɛha ye, ɔzonle somaa! Kɛkala mɔɔ me sa ɛha bɛ nwanle mɔɔ Ɛpafulodaetɛse ɛva ɛrɛlɛ me la, mengyia debie biala anwo bieko. Bɛ ahyɛlɛdeɛ ne le kɛ azubɔlɛ evuanlɛ mɔɔ Nyamenle kulo na ɔ nye sɔ ye la.

¹⁹Me Nyamenle ne balua Kelaese Gyisɛse anyunlunyia nu anwonyia kpole ne azo ayɛ bɛ ɛhyianlɛdeɛ amaa bɛ.

²⁰Anyunlunyia ɛha yɛ Ze Nyamenle ne dahuu! Amen.

²¹Yɛbiza Nyamenle menli ne mɔɔ le Kelaese Gyisɛse ɛdeɛ la kɔsɔɔti ahye. Mediema mɔɔ nee me wɔ ɛke la biza bɛ ahye.

²²Nyamenle menli ne mɔɔ wɔ ɛke la amuala, bɔbɔ Maanle Maanle belemgbunli ne suakunlu amra ne mɔ biza bɛ ahye.

²³Awulae Gyisɛse Kelaese ɛlo bɛ na ɔ nee bɛ muala ɛdɛnla.