Read Nzema Kɔlɔ 4 Bible Online

Kɔlɔ 4 - Nzema bible

Kɔlɔ 4

¹ Menlenlɛma, bɛnlea bɛ ngɛkɛlɛ ne mɔ boɛ gyɛlɛɛnye. Bɛhakye kɛ bɛdabɛ noko bɛlɛ bɛ Menle wɔ anwuma.

²Bɛyɛ nzɛlɛlɛ dahuu, bɛzie bɛ adwenle koonwu wɔ bɛ nzɛlɛlɛ nu, na bɛyɛ Nyamenle mo.

³Eza bɛzɛlɛ bɛmaa yɛdayɛ noko kɛ Nyamenle ɛmaa yɛ mekɛ kpalɛ ɔmaa yɛbɔ fealera nu Edwɛkpa ne mɔɔ fane Kelaese anwo la nolo. Ɔluakɛ ɛhye ala ati yɛɛ kɛkala mela efiade a.

⁴Yemɔti bɛzɛlɛ kɛ menwɔdendɛ menwɔhile nu wienyi, kɛmɔ ɔwɔ kɛ meyɛ ye ala la.

⁵ Bɛdabɛ mɔɔ bɛnlɛ diedi la, bɛ nee bɛ ɛzia nrɛlɛbɛ nu, na bɛdendɛ bɛhile bɛ wɔ mekɛ biala mɔɔ bɛkɛnyia nuhua adenle la.

⁶Bɛmaa bɛ nloa edwɛkɛ ɛyɛ fɛ na ɔyɛ anyelielɛ, na bɛnwu nyelebɛnloa kpalɛ mɔɔ ɔwɔ kɛ bɛfa bɛye awie biala edwɛkɛ nloa la.

⁷ Adiema kulovolɛ Tekekɛse, mɔɔ le nɔhalɛ gyimayɛvolɛ nee sonvolɛ wɔ Awulae gyima nu la babɔ me nwo edwɛkɛ ahile bɛ.

⁸Ɛhye ati a melɛsoa ye wɔ bɛ nwo lɔ a, amaa yeaha kɛ yɛ agbɔkɛ nu si de la yeahile bɛ na bɛ nye alie.

⁹ Ɔ nee Onɛsemɛse mɔɔ le yɛ diema kulovolɛ nɔhalɛ ne, mɔɔ le bɛdabɛ bɛ nuhua bie la a bara a. Bɛbaha debie biala mɔɔ ɛlɛkɔ zolɛ wɔ ɛke la bɛahile bɛ.

¹⁰ Alesetaakɛse mɔɔ nee me a la efiade ye la yɛɛ Maake mɔɔ le Baanabase adiema ne biza bɛ ahye. (Memaa bɛde ye dɛba kɛ saa bɛnwu Maake a bɛlie ye gyɛlɛɛnye.)

¹¹Gyisɛse ne mɔɔ bɛfɛlɛ ye Gyɛsetɛse la biza bɛ ahye. Menli nsa ɛhye a le Dwuuma mɔɔ ɛlie ɛli na bɛ nee me yɛlɛdi Nyamenle Belemgbunlililɛ ne anwo gyima a, yɛɛ bɛboa me kpole kpalɛ.

¹²Ɛpafelase, mɔɔ le bɛdabɛ bɛ bie, na eza ɔle Kelaese Gyisɛse sonvolɛ la biza bɛ ahye. Dahuu ɔkakye bɛ wɔ ye nzɛlɛlɛ nu, kɛ Nyamenle ɛmaa bɛgyinla kpundii, bɛyɛ Kelaese ɛdoavolɛma mɔɔ ati ɛdi, na bɛyɛ tieyɛ bɛmaa Nyamenle ɛhulolɛdeɛ ne.

¹³Mekola medi daselɛ kɛ yeyɛ gyima kpole yemaa bɛ nee menli mɔɔ wɔ Lawɔdesia nee Hayɛleepɔlese la.

¹⁴Luku mɔɔ le yɛ ninsinli kulovolɛ ne, nee Dimase biza bɛ ahye.

¹⁵Yɛbiza mediema mɔɔ wɔ Lawɔdesia la ahye, eza yɛbiza Nemefa nee asɔnema ne mɔɔ yia nu wɔ ye sua nu ɛkɛ ne la ahye.

¹⁶Saa bɛkenga kɛlata ɛhye bɛwie a, bɛnlea bɛmaa bɛgenga ye wɔ Lawɔdesiama asɔne ne anu noko. Eza anrɛɛ bɛgenga kɛlata mɔɔ vi Lawɔdesia kɛra la.

¹⁷Na bɛha bɛhile Aakepɛse kɛ ɔnlea ɔmaa Awulae gyima ne mɔɔ yezɔ nu la ɛli munli.

¹⁸Medame Pɔɔlo, me sa anloa ɛne: Mebiza bɛ ahye. Bɛmmamaa bɛ rɛle fi kɛ mela kpanwu nu! Nyamenle ɛlo bɛ na ɔ nee bɛ ɛdɛnla.