Read Nzema Dwɔ 1 Bible Online

Dwɔ 1 - Nzema bible

Dwɔ 1

¹Ɛdɛnkɛma sonvolɛ Mosisi wule la, Ɛdɛnkɛma zele Nɛn ara Dwɔhyua mɔɔ le Mosisi boavolɛ la kɛ,

²“Me sonvolɛ Mosisi ɛwu. Zɔhane ati boɔboa ɛ nwo na ɛ nee Yizilayɛma kɔsɔɔti bɛhɔpɛ Azule Dwɔdan ne bɛhɔ ɔ nzi lɔ azɛlɛ ne mɔɔ mefa meamaa bɛ la azo.

³Kɛmɔ menganle mengilele Mosisi la, meva azɛlɛ biala mɔɔ ɛ gyakɛ kɛtia zolɛ la memaa wɔ.

⁴Ɔvi ɛsɛlɛ ne anloa lɔ bakpula Lɛbanɔn ɛke, toonwo mɔɔ kɔ azule kpole Yufileti ne anloa, ɔlua Hɛtema maanle ne anu kɔkpula Nyevile Kpole ne anloa wɔ sɛnzɛne adɔleɛ lɔ la, meva memaa wɔ.

⁵ Awie biala ɛnrɛhola ɛnrɛli ɛ nwo zo konim wɔ mekɛ mɔɔ ɛde aze la. Me nee wɔ balua, kɛmɔ me nee Mosisi luale la. Menrɛye ɛ rɛle menrɛdo ɛ sa nu yɛɛ menrɛkpo wɔ ɛlɛ.

⁶Mmasulo, gyinla kpundii, ɔluakɛ ɛbali menli ɛhye mɔ ati na bɛava azɛlɛ ne bɛadɛnla zolɛ, kɛmɔ menvale membɔle bɛ nlenya mɔ ɛwɔkɛ la.

⁷Mmasulo, gyinla kpundii na di mɛla ne mɔɔ me sonvolɛ Mosisi vale manle wɔ la azo. Mmabu ɛ nye ɛgua zolɛ ɛkɔ bɛne anzɛɛ fema zo, amaa ɛleka biala mɔɔ ɛkɛhɔ la wɔali konim.

⁸Maa ɔyɛ wɔ gyima kɛ ɛkɛgenga Mɛla buluku ne dahuu wɔ bɛ ɛzonlenlɛ mekɛ biala anu. Dwenledwenle Mɛla ne anwo nɔɔzo nee ewiazo, na di mɔɔ bɛhɛlɛ ye nuhua la amuala azo. Ɛhye bamaa wɔ ɛbɛlabɔlɛ ne adenrɛ.

⁹Kakye kɛ meze wɔ kɛ ɛgyinla kpundii. Mmamaa wɔ ahonle tu yɛɛ mmamaa ɛ nwo bubu wɔ, ɔluakɛ medame, Ɛdɛnkɛma wɔ Nyamenle ne, me nee wɔ lua ɛleka biala mɔɔ ɛkɔ la.”

¹⁰Akee Dwɔhyua zele ye mgbanyima ne mɔ kɛ,

¹¹“Bɛhɔ menli ne mɔ anu na bɛze bɛ kɛ, ‘Bɛkpondɛ aleɛ na bɛboɔboa bɛ nwo, ɔboalekɛ ɛnɛ anwo zo kenle nsa bɛbahɔpɛ Azule Dwɔdan ne bɛahɔ ɔ nzi lɔ na bɛahɔva azɛlɛ ne mɔɔ Ɛdɛnkɛma bɛ Nyamenle ne ɛva ɛmaa bɛ la.’ ”

¹²Na Dwɔhyua zele Wulubɛn nee Gaade mbusua ekpunli ekpunli ne mɔ nee Manasɛ abusua ekpunli ne anu foa ko ne anu amra kɛ,

¹³“Bɛhakye edwɛkɛ mɔɔ Ɛdɛnkɛma sonvolɛ Mosisi hanle hilele bɛ la. Ɔse, ‘Ɛdɛnkɛma bɛ Nyamenle ne ɛmaa bɛ ɛleka mɔɔ bɛtɛnla bɛalie bɛ ɛnwomenle a, na yeva azɛlɛ ɛhye yemaa bɛ.’

¹⁴Bɛ ye mɔ, bɛ mra yɛɛ bɛ nlankɛ ne mɔ baha ɛke wɔ azɛlɛ ye mɔɔ Mosisi ɛva ɛmaa bɛ la azo, na bɛ ɛlɔnema ne mɔ mɔɔ kola ko la apɛ azule ne ahɔboa bɛ mediema Yizilayɛma wɔ Dwɔdan ne anzi lɔ,

¹⁵kɔkpula kɛ bɛkɛva Dwɔdan adɔleɛ azɛlɛ ne mɔɔ Ɛdɛnkɛma bɛ Nyamenle ne ɛva ɛmaa bɛ la, na akee bɛazia bɛaradɛnla bɛdabɛ bɛ azɛlɛ ne mɔɔ Ɛdɛnkɛma sonvolɛ Mosisi vale manle bɛ wɔ Dwɔdan aduduleɛ ɛke la azo.”

¹⁶Menli ne buale Dwɔhyua kɛ, “Yɛbayɛ debie biala mɔɔ wɔha wɔhile yɛ la, yɛɛ yɛbahɔ ɛleka biala mɔɔ ɛkɛze yɛ kɛ yɛhɔ la.

¹⁷Yɛbadie ɛ ne, kɛmɔ yɛdiele Mosisi ane la. Ɛdɛnkɛma wɔ Nyamenle ne nee wɔ ɛlua, kɛmɔ ɔ nee Mosisi luale la.

¹⁸Awie biala mɔɔ kɛdu ɛ nloa kɛdo na ɔkɛhakyi ɔ nzi ɔkɛzi wɔ, na yeanli mɔɔ ɛkɛha la azo la, yɛbahu ye. Wɔmɔ gyinla kpundii na si pi.”