Read Nzema Dwɔ 11 Bible Online

Dwɔ 11 - Nzema bible

Dwɔ 11

¹Mekɛ mɔɔ Belemgbunli Gyeeben mɔɔ vi Heezɔ la dele Yizilayɛma konimlilɛ ne mɔ la, ɔdule ɛbɔfoɔ ɔmanle ɔhɔle Belemgbunli Dwobabe mɔɔ wɔ Meedɔn la ɛkɛ. Ɛbɔfoɔ eza hɔle Hyemelɔn belemgbunli ne nee Akehyafe belemgbunli ne mɔ ɛkɛ;

²ɛbɔfoɔ ne bie mɔ hɔle arelemgbunli mɔɔ wɔ maanle ne sɔlɔ awoka ne mɔ azo, Dwɔdan Bɔnza ne anu wɔ Galeli Tandane ne nyiakɛ, awoka ne mɔ abo nee ɛnweanloa toonwo asɛɛ Dɔɔ la amuala ɛkɛ ne.

³Ɛbɔfoɔ ne bie mɔ noko hɔle Keenama mɔɔ wɔ aduduleɛ nee adɔleɛ la, Amɔlema, Hɛtema, Pɛlɛzema, yɛɛ Gyibɛsema mɔɔ de Hɛmɔn Boka ne ndololeɛ nu wɔ Mezepa azɛlɛ zo la ɛkɛ ne.

⁴Na arelemgbunli ɛhye mɔ amuala vale bɛ ɛlɔnema mɔɔ bɛ somaa kɛyɛ kɛ ɛnweazo anwea la rale. Bɛlɛ bɛ mgbɔnwɔ nee konle ehwili dɔɔnwo.

⁵Bɛ muala bɛbɔle nu bɛrayɛle azokoɛleɛ wɔ Milɔm Azule kɛ bɛ nee Yizilayɛma baho.

⁶Ɛdɛnkɛma zele Dwɔhyua kɛ, “Mmasulo bɛ. Ɛhyema bekezɛ ɛnee memaa Yizilayɛma ɛhu bɛ muala. Ɛbabubu mgbɔnwɔ ne mɔ ndwɛlɛ na wɔayela bɛ konle ehwili ne mɔ.”

⁷Zɔhane ati Dwɔhyua nee ye ɛlɔnema ne hɔle bɛ nwo zo arɛlevilɛ nu wɔ Milɔm Azule na bɛ nee bɛ honle.

⁸Ɛdɛnkɛma manle Yizilayɛma lile konim. Yizilayɛma voanle bɛ toonwo bɛhɔdwule Mezelɛfo Meeyem nee Saedɛn, toonwo bɛhɔdwule Mezepa Bɔnza ne anu wɔ aduduleɛ nehane. Na bɛhonle toonwo Yizilayɛma wiele bɛ kpɔvolɛma ne amuala ku.

⁹Dwɔhyua yɛle bɛ kɛ mɔɔ Ɛdɛnkɛma zele ye ala la; ɔbubule bɛ mgbɔnwɔ ne mɔ ndwɛlɛ na ɔyelale bɛ konle ehwili ne mɔ.

¹⁰Akee Dwɔhyua ziale ɔ nzi ravale Heezɔ na ɔhunle belemgbunli ne. (Mekɛ ne anu ɛnee Heezɔ amra a yɛ se kpole kpalɛ wɔ maanle ne mɔ anu a.)

¹¹Bɛhunle awie biala; ko bɔbɔ anga, na bɛyelale suakpole ne.

¹²Dwɔhyua vale azuamgbole ne mɔ amuala, ɔhunle arelemgbunli ne mɔ, ɔhunle menli mɔɔ wɔ zolɛ la amuala, kɛmɔ Ɛdɛnkɛma sonvolɛ Mosisi zele la.

¹³Yizilayɛma anyela azua mɔɔ wɔ awoka ngyikyi ne mɔ azo la, Heezɔ ala a Dwɔhyua yelale ye a.

¹⁴Yizilayɛma ne vale ninyɛne mɔɔ anwo hyia nee nyɛmoa mɔɔ wɔ azuamgbole ne mɔ azo la. Na bɛhunle awie biala; ko bɔbɔ anga.

¹⁵Kɛmɔ Nyamenle zele ye sonvolɛ Mosisi kɛ ɔyɛ la, zɔhane ala yɛɛ Mosisi hanle hilele Dwɔhyua kɛ ɔyɛ a, yɛɛ Dwɔhyua noko lile zolɛ. Ɔyɛle debie biala mɔɔ Ɛdɛnkɛma zele Mosisi kɛ ɔyɛ la.

¹⁶Dwɔhyua vale azɛlɛ ne amuala, azɛlɛ mɔɔ wɔ awoka ne mɔ azo nee bɛ ndololeɛ nu, maanle ne sɔlɔ nee ye nyiakɛ, Gohyɛn azɛlɛ ne nee azɛlɛ ne mɔɔ la ye nyiakɛ, nee Dwɔdan Bɔnza ne kɔsɔɔti.

¹⁷Azɛlɛ ne anloa vi Halake Boka wɔ nyiakɛ afoa nu mɔɔ bikye Yidɔm la toonwo ɔdwu Beeyalegade sɔlɔ wɔ Lɛbanɔn bɔnza ne mɔɔ la Hɛmɔn Boka la nyiakɛ.

¹⁹Suakpole mɔɔ nee Yizilayɛ yɛle anzonudwolɛ ngyehyɛlɛ la a le Gebɛyɔn, ɛleka mɔɔ Haevaema de la. Mɔɔ hale la, bɛluale konle nu a bɛhanle bɛ aze a. Dwɔhyua nee arelemgbunli mɔɔ wɔ azɛlɛ ne azo la honle hyɛle, noko ɔhyele bɛ kɔsɔɔti ɔhunle bɛ.

²⁰ Ɛdɛnkɛma a yɛle bɛ zɔhane manle bɛ nee Yizilayɛma honle, amaa ɔlua zo bɛabua bɛ fɔlɛ, bɛahu bɛ, bɛabɔ bɛ bo zo bɔkɔɔ mɔɔ anwunvɔnezelɛ biala ɛnle nu a. Kɛ Ɛdɛnkɛma zele Mosisi kɛ ɔyɛ la ɛne.

²¹Mekɛ ɛhye anu ala Dwɔhyua hɔle hɔzɛkyele kakanyinlima ekpunli bie mɔɔ bɛfɛlɛ bɛ Anakema mɔɔ wɔ maanle ne anu awoka ne mɔ azo la. Bɛdabɛ mɔɔ bɛwɔ Hibulɔn, Dibɛ, Anabe yɛɛ bɛdabɛ mɔɔ bɛwɔ Dwuda awoka ne mɔ azo nee Yizilayɛ maanle ne anu la, Dwɔhyua hunle bɛ muala na ɔzɛkyele bɛ azuamgbole ne mɔ.

²²Anakema sonla ko bɔbɔ anga Yizilayɛ azɛlɛ zo. Ekyi bie a hale Gaza, Gate, yɛɛ Ahyedɔdo a.

²³Dwɔhyua vale azɛlɛ ne amuala, kɛmɔ Ɛdɛnkɛma zele Mosisi la. Dwɔhyua vale azɛlɛ ne manle Yizilayɛma kɛ bɛ ɛdeɛ ɔ na bɛdɛnla zolɛ. Ɔhyɛle nu ngyebangyeba ɔmanle Yizilayɛ mbusua ekpunli ekpunli ne mɔ. Akee Yizilayɛma liele bɛ ɛnwomenle na bɛgyakyile konle.