Read Nzema Dwɔ 12 Bible Online

Dwɔ 12 - Nzema bible

Dwɔ 12

¹ Mekɛ ne anu ɛnee Yizilayɛma ɛho ɛva azɛlɛ ne mɔɔ la Dwɔdan aduduleɛ la, ɔvi Anɔn Bɔnza ɔlua Dwɔdan Bɔnza ne anloa toonwo ɔkɔdwu azɛlɛ ne sɔlɔ wɔ Hɛmɔn Boka. Arelemgbunli nwiɔ yɛɛ bɛlile bɛ nwo zo konim a.

²Ko a le Saehɔn, mɔɔ le Amɔle belemgbunli ne mɔɔ ɛnee de Hɛhyebɔn la. Geleade azɛlɛ ne foa ko boka ye belemgbunli maanle ne anwo, ɔvi Alowɛ (mɔɔ la Azule Anɔn Bɔnza la anloa) nee suakpole ne mɔɔ wɔ bɔnza zɔhane avinli la, toonwo ɔkɔkpula Azule Gyeebɔko mɔɔ la Amɔlema ɛweɛne zo la.

³Dwɔdan Bɔnza, ɔvi Galeli Tandane ne nyiakɛ, ɔkɔ Bɛte Gyɛhyemo (mɔɔ la Nyevile Ngyenle anzɛɛ Nyevile Wulera ne aduduleɛ) toonwo mɔɔ kɔgua ye Pesega Boka ne abo la boka Belemgbunli Saehɔn maanle ne anwo.

⁴Eza bɛlile Belemgbunli Ɔɔgo mɔɔ wɔ Beehyan la anwo zo konim. Belemgbunli Ɔɔgo le menli bie mɔɔ bɛfɛlɛ bɛ Relɛfeeyemma mɔɔ ɛnee bɛ bo ɛdu la anu ko. Ɔɔgo lile ye ebia ne wɔ Ahyetalo nee Ɛdelɛyae.

⁵Hɛmɔn Boka, Salika, yɛɛ Beehyan azɛlɛ ne amuala kɔgua Gɛhyɛ nee Meeyaka ɛweɛne ne mɔ azo, Geleade azɛlɛ ne foa ko mɔɔ kɔkpula Belemgbunli Saehɔn mɔɔ wɔ Hɛhyebɔn la azɛlɛ ne ɛweɛne zo la amuala boka Belemgbunli Ɔɔgo maanle ne anwo.

⁶ Ɛdɛnkɛma sonvolɛ Mosisi nee Yizilayɛma a lile arelemgbunli nwiɔ ɛhye mɔ anwo zo konim a. Na Ɛdɛnkɛma sonvolɛ Mosisi vale bɛ azɛlɛ ne mɔ manle Wulubɛn nee Gaade mbusua ekpunli ne mɔ kɛ bɛva bɛyɛ bɛ ɛdeɛ.

⁷Dwɔhyua nee Yizilayɛma noko lile arelemgbunli mɔɔ wɔ Dwɔdan adɔleɛ azɛlɛ ne azo la anwo zo konim, ɔvi Beeyalegade mɔɔ wɔ Lɛbanɔn Bɔnza ne anu la, kɔdwu Halake Boka ne azo wɔ nyiakɛ afoa nu mɔɔ bikye Yidɔm la. Dwɔhyua hyɛle azɛlɛ ne manle Yizilayɛ mbusua ekpunli ekpunli ne mɔ na ɔmanle ɔyɛle bɛ ɛdeɛ bɔkɔɔ.

⁸Azɛlɛ ɛhye la awoka ne mɔ azo, ɔlua adɔleɛ awoka ngyikyi ne mɔ azo, Dwɔdan Bɔnza nee ye awoka ngyikyi ne mɔ, aduduleɛ ndololeɛ ne anu ɔba ɛsɛlɛ ne mɔɔ wɔ nyiakɛ la azo. Menli mɔɔ anrɛɛ de azɛlɛ ɛhye azo la a le Hɛtema, Amɔlema, Keenama, Pɛlɛzema, Haevaema, yɛɛ Gyibɛsema.

⁹Yizilayɛma lile arelemgbunli mɔɔ wɔ azuamgbole ɛhye mɔ azo la anwo zo konim: Gyɛleko, Eyae (mɔɔ zua Bɛtɛle la),

¹⁰Gyɛlusalɛm, Hibulɔn,

¹¹Gyaamutu, Leekehye,

¹²Ɛgelɔn, Gizɛ,

¹³Dibɛ, Gidɛ,

¹⁴Hɔɔma, Ɛlade,

¹⁵Lebena, Adulam,

¹⁶Makidaa, Bɛtɛle,

¹⁷Tapua, Hifɛ,

¹⁸Efɛke, Lahyalɔn,

¹⁹Meedɔn, Heezɔ,

²⁰Hyemelɔn Milɔn, Akehyafe,

²¹Teeyanake, Mɛgedo,

²²Kidɛhye, Dwɔkenɛyam (mɔɔ wɔ Kamɛle la),

²³Dɔɔ (mɔɔ wɔ ɛnweanloa la), Goyem (mɔɔ wɔ Galeli[3] la)

²⁴yɛɛ Tɛza. Bɛ muala bɛlua arelemgbunli abulasa nee ko.