Read Nzema Dwɔ 14 Bible Online

Dwɔ 14 - Nzema bible

Dwɔ 14

¹Akee kɛ bɛzile bɛhyɛle Keena azɛlɛ ne mɔɔ wɔ Dwɔdan Adɔleɛ bɛmanle Yizilayɛma la ɛne. Sɛlɛvolɛ Ɛlieza nee Nɛn ara Dwɔhyua yɛɛ Yizilayɛ mbusua ekpunli ekpunli ne anu mgbanyima mɔɔ gyigyi bɛ ti la a hyɛle azɛlɛ ne manle Yizilayɛma a.

² Kɛmɔ Ɛdɛnkɛma zele Mosisi la, bɛguale azɛlɛ ne mɔɔ la Dwɔdan Adɔleɛ la anwo nzeleba [4] a bɛhyɛle a.

³ Azɛlɛ ne mɔɔ la Dwɔdan Aduduleɛ la, Mosisi hyɛle manle Yizilayɛma mbusua ekpunli nwiɔ nee foa ne dɛba. (Dwosefi abusua ekpunli ne bɛhyɛle nu nwiɔ: Manasɛ yɛɛ Yifelaem.) Livae abusua ekpunli ne ɛdeɛ, Mosisi manle bɛmanle bɛ azuamgbole nee azɛlɛ mɔɔ bɛdidi zolɛ, bɛsie bɛ mboane nee nlankɛ zolɛ la kɛ bɛdɛnla zo, na bɛammaa bɛ azɛlɛ kpalɛ biala.

⁵Yizilayɛma hyɛle azɛlɛ ne, kɛmɔ Ɛdɛnkɛma hanle hilele Mosisi la.

⁶ Kenle ko Dwuda abusua ekpunli ne anu amra ne bie mɔ rale Dwɔhyua anwo ɛkɛ ne wɔ Gelegale. Na Kalɛbe mɔɔ ɔ ze a le Gyɛfɛni mɔɔ le Kinɛzenli la zele Dwɔhyua kɛ, “Ɛze mɔɔ Ɛdɛnkɛma hanle wɔ Keedɛhye Baanɛya hilele Nyamenle sonvolɛ Mosisi, mɔɔ fane me nee ɛ nwo la.

⁷ Menlile ɛvolɛ abulanla la yɛɛ Ɛdɛnkɛma sonvolɛ Mosisi zoanle me kɛ mevi Keedɛhye Baanɛya membɛla maanle ɛhye anu memanli azɛlɛ ye azo busia menea a. Menyɛle ye zɔhane na menvale nwolɛ edwɛkɛ nɔhalɛ nu mengɔmanle ye.

⁸Menli mɔɔ nee me hɔle la manle yɛ menli ne mɔ ahonle dule. Noko nɔhalɛ nu, menyɛle tieyɛ memanle Ɛdɛnkɛma me Nyamenle ne.

⁹ Na Kɛmɔ menyɛle zɔhane la ati, Mosisi bɔle me ɛwɔkɛ kɛ me nee me mra yɛbanyia azɛlɛ ne mɔɔ mengɔle zolɛ la kɛ ɔle yɛ ɛdeɛ.

¹⁰Na kɛkala, nea, Ɛdɛnkɛma hanle edwɛkɛ ɛhye hilele Mosisi la ye ɛvolɛ abulanla nee nnu ɛne. Mekɛ ne anu ɛnee Yizilayɛma lua ɛsɛlɛ ne azo, yɛɛ Ɛdɛnkɛma ɛmaa medɛnla ngoane nu toonwo yeradwu ɛnɛ; kɛkala meli ɛvolɛ abulatwɛ nee nnu.

¹¹Kɛkala bɔbɔ, me nwo tɛyɛ se kɛ mekɛ mɔɔ Mosisi zoanle me la. Me nwo tɛyɛ se wɔ konle nee debie biala ɛyɛlɛ nu.

¹²Yemɔti fa azɛlɛ ne mɔɔ wɔ awoka ne mɔ azo lɔ la maa me. Ɛdɛnkɛma vale bɔle me ɛwɔkɛ wɔ mekɛ mɔɔ me nee me menli ne yɛrale la. Yɛhanle yɛhilele wɔ kɛ menli kakanyinli bie mɔɔ bɛfɛlɛ bɛ ‘Anakema’ la wɔ maanle ne anu, na bɛdede azuamgbole mɔɔ bɛlie nwolɛ bane la azo. Ɛdɛnkɛma baboa me yeamaa meavoa bɛ, kɛmɔ ɔdaye yeha la.”

¹³Dwɔhyua yilale Gyɛfɛni ara Kalɛbe na ɔvale suakpole Hibulɔn ɔmanle ye kɛ ye agyadeɛ ɔ.

¹⁴Kɛkala, Hibulɔn tɛde Kalɛbe abo zo amra ɛdeɛ. Gyɛfɛni le Kinɛzenli. Kalɛbe yɛle tieyɛ manle Ɛdɛnkɛma, Yizilayɛ Nyamenle ne.

¹⁵Hibulɔn duma dɛba a le Aabasuazo (Aaba anrɛɛ le sonla mɔɔ anwo yɛ se kpole kpalɛ wɔ Anakema anu). Na anzonudwolɛ akee rale maanle ne anu.