Read Nzema Dwɔ 16 Bible Online

Dwɔ 16 - Nzema bible

Dwɔ 16

¹Azɛlɛ mɔɔ bɛvale bɛmanle Dwosefi abo zo amra ne la, ye nyiakɛ ɛweɛne ne bɔ ɔ bo wɔ azule Dwɔdan ne anloa wɔ Gyɛleko afoa nu, ɔvi Gyɛleko nzubula ne mɔ aduduleɛ ɔkɔ ɛsɛlɛ ne azo. Ɔla ɛkɛ ne, ɔvi Gyɛleko, ɔlua awoka ne mɔ anu ɔkɔdwu Bɛtɛle.

²Ɔvi Bɛtɛle ɔkɔ Lɛɛze, ɔfa Atalo Ada, ɛleka mɔɔ Akaema dɛnlanle la.

³Akee ɔfa adɔleɛ, ɔlua Gyafelɛte afoa nu ɔkɔkpula Aleze Bɛte Hɔlɔn, ɔvi ɛkɛ ne ɔlua Gizɛ ɔkɔgua Mɛdetɛlenia Nyevile ne anu.

⁴Dwosefi abo zo amra, mɔɔ le Yifelaem abusua ekpunli ne nee Manasɛ Adɔleɛ amra, nyianle azɛlɛ ɛhye yɛle bɛ ɛdeɛ.

⁵Azɛlɛ mɔɔ bɛvale bɛmanle Yifelaem abusua ekpunli ne la ɛne: bɛ ɛweɛne ne mɔ bɔ ɔ bo wɔ Atalo Ada ɔkɔ aduduleɛ, ɔdwu Sɔlɔ Bɛte Hɔlɔn,

⁶na ɔvi ɛkɛ ɔkɔgua Mɛdetɛlenia Nyevile ne anloa. Makemita wɔ bɛ sɔlɔ. Ye aduduleɛ ɛweɛne ne bele kɔ Teeyanate Hyaelo afoa nu, ɔtɛla ye ɔkɔ Gyanowa aduduleɛ afoa nu.

⁷Akee ɛweɛne ne wɔne ɔ ti aze ɔvi Gyanowa ɔkɔ Atalo nee Neeyala, ɔdwu Gyɛleko na ɔwie wɔ Dwɔdan ne anloa.

⁸Ɔdwu Tapua a ɛweɛne ne fa adɔleɛ na ɔkɔ Kana Azule ne anloa, toonwo ɔkɔgua Mɛdetɛlenia Nyevile ne anloa. Yifelaem abusua ekpunli ne, azɛlɛ mɔɔ bɛvale bɛmanle bɛ la ɛne.

⁹Bɛvale azua nee namunamu mɔɔ wɔ Manasɛ ɛweɛne zo la noko bɛmanle Yifelaem abusua ekpunli ne.

¹⁰ Noko bɛanvoa Keenama mɔɔ de Gizɛ la, yemɔti Keenama nee Yifelaemma ɛdɛnla toonwo a yeradwu ɛnɛ a, na bɛmaa Keenama yɛ gyima kɛ bɛle ahanra.