Read Nzema Dwɔ 17 Bible Online

Dwɔ 17 - Nzema bible

Dwɔ 17

¹Bɛpɛle Dwɔdan Adɔleɛ azɛlɛ ne bie bɛmanle Dwosefi ara kpanyinli Manasɛ abusua ekpunli ne anu amra ne bie mɔ. Geleade ɔ ze Meekɛ le Manasɛ ara nrenya kpanyinli, yɛɛ ɔle katakyie wɔ ɛlɔne avinli. Yemɔti bɛvale Geleade nee Beehyan mɔɔ wɔ Dwɔdan Aduduleɛ la bɛmanle ye.

²Bɛvale Dwɔdan Adɔleɛ azɛlɛ ne bie bɛmanle Manasɛ abusua ekpunli ne anu amra mɔɔ hale la: Ebayizɛ, Hilɛke, Aseleɛle, Hyikɛm, Hifɛ, yɛɛ Hyemaeda. Ɛhye mɔ le Dwosefi ara Manasɛ abo zo amra yɛɛ bɛle abusua ne anu mgbanyinli mɔɔ gyigyi bɛ ze mɔ awuke ne mɔ ati a.

³Zilɔfɛhade le Hifɛ ara, Geleade alɔnra ɔ, yɛɛ ɔle Manasɛ ara Meekɛ angabɛnzo. Zilɔfɛhade anwo mralɛ mrenya. Mraalɛ ngome a ɔwole a; bɛmɛ a le Mala, Nowa, Hɔgela, Melekaa, yɛɛ Tɛza.

⁴ Bɛhɔle sɛlɛvolɛ Ɛlieza nee Nɛn ara Dwɔhyua nee mgbanyima ne mɔ ɛkɛ ne na bɛzele kɛ, “Ɛdɛnkɛma zele Mosisi kɛ ɔmaa yɛ nee yɛ mediema mrenya ne mɔ azɛlɛ ne bie.” Zɔhane ati, kɛmɔ Ɛdɛnkɛma hanle la, bɛmanle bɛ azɛlɛ kɛ bɛ mediema mrenya ne mɔ ala la.

⁵Yemɔti a Manasɛ nyianle ɛkpɔ bulu bokale Geleade nee Beehyan mɔɔ wɔ Dwɔdan Aduduleɛ la anwo a,

⁶ɔluakɛ bɛmanle ɔ bo zo amra mrenya nee mraalɛ azɛlɛ. Geleade azɛlɛ ne, bɛvale bɛmanle Manasɛ abo zo amra ne mɔɔ hale la.

⁷Manasɛ azɛlɛ ne ɛweɛne vi Ahya kɔkpula Mekemita wɔ Hyikɛm aduduleɛ. Ɔdwu ɛkɛ a ɛweɛne ne wɔne ɔ ti nyiakɛ na ɔfa Ɛntapua maanle ne ɔboka nwolɛ.

⁸Tapua azɛlɛ ne le Manasɛ ɛdeɛ, noko Tapua sua ne mɔɔ wɔ Manasɛ ɛweɛne zo la, yemɔ ɔle Yifelaem abo zo amra ɛdeɛ.

⁹Akee ɛweɛne ne wɔne ɔ ti aze dwu Azule Keena ne anloa. Azuamgbole mɔɔ wɔ azule ne nyiakɛ la le Yifelaem amra ɛdeɛ, noko bɛwɔ Manasɛ azɛlɛ zo. Manasɛ ɛweɛne ne kɔ azule ne sɔlɔ na ɔkɔwie Mɛdetɛlenia Nyevile ne anloa.

¹⁰Yifelaem la azɛlɛ ne nyiakɛ, yɛɛ Manasɛ la ye sɔlɔ. Mɛdetɛlenia Nyevile ne a le bɛ adɔleɛ ɛweɛne a. Ahya la azɛlɛ ne sɔlɔ mɔɔ kɔ ye adɔleɛ la, yɛɛ Yesakaa, la sɔlɔ mɔɔ kɔ ye aduduleɛ la.

¹¹Yesakaa nee Ahya bɛ azɛlɛ ne, zolɛ yɛɛ Bɛte Hyan nee Yebelɛyam wɔ a, noko bɛle Manasɛ ɛdeɛ. Zɔhane ala yɛɛ azua nee namunamu mɔɔ zuozua bɛ la de a. Eza Dɔɔ (mɔɔ wɔ ɛnwea ne anloa), Ɛndɔɔ, Teeyanake, Mɛgedo, yɛɛ azua nee namunamu mɔɔ zuozua bɛ la le Manasɛ ɛdeɛ.

¹² Manasɛma angola andu menli mɔɔ wɔ azuamgbole ɛhye mɔ azo la, yemɔti Keenama dɛnlanle ɛkɛ.

¹³Nzinlii bɔbɔ mɔɔ Yizilayɛma anwo yɛle se kpalɛ la bɛandu Keenama ne amuala. Bɛmanle Keenama ne yɛle gyima manle bɛ.

¹⁴Dwosefi abo zo amra ne zele Dwɔhyua kɛ, “Duzu ati yɛɛ wɔva azɛlɛ ne ɛkpɔ ko ala a wɔmaa yɛ a? Ɔluakɛ Ɛdɛnkɛma ɛyila yɛ ɛmaa yɛ nwo ɛzo kpalɛ.”

¹⁵Dwɔhyua buale bɛ kɛ, “Saa bɛ nwo ɛzo na Yifelaem awoka ne mɔ azo ɛyɛ ekyi ɛmaa bɛ a, ɛnee bɛhɔ Pɛlɛzema nee Relɛfeeyemma azɛlɛ ne azo, bɛhɔzo kpɔkɛ ne bie bɛziezie ɛkɛ ne bɛva.”

¹⁶Bɛbuale ye kɛ, “Awoka ne mɔ azo azɛlɛ ne le ekyi maa yɛ. Keenama noko mɔɔ wɔ fienemgbole ne anu la lɛ konle mbulalɛ ehwili, yɛɛ bɛdabɛ mɔɔ bɛde Bɛte Hyan nee azua mɔɔ zuozua ye la nee bɛdabɛ mɔɔ bɛde Gyɛzɛli Bɔnza ne anu la amuala dedɛ konle mbulalɛ ehwili.”

¹⁷Dwɔhyua zele Yifelaem nee Manasɛ Adɔleɛ amra ne kɛ, “Nɔhalɛ, bɛ nwo zonle yɛɛ bɛ nwo yɛ se. Azɛlɛ ne, bɛbanyia mɔɔ bo ko la.

¹⁸Awoka ne mɔ anu lɔ azɛlɛ ne bayɛ bɛ ɛdeɛ. Ɔle kpɔkɛ ɛdeɛ, noko bɛhɔva bɛzo, bɛvi ɔ ti bɛhɔkpula ɔ bo na bɛva bɛyɛ bɛ ɛdeɛ. Keenama lɛ konle mbulalɛ ehwili, eza bɛ nwo yɛ se ɛdeɛ, noko bɛbavoa bɛ bɛavi ɛkɛ ne.”