Read Nzema Dwɔ 18 Bible Online

Dwɔ 18 - Nzema bible

Dwɔ 18

¹Yizilayɛma honle vale azɛlɛ ne la, nzinlii bɛ muala bɛyiale Hyaelo na bɛzile Ɛdɛnkɛma Ɛzonlenlɛ Ndanlɛ Sua ne.

²Ɛnee Yizilayɛ mbusua ekpunli nsuu wɔ ɛkɛ mɔɔ bɛmɛ bɛtɛmanle bɛ azɛlɛ ne bie a.

³Zɔhane ati Dwɔhyua zele Yizilayɛma kɛ, “Kenlenzu a bɛkɔ na bɛahɔva azɛlɛ ne mɔɔ Ɛdɛnkɛma, mɔɔ le bɛ nlenya mɔ Nyamenle ne, ɛva ɛmaa bɛ la a?

⁴Bɛye abusua ekpunli ko biala anu menli nsa bɛmaa me. Mesoa bɛ wɔ maanle ne anu meamaa bɛahɔkpɔla azɛlɛ ne amuala, bɛahɔyɛ ɛleka mɔɔ bɛkulo kɛ bɛtɛnla la nzonlɛ na bɛazia bɛara.

⁵Bɛbahyɛ azɛlɛ ne anu nsuu bɛamaa bɛ: Dwuda badɛnla ye ɛdeɛ ne azo wɔ nyiakɛ, na Dwosefi adɛnla ye sɔlɔ.

⁶Ye nsuu ne mɔɔ bɛkɛhyɛ ye la, bɛhɛlɛ ko biala anwo edwɛkɛ bɛrɛlɛ me na menwɔbiza [5] Ɛdɛnkɛma yɛ Nyamenle ne menwɔmaa bɛ.

⁷Livaema, bɛmɛ bɛnrɛnyia azɛlɛ ne bie, ɔboalekɛ bɛ ɛdeɛ a le kɛ bɛle Ɛdɛnkɛma sɛlɛvolɛma. Na Gaade, Wulubɛn, yɛɛ Manasɛ Aduduleɛ amra, bɛmɛ bɛ sa ɛha bɛ azɛlɛ ɛdeɛ ne mɔɔ Ɛdɛnkɛma sonvolɛ Mosisi vale manle bɛ dɛbadɛba la wɔ Dwɔdan Aduduleɛ lɔ.”

⁸Dwɔhyua akee zele menli mɔɔ bɛyele bɛ bɛmanle ye la kɛ, “Bɛhɔ azɛlɛ ne amuala azo na bɛhɛlɛ nwolɛ edwɛkɛ wɔ ngɛlata zo bɛrɛlɛ me. Mebagua nzeleba wɔ Hyaelo ɛke meabiza Ɛdɛnkɛma nwolɛ edwɛkɛ meamaa bɛ.”

⁹Ɔhanle ɛhye la akee menli ne guale adenle zo. Bɛhɔkpɔlale azɛlɛ ne amuala na bɛhilele kɛ bɛzi bɛhyɛ nu nsuu ne la wɔ kɛlata zo. Bɛhɛlɛle azua ne mɔ amuala aluma na bɛziale bɛrale Dwɔhyua anwo ɛkɛ ne wɔ Hyaelo azokoɛleɛ ne.

¹⁰Dwɔhyua guale nzeleba bizale nwolɛ manle bɛ, ɔhyɛle azɛlɛ ne ɔmanle mbusua ekpunli nsuu ne mɔ mɔɔ hale la.

¹¹Bɛngyaman abusua ekpunli ne a bɛlumuale bɛmanle ye azɛlɛ ne bie a. Bɛ azɛlɛ ne la Dwuda nee Dwosefi mbusua ekpunli ne ɛdeɛ ne mɔ avinli.

¹²Azɛlɛ ne sɔlɔ ɛweɛne ne bɔ ɔ bo wɔ Dwɔdan ne anloa, ɔlua boka ne ndololeɛ nu wɔ Gyɛleko anwuma, ɔse ye adɔleɛ ɔlua awoka ne mɔ azo ɔkɔ ɛsɛlɛ ne azo lɔ wɔ Bɛteevɛn.

¹³Ɛweɛne ne akee wɔne ɔ ti aze, ɔlua Lɛɛze (mɔɔ eza bɛfɛlɛ ye Bɛtɛle la) nyiakɛ, ɔtolo ɔkɔ Atalo Ada, ɔfinde Aleze Bɛte Hɔlɔn boka ne nyiakɛ.

¹⁴Ɛweɛne ne eza bu ɛleka bie finde awoka ne mɔ adɔleɛ afoa nu, ɔfa nyiakɛ ɔkɔ Keleate Beeyale (anzɛɛ Keleate Gyialem) mɔɔ le Dwudama azɛlɛ la. Bɛngyaman azɛlɛ ne adɔleɛ ɛweɛne ne ɛne.

¹⁵Nyiakɛ ɛweɛne ne bɔ ɔ bo wɔ Keleate Gyialem kandiba ɔkɔ Nɛfetowa nzubula ne mɔ azo.

¹⁶Akee ɔlua boka ne mɔɔ awie gyi zolɛ a ɔnwu Henɛm Bɔnza ne anu la abo, wɔ Relɛfeeyem Bɔnza ne sɔlɔ. Akee ɔfa nyiakɛ, ɔlua Henɛm Bɔnza ne anu, ɔlua Gyibɛse boka ne nyiakɛ, ɔfinde Ɛnlogɛle.

¹⁷Akee ɔkakyi ɔ nye ɔfa ɛbɔ nu, ɔlua Ɛnhyimɛhye, ɔkɔ Gɛlaelo mɔɔ nee Adɛmem bɛ nye bɔ zolɛ la. Ɛweɛne ne akee kɔ Bohan Bolɛ ne anwo (Bohan le Wulubɛn ara),

¹⁸ɔlua boka ne abati mɔɔ anye bɔ Dwɔdan Bɔnza ne azo la, ɔtolo ɔkɔ bɔnza ne anu;

¹⁹ɔkɔfa Bɛte Hɔgela boka ne sɔlɔ na ɔkɔgua ye wɔ Nyevile Ngyenle ne sɔlɔ ebolo ne anu, ɛleka mɔɔ Azule Dwɔdan ne bɔ nyevile ne anu la. Ɛnee nyiakɛ ɛweɛne ne ɛne.

²⁰Azule Dwɔdan ne a le aduduleɛ ɛweɛne ne a. Azɛlɛ ne mɔɔ Bɛngyaman abusua ekpunli ne nyianle ye yɛle bɛ ɛdeɛ la ɛweɛne ne ɛne.

²¹Azuamgbole mɔɔ le Bɛngyaman abusua ekpunli ne anu amra ɛdeɛ la a le Gyɛleko, Bɛte Hɔgela, Yimɛke, Kizeze,

²²Bɛte Alaba, Zɛmaleeyem, Bɛtɛle,

²³Evem, Pɛla, Ɔfela,

²⁴Kifalamonae, Ɔfenae, yɛɛ Giba: azuamgbole bulu nee nwiɔ, nee namunamu mɔɔ zuozua bɛ la.

²⁵Azuamgbole ɛhye mɔ noko wɔ ɛkɛ: Gebɛyɔn, Leema, Biyɛlo,

²⁶Mezepa, Kɛfaela, Moza,

²⁷Rilikɛm, Yɛpii, Talala,

²⁸Zila, Hyilɛfe, Gyibɛse (anzɛɛ Gyɛlusalɛm), Gebɛya, yɛɛ Keleate Gyialem: azuamgbole bulu nee nna, nee namunamu mɔɔ zuozua bɛ la. Azɛlɛ ne mɔɔ Bɛngyaman abusua ekpunli ne anu amra nyianle ye yɛle bɛ ɛdeɛ la ɛne.