Read Nzema Dwɔ 19 Bible Online

Dwɔ 19 - Nzema bible

Dwɔ 19

¹Azɛlɛ ne mɔɔ tɔ zolɛ nwiɔ la, bɛvale bɛmanle Semɛyɔn abusua ekpunli ne anu amra. Bɛ azɛlɛ ne wolole Dwuda abusua ekpunli ne ɛdeɛ ne anu.

² Biyɛhyiba, Hyiba, Moleeda,

³Heezaa Hyuale, Beela, Yizɛm,

⁴Ɛletolade, Bɛtɛle, Hɔɔma,

⁵Zekelage, Bɛte Maekabo, Heezaa Susa,

⁶Bɛte Lɛbeeyo, yɛɛ Hyaluhɛn boka nwolɛ: bɛle azuamgbole bulu nee nsa, nee bɛ namunamu mɔɔ zuozua bɛ la.

⁷Eza Eyen, Relemɔn, Yitɛ, yɛɛ Ahyan: azuamgbole nna, boka azua mɔɔ zuozua bɛ la;

⁸yɛɛ azua mɔɔ zuozua azuamgbole ne mɔ toonwo kɔdwu Beeyala Biyɛ (anzɛɛ Releema) mɔɔ wɔ azɛlɛ ne nyiakɛ la. Azɛlɛ mɔɔ Semɛyɔn abusua ekpunli ne nyianle ye kɛ bɛ ɛdeɛ la ɛne.

⁹Kɛmɔ Dwuda azɛlɛ ne yɛle kpole bole zolɛ la ati, bɛvale bie bɛmanle Semɛyɔn abusua ekpunli ne.

¹⁰Azɛlɛ ne mɔɔ tɔ zolɛ nsa la hɔle Zɛbulɛn abusua ekpunli ne ɛkɛ. Azɛlɛ ne mɔɔ bɛnyianle la tɛlɛ dwu Sɛlede.

¹¹Ɛweɛne ne vi ɛkɛ ne ɔfa adɔleɛ ɔkɔdwu Maliale, Dabɛhyɛte, yɛɛ azule ne mɔɔ la Dwɔkenɛyam la anloa.

¹²Sɛlede foa ko nehane noko ɛweɛne ne fa aduduleɛ kɔdwu Keselo Teebɔ ɛweɛne zo, ɔkɔ Dabɛla na ɔdwu Gyafaya.

¹³Ɔvi ɛke ɔfa aduduleɛ ɔkɔ Gate Hifɛ nee Ɛtekeezen, ɔbele ɔkɔ Nia afoa nu, ɔdwu Relemɔn.

¹⁴Ye sɔlɔ ɛweɛne ne noko fa Hanatɔn na ɔkɔwie Yefetahɛle Bɔnza.

¹⁵Azua ɛhye mɔ a wɔ zolɛ a: Kata, Nahalale, Hyemelɔn, Yedala, yɛɛ Bɛtelɛhɛm. Bɛ muala bɛle azuamgbole bulu nee nwiɔ, yɛɛ namunamu mɔɔ zuozua bɛ la.

¹⁶Azuamgbole ɛhye mɔ nee azua ne mɔ wɔ azɛlɛ ne mɔɔ Zɛbulɛn abusua ekpunli ne nyianle yɛle bɛ ɛdeɛ la azo.

¹⁷Azɛlɛ ne mɔɔ tɔ zolɛ nna la hɔle Yesakaa abusua ekpunli ne ɛkɛ.

¹⁸Ye tɛtɛlɛ vale azua ɛhye mɔ: Gyɛzɛli, Kɛsɛlo, Hyunɛm,

¹⁹Hafalaem, Hyayɔn, Aneehalate,

²⁰Relabete, Kehyeɔn, Yibɛze,

²¹Relɛmɛte, Ɛnganem, Ɛnhada, yɛɛ Bɛtepazɛɛze.

²²Ɛweɛne ne eza dwu Teebɔ, Hyeehazuma, yɛɛ Bɛte Hyimɛhye, ɔkɔwie Dwɔdan ne anloa. Azuamgbole ne mɔ le bulu nee nsia, yɛɛ namunamu zuozua bɛ.

²³Azuamgbole ɛhye mɔ nee bɛ namunamu mɔɔ zuozua bɛ la wɔ azɛlɛ ne mɔɔ Yesakaa abusua ekpunli ne nyianle la azo.

²⁴Azɛlɛ ne mɔɔ tɔ zolɛ nnu la hɔle Ahya abusua ekpunli ne ɛkɛ.

²⁵Ye kpole vale azua ɛhye mɔ: Hɛlekate, Heelae, Bitɛn, Akehyafe,

²⁶Alam Mɛlɛke, Emade, yɛɛ Mehyale. Ye adɔleɛ ɛweɛne ne dwu Kamɛle nee Hyaehɔ Lebena.

²⁷Ɛweɛne ne lua aduduleɛ wɔ Bɛtedeegɔn, ɔkɔ Zɛbulɛn nee Yefetahɛle Bɔnza, na ɔfa anwuma ɔdwu Bɛtɛmɛke nee Nayeyɛle, ɔfa ye sɔlɔ ɔdwu Keebulu,

²⁸Yibolɔn, Rilihɔbo, Hamɔn, yɛɛ Kana, na ɔwie Saedɛn.

²⁹Ɛweɛne ne akee fa ye wɔ Saedɛn ɛkɛ, ɔbele ɔkɔ Releema, ɔkɔ suakpole Taya mɔɔ bɛlie nwolɛ bane la; akee ɔbele ɔkɔ Hosa na yeahɔwie Mɛdetɛlenia Nyevile ne anloa. Azua ɛhye mɔ wɔ zolɛ: Mahalabe, Akezebe,

³⁰Ɛmma, Efɛke, yɛɛ Rilihɔbo: azuamgbole abulanwiɔ nee nwiɔ, nee namunamu mɔɔ zuozua bɛ la.

³¹Azuamgbole ɛhye mɔ nee bɛ namunamu ne mɔ wɔ azɛlɛ ne mɔɔ Ahya abusua ekpunli ne nyianle la azo.

³²Azɛlɛ ne mɔɔ tɔ zolɛ nsia la hɔle Nafetalae abusua ekpunli ne lɔ.

³³Ye ɛweɛne ne vi Hilɛfe kɔ oku baka kpole bie mɔɔ gyi Zeeyananem la anwo, ɔpɛ nu ɛkɛ ɔdwu Adamaenikɛbe nee Gyamenea, ɔkɔ Leekɛm na yeahɔwie Dwɔdan ne anloa.

³⁴Ɛkɛ ne, ɛweɛne ne bele kɔ adɔleɛ toonwo ɔdwu Azeno Teebɔ, ɔvi ɛkɛ ne ɔkɔ Hɛkɔko, ɔkɔkpula Zɛbulɛn nyiakɛ; Ahya wɔ adɔleɛ, yɛɛ Dwuda wɔ aduduleɛ wɔ Dwɔdan afoa nu.

³⁵Azuamgbole mɔɔ yɛ se mɔɔ bɛlie nwolɛ bane la a le Zedem, Zɛɛ, Hamate, Relakate, Kyenɛlɛte,

³⁶Adama, Releema, Heezɔ,

³⁷Kidɛhye, Ɛdelɛyae, Ɛnheezɔ,

³⁸Yelɔn, Megedalɛle, Hɔlɛm, Bɛtanate, yɛɛ Bɛte Hyimɛhye: azuamgbole bulu nee ngɔnla, yɛɛ namunamu mɔɔ zuozua bɛ la.

³⁹Azuamgbole ɛhye mɔ nee bɛ namunamu ne mɔ wɔ azɛlɛ ne mɔɔ Nafetalae abusua ekpunli ne nyianle la azo.

⁴⁰Azɛlɛ ne mɔɔ tɔ zolɛ nsuu la hɔle Dan abusua ekpunli ne ɛkɛ.

⁴¹Azua ɛhye mɔ rale bɛ azɛlɛ ne azo: Zola, Ɛhyeteeyɔlo, Yɛhyimɛhye,

⁴²Hyeeyalebem, Ayegyalɔn, Yetela,

⁴³Yilɔn, Temena, Ɛkelɔn,

⁴⁴Ɛletɛki, Gebɛtɔn, Beeyalate,

⁴⁵Gyihɛde, Bɛneebilake, Gatelemɔn,

⁴⁶Meegyaakɔn, yɛɛ Relakɔn nee Dwɔpa azɛlɛ ne amuala.

⁴⁷ Mekɛ mɔɔ Danema azɛlɛ ne vile bɛ sa la, bɛdoale Leeyehyema bɛ nee bɛ hɔhonle. Danema vale sua ne, bɛhunle menli ne na bɛvale ɛkɛ ne bɛyɛle bɛ ɛdeɛ. Bɛdɛnlanle ɛkɛ na bɛhakyile sua ne duma Leeyehye ne na bɛvale bɛ nlenya Dan duma bɛdonle sua ne.

⁴⁸Azuamgbole ɛhye mɔ nee bɛ namunamu ne mɔ wɔ azɛlɛ mɔɔ Dan abusua ekpunli ne nyianle ye la azo.

⁴⁹Mɔɔ Yizilayɛma hyɛle bɛ azɛlɛ ne wiele la, bɛmanle Nɛn ara Dwɔhyua azɛlɛ ne bie kɛ ɔva ɔyɛ ye ɛdeɛ.

⁵⁰Kɛmɔ Ɛdɛnkɛma hanle la, bɛvale suakpole mɔɔ ɔdaye ɔbizale la bɛmanle ye. Yemɔ a le Temenate Sila. Ɔwɔ Yifelaem awoka ne mɔ azo. Ɔhyele suakpole ne fofolɛ na ɔdɛnlanle ɛkɛ ne.

⁵¹Sɛlɛvolɛ Ɛlieza nee Nɛn ara Dwɔhyua nee mgbanyinli mɔɔ gyigyi Yizilayɛ mbusua ekpunli ekpunli ne mɔ ati la vale awolɛ guale nzeleba [6] bizale Ɛdɛnkɛma kɛ bɛzi bɛhyɛ azɛlɛ ne la, wɔ Hyaelo. Bɛyɛle ɛhye wɔ Ɛdɛnkɛma Ndanlɛ Sua ne anlenkɛ ne anyunlu bɛhyɛle azɛlɛ ne. Adenle mɔɔ bɛluale nu bɛhyɛle azɛlɛ ne la ɛne.