Read Nzema Dwɔ 2 Bible Online

Dwɔ 2 - Nzema bible

Dwɔ 2

¹ Akee Nɛn ara Dwɔhyua zoanle menli nwiɔ awozinli nu, vi Akasea azokoɛleɛ ne kɛ, “Bɛhɔli busia bɛnleɛnlea kɛ Keena maanle ne anu si de la, bɔbɔ suakpole Gyɛleko.” Menli ne mɔ dwule suakpole ne azo la, bɛhɔlale raalɛ tuutuunli bie mɔɔ bɛfɛlɛ ye Releehabe la sua nu.

²Na awie mɔ hɔhanle hilele Gyɛleko belemgbunli ne kɛ, “Yizilayɛma bie ɛra ɛke nɔsolɛ ye ala kɛ bɛbanleɛnlea maanle ye anu.”

³Yemɔti belemgbunli ne zoanle manle bɛhɔzele Releehabe kɛ, “Menli mɔɔ ɛra wɔ sua nu ɛkɛ ne la ɛra kɛ bɛbali yɛ nwo busia bɛanleɛnlea kɛ yɛ maanle ye anu si de la. Yemɔti fa bɛ bɛla ɛke!”

⁴Releehabe buale bɛ kɛ, “Ɔle nɔhalɛ kɛ menli bie rale me sua nu ɛke, noko menze ɛleka mɔɔ bɛvi la. Bɛziale na sɛnzɛne ne adɔ, kolaa na bɛado suakpole ne anlenkɛ kpole ne anu. Meambiza bɛ ɛleka mɔɔ bɛkɔ la; bɛhɔle la ɛtɛkyɛle. Saa bɛkpo bɛ a, bɛbahɔdo bɛ adenle nu.” (Mekɛ ne anu ɛnee Releehabe ɛva menli nwiɔ ne ɛhɔvea ye sua ne ati zo anwuma na yevula bolɔfodɔ nzoleɛ yegua bɛ nwo zo.)

⁷Menli mɔɔ belemgbunli ne zoanle bɛ la kpole Yizilayɛma nwiɔ ne, na bɛvi suakpole ne azo bɛvindele ala la yɛɛ bɛdole suakpole ne anuhɔlɛ kpole ne anlenkɛ ne anu a. Bɛkpondɛle Yizilayɛma nwiɔ ne dedee bɛdwule ɛleka mɔɔ bɛpɛ Azule Dwɔdan ne la. (Ɛke azule ne ɛnle kuma; menli kola wudwu pɛ.)

⁸Nɔe ne mɔɔ Yizilayɛma nwiɔ ne kagua adile aze la, Releehabe vole doale bɛ

⁹na ɔzele bɛ kɛ, “Meze kɛ Ɛdɛnkɛma ɛva azɛlɛ ye ɛmaa bɛ. Awie biala mɔɔ wɔ yɛ maanle ye anu la sulo bɛ, yɛɛ menli te bɛ nganeɛ a ɛnee ɛzulolɛ ɛha bɛ.

¹⁰ Yɛde kɛ Ɛdɛnkɛma zile manle Nyevile kɔkɔlɛ [1] ne sesanle bɔkɔɔ manle bɛpɛle ye wɔ mekɛ mɔɔ bɛvi Yigyibiti bɛlɛba la. Eza yɛde kɛ bɛzile bɛhunle Amɔle arelemgbunli nwiɔ ne, Saehɔn nee Ɔɔgo, wɔ Dwɔdan aduduleɛ lɔ la.

¹¹Yɛdele la yɛzulole kpole, na ɔlua bɛmɛ bɛ ti, anwosesebɛ biala mɔɔ yɛlɛ la ɛwie. Ɔluakɛ Ɛdɛnkɛma bɛ Nyamenle ne a le Nyamenle wɔ anwuma lɔ nee azɛlɛ ye azo a.

¹²Zɔhane ati bɛha Ɛdɛnkɛma kɛ boɛ mɔɔ meyɛ memaa bɛ la, bɛkɛmaa me nee egya sua nu amra yɛ nwo kɛdɔ yɛ, na bɛhile me sɛkɛlɛneɛ mɔɔ bamaa mealie bɛ meali la.

¹³Bɛbɔ me ɛwɔkɛ kɛ bɛkɛlie egya nee ɔmɔ, me mediema mrenya nee mraalɛ, nee bɛ nwo amra amuala ngoane na bɛnrɛhu bɛ.”

¹⁴Yizilayɛma nwiɔ ne zele ye kɛ, “Mɔɔ kɛhu wɔ la ɛhu yɛ! Mɔɔ yɛrayɛ la, saa wɔanga wɔangile awie biala a, yɛbɔ ɛwɔkɛ kɛ, saa Ɛdɛnkɛma fa azɛlɛ ye maa yɛ a, yɛkɛyɛ wɔ boɛ.”

¹⁵Releehabe de sua bie mɔɔ bɛzi ye wɔ suakpole ne bane ne anu la anu, yemɔti ɔvale samgbe nyɛma ɔzɔle bɛ na ɔvale bɛ ɔluale sua ne nvɛnzɛlɛ ne anu ɔdwulale bɛ aze wɔ suakpole ne bane ne anzi lɔ. Ɔzele bɛ kɛ,

¹⁶“Bɛhɔ awoka ne mɔ azo lɔ na belemgbunli ne soanvolɛma ne nee bɛ anyia adenle nu. Bɛvea ɛkɛ ne kenle nsa bɛmaa sonvolɛma ne ɛzia ɛrɛla sua zo. Kenle nsa ne anzi, bɛkola bɛkɔ bɛ ɛleka bie.”

¹⁷Yizilayɛma nwiɔ ne zele raalɛ ne kɛ, “Ɛwɔkɛ ne mɔɔ wɔmaa yɛbɔ la yɛbali zolɛ.

¹⁸Mɔɔ ɔwɔ kɛ ɛyɛ la ɛne: Mekɛ mɔɔ yɛkɛva bɛ azɛlɛ ye la, fa nyɛma kɔkɔlɛ ɛhye kenda nvɛnzɛlɛ ne mɔɔ ɛvale yɛ ɛluale nu ɛdwulale yɛ aze la. Boɔboa ɛ ze, ɛ nli, ɛ mediema mrenya ne mɔ, yɛɛ ɛ ze anwo amra ne mɔ amuala anloa wɔ wɔ sua nu ɛke.

¹⁹Mɔɔ kɛye ɔ nwo wɔ sua nu ɛke kɛvinde la, ye mogya ɛgua ɔdaye ɔ ti zo; yɛnli nwolɛ ɛzonle. Na saa awie biala mɔɔ nee wɔ wɔ ɛke la anwo bu ɛbonle a, ye mogya ɛgua yɛ ti zo.

²⁰Saa ɛka mɔɔ yɛrayɛ la noko ɛkile awie a, yemɔ ɛnee yɛnli ndane ne mɔɔ wɔmaa yɛha la anwo fɔlɛ kɛ yɛanli zolɛ a.”

²¹Releehabe zele kɛ, “Edwɛkɛ mɔɔ bɛha la ɛyɛ zɔhane”, na ɔmanle bɛhɔle. Mɔɔ bɛhɔle la, ɔvale nyɛma kɔkɔlɛ ne ɔhendanle nvɛnzɛlɛ ne.

²²Yizilayɛma nwiɔ ne hɔle awoka ne mɔ azo hɔveale lɔ kenle nsa. Belemgbunli ne menli mɔɔ ɔzoanle bɛ la wolowolole ahodoka mɔɔ wɔ ɛleka biala la anu dedee kenle nsa, na bɛannwu Yizilayɛma nwiɔ ne. Yemɔti bɛziale bɛrale Gyɛleko.

²³Menli nwiɔ ne akee vi awoka ne mɔ azo ziale rapɛle Azule Dwɔdan ne na bɛziale bɛhɔle Nɛn ara Dwɔhyua anwo lɔ. Bɛhanle mɔɔ zile la amuala bɛhilele ye,

²⁴na bɛzele Dwɔhyua kɛ, “Yɛdie yɛdi bɔkɔɔ kɛ Ɛdɛnkɛma ɛva maanle ne amuala ɛmaa yɛ; menli mɔɔ wɔ maanle ne anu la amuala ɛzulo yɛ.”