Read Nzema Dwɔ 22 Bible Online

Dwɔ 22 - Nzema bible

Dwɔ 22

¹Akee Dwɔhyua vɛlɛle Wulubɛn, Gaade, yɛɛ Manasɛ Aduduleɛ mbusua ekpunli ne mɔ manle bɛyiale.

²Ɔzele bɛ kɛ, “Bɛyɛ ninyɛne mɔɔ Ɛdɛnkɛma sonvolɛ Mosisi hanle kɛ bɛyɛ la amuala bɛwie, eza bɛdie me nloa edwɛkɛ bɔkɔɔ.

³Mekɛ ɛhye amuala, kenle ko bɔbɔ ɛnle ɛkɛ mɔɔ bɛhakyile bɛ nzi bɛzile bɛ mediema Yizilayɛma a. Bɛli Ɛdɛnkɛma, bɛ Nyamenle ne edwɛkɛ zo.

⁴Kɛkala, Ɛdɛnkɛma bɛ Nyamenle ne ɛmaa Yizilayɛma anzo nu ɛdwo bɛ, kɛmɔ ye ɛwɔkɛ ne se la. Yemɔti bɛhɔ sua nu, wɔ azɛlɛ ne mɔɔ bɛ sa ɛha ye la azo, wɔ Dwɔdan aduduleɛ lɔ. Ɛdɛnkɛma sonvolɛ Mosisi a vale manle bɛ a.

⁵Bɛnlea boɛ na bɛli mɛla ne mɔɔ Mosisi ɛva ɛmaa bɛ la azo. Bɛhulo Ɛdɛnkɛma bɛ Nyamenle ne, bɛyɛ ye ɛhulolɛdeɛ, bɛli ye mɛla ne mɔ azo, bɛli nɔhalɛ bɛmaa ye, na bɛva bɛ ahonle nee bɛ ɛkɛla muala bɛzulo ye.”

⁶Dwɔhyua yilale bɛ na ɔvale ɔzɔle zolɛ kɛ, “Bɛlɛ anwonyia dɔɔnwo a bɛlɛsia bɛahɔ bɛ nzi a: nyɛmoa, dwɛtɛ fufule, ezukoa nvutuke, kɔbele, bulalɛ, yɛɛ adɛladeɛ dɔɔnwo. Ɛhye mɔ le ninyɛne mɔɔ bɛnyianle bɛ wɔ bɛ kpɔvolɛma ne ɛkɛ a. Bɛ nee bɛ mediema ne mɔ ɛhyɛ mɔɔ bɛnyia ye la.” Akee ɔmanle bɛ adenle ɔmanle bɛhɔle. Mosisi vale Dwɔdan aduduleɛ azɛlɛ ne bie manle Manasɛ abusua ekpunli ne foa ko yɛɛ foa ko ne mɔɔ hale la, Dwɔhyua ɛmaa bɛ nee mbusua ekpunli ekpunli mɔɔ hale la azɛlɛ wɔ Dwɔdan adɔleɛ.

⁹Yemɔti Wulubɛn, Gaade, yɛɛ Manasɛ Aduduleɛ mbusua ekpunli ne mɔ ziale hɔle bɛ maanle nu. Bɛgyakyile Yizilayɛma mɔɔ hale la wɔ Hyaelo, wɔ Keena azɛlɛ zo, na bɛbɔle ɔ bo kɛ bɛkɔ bɛdabɛ bɛ maanle nu wɔ Geleade. Azɛlɛ ɛhye a Ɛdɛnkɛma luale Mosisi anwo zo vale manle bɛ a.

¹⁰Mekɛ mɔɔ Wulubɛn, Gaade, yɛɛ Manasɛ Aduduleɛ amra dwule Gɛlaelo, mɔɔ ɛnee bɛtɛbɔ Dwɔdan adɔleɛ afoa nu la, bɛzile azukponle kpole kɛnlɛma ko wɔ azule ne anloa.

¹¹Awie hɔhanle hilele Yizilayɛma mɔɔ hale la kɛ, “Bɛdie, Wulubɛnema, Gaadema, nee Manasɛ Aduduleɛ amra ɛzi azukponle bie wɔ Gɛlaelo, mɔɔ nee Keena anye bɔ zolɛ la wɔ Dwɔdan adɔleɛ nehae.”

¹²Mɔɔ Yizilayɛma ne dele ɛhye la, bɛ muala bɛyiale Hyaelo na bɛyɛle kɛ bɛ nee aduduleɛ mbusua ekpunli ekpunli ne mɔ kaho.

¹³Yizilayɛma zoanle sɛlɛvolɛ Ɛlieza ara Fenɛhaze wɔ Wulubɛn, Gaade, yɛɛ Manasɛ Aduduleɛ mbusua ne mɔ anwo ɛkɛ wɔ Geleade.

¹⁴Mgbanyinli bulu a nee Fenɛhaze hɔle a, abusua ekpunli ko biala anu sonla ko, yɛɛ yemɔ a ɔle abusua ne kpanyinli a.

¹⁵Bɛrale Wulubɛn, Gaade, yɛɛ Manasɛ Aduduleɛ mbusua ekpunli ne mɔ ɛkɛ wɔ Geleade maanzinli nu.

¹⁶ Bɛgyinlanle Ɛdɛnkɛma menli ne mɔ amuala agyakɛ anu bɛbizale bɛ kɛ, “Duzu munzule debie a bɛyɛ bɛtia Yizilayɛ Nyamenle ne la? Saa bɛzi azukponle ɛhye bɛmaa bɛ nwo a ɛnee bɛkpo Ɛdɛnkɛma! Bɛkpo kɛ bɛnrɛdoa ɔ bo zo bieko!

¹⁷ Bɛkakye ɛtane mɔɔ yɛyɛle wɔ Piyɔ la. Mekɛ ne anu Ɛdɛnkɛma vale ewule nzane a deanle ɔdaye ye menli ne a. Ɛnɛ nee ɛnɛ ala yɛtɛnwu nwolɛ amaneɛ. Ɛtane zɔhane, yɛyɛ bie yɛvɛ!

¹⁸Yemɔti ɛnɛ noko eza bɛkpo kɛ bɛnrɛdoa ye ɔ? Saa bɛkpo Ɛdɛnkɛma ɛnɛ a, ɛhyema ɔbava Yizilayɛnli biala anwo ɛya.

¹⁹Saa bɛnea na bɛ azɛlɛ ne ɛnle ɛleka mɔɔ bɛtɛnla bɛsonle Nyamenle a, ɛnee bɛrɛla Ɛdɛnkɛma azɛlɛ ye azo, ɛleka mɔɔ ye Ndanlɛ Sua ne wɔ la na bɛralie yɛ azɛlɛ ne bie. Bɛmmasi azukponle bɛboka Ɛdɛnkɛma yɛ Nyamenle ne ɛdeɛ ne anwo. Bɛmmako bɛtia Ɛdɛnkɛma yɛɛ bɛmmamaa yɛte atua.

²⁰ Bɛhakye Zila ara Ekan. Yeanli mɛla ne mɔɔ fane ninyɛne mɔɔ ɔwɔ kɛ bɛsɛkye bɛ la azo la, ɔmanle Yizilayɛma amuala nyianle nwolɛ ndeanlɛ. Tɛ Ekan angome a wule wɔ ye ɛtane ne mɔɔ ɔyɛle la ati a.”

²¹Wulubɛn nee Gaade nee Manasɛ Aduduleɛ amra buale mbusua mgbanyinli mɔɔ vi adɔleɛ rale la kɛ,

²²“Tumivolɛ Kokye ne ala a le Nyamenle a! Yemɔ a ɔle Ɛdɛnkɛma a! Tumivolɛ Kokye ne ala a le Nyamenle a! Yemɔ a ɔle Ɛdɛnkɛma a! Ɔze deɛ mɔɔ yemɔti yɛyɛle ɛhye la, na yɛmaa bɛdabɛ noko bɛanwu ye! Saa yɛanli nɔhalɛ yɛammaa Ɛdɛnkɛma na yɛhakyi yɛ nzi yɛzi ye, yɛde ɔ nwo atua a, ɛnee bɛhu yɛ!

²³Saa yɛdule Ɛdɛnkɛma anloa yɛdole yɛɛ yɛzi yɛdayɛ yɛ ti anwo azukponle mɔɔ yɛyela azubɔdeɛ wɔ zolɛ anzɛɛ yɛfa yɛabɔ aleɛ ɛnyianlɛ anzɛɛ agɔnwolɛyɛlɛ azu a, ɛnee Ɛdɛnkɛma ɔdaye ɔdua yɛ kakɛ.

²⁴Ɔnle zɔhane! Yɛyɛle, ɔboalekɛ yɛsulo kɛ kenle bie bɛ bo zo amra baze yɛ bo zo amra kɛ, ‘Duzu a wɔ bɛ nee Ɛdɛnkɛma avinli a?

²⁵Ɔvale Dwɔdan ɔyɛle ɛweɛne ɔdole yɛ nee bɛmɛ Wulubɛn nee Gaade amra avinli. Bɛ nee Ɛdɛnkɛma ɛnlɛ ngitanwolilɛ biala.’ Ɛnee akee wɔannea a bɛ bo zo amra bamaa yɛmɛ yɛ bo zo amra ne mɔ agyakyi Ɛdɛnkɛma ɛzonlenlɛ.

²⁶Yemɔti yɛanzi azukponle ne kɛ yɛyela nane anzɛɛ yɛbɔ azu wɔ zolɛ,

²⁷na yɛyɛle, amaa yeayɛ sɛkɛlɛneɛ yeamaa yɛ menli ne nee bɛ menli ɛdeɛ ne, nee awolɛndoazo mɔɔ bara la kɛ, nɔhalɛ nu, yɛfa yɛ azubɔdeɛ yɛkɔ yɛmaa bɛyela bɛ na yɛbɔ azu, yɛɛ yɛfa yɛ mediemayɛlɛ azubɔdeɛ yɛkɔsonle Ɛdɛnkɛma wɔ ye Ndanlɛ Sua Nwuanzanwuanza ne anyunlu. Ɛhye ɛnrɛmaa bɛ bo zo amra ne ɛnrɛha kɛ yɛ nee Ɛdɛnkɛma ɛnlɛ ngitanwolilɛ.

²⁸Yɛ adwenle a le kɛ, saa ɔba ye zɔhane a, yɛ nwo amra ne kɛhola kɛha kɛ, ‘Bɛnlea! Yɛ nlenya mɔ zile azukponle mɔɔ le kɛ Ɛdɛnkɛma ɛdeɛ ne la. Bɛanzi ye kɛ bɛfa bɛayela ɛyelalɛ azubɔdeɛ anzɛɛ bɛfa bɛabɔ azu, na ɔle sɛkɛlɛneɛ ɔmaa yɛ menli ne nee bɛ menli ɛdeɛ ne.’

²⁹Nɔhalɛ, yɛnrɛhola yɛnrɛzi azukponle kɛ yɛfa yɛayela ninyɛne wɔ zolɛ yɛabɔ azu anzɛɛ yɛabɔ aleɛnyianlɛ anzɛɛ agɔnwolɛyɛlɛ azu na yɛakpo Ɛdɛnkɛma anzɛɛ yɛagyakyi ye ɛdoalɛ. Yɛnrɛzi azukponle gyɛne biala yɛnrɛmaa Ɛdɛnkɛma yɛ Nyamenle ne, kyesɛ mɔɔ gyi Ɛzonlenlɛ Ndanlɛ Sua ne anyunlu la ala.”

³⁰Sɛlɛvolɛ Fenɛhaze nee mbusua mgbanyinli ne dele mɔɔ Wulubɛn, Gaade, yɛɛ Manasɛ Aduduleɛ amra hanle la, akee bɛ kunlu dwole.

³¹Fenɛhaze zele bɛ kɛ, “Kɛkala, yɛnwu kɛ Ɛdɛnkɛma nee yɛ a lua a. Bɛtɛkpole ye, bɛlie Yizilayɛma ngoane, bɛammaa Ɛdɛnkɛma andea yɛ.”

³²Akee Fenɛhaze nee mbusua mgbanyinli ne mɔ vile bɛ mediema Wulubɛn nee Gaade amra anwo ɛkɛ ne wɔ Geleade na bɛhɔle Keena; bɛhɔdole Yizilayɛma mɔɔ ɛha la na bɛbɔle bɛ amaneɛ bɛhilele bɛ.

³³Yizilayɛma ne akunlu dwole na bɛyele Nyamenle ayɛlɛ. Bɛanli konle nwo adwelie bieko kɛ bɛkɔ bɛahɔzɛkye azɛlɛ ne mɔɔ Wulubɛn nee Gaade amra de zolɛ la.

³⁴Wulubɛn nee Gaade amra zele kɛ, “Azukponle ɛhye le daselɛ maa yɛ muala kɛ Ɛdɛnkɛma ala a le Nyamenle a.” Yemɔti bɛvɛlɛle ye “Daselɛ.”