Read Nzema Dwɔ 5 Bible Online

Dwɔ 5 - Nzema bible

Dwɔ 5

¹Mɔɔ Amɔle arelemgbunli mɔɔ wɔ Dwɔdan adɔleɛ nee Keena arelemgbunli mɔɔ wɔ Mɛdetɛlenia Nyevile ne anloa lɔ la dele kɛ Ɛdɛnkɛma ɛmaa Azule Dwɔdan ne ɛsesa na yeye azɛlɛ resee yemaa Yizilayɛma ɛpɛ la, bɛ ahonle dule. Yizilayɛma ati, bɛ nwo mɔra dule bɔkɔɔ.

²Akee Ɛdɛnkɛma zele Dwɔhyua kɛ, “Fa ɛtwɛlɛboɔ yɛ dadeɛ ngyikyi dɔɔnwo na fa yɛ Yizilayɛma mrenyanu nzonlɛ.”

³Zɔhane ati Dwɔhyua yɛle ɛtwɛlɛboɔ dadeɛ ngyikyi dɔɔnwo na ɔmanle bɛyɛle Yizilayɛma mrenyanu nzonlɛ wɔ boka bie mɔɔ bɛfɛlɛ ye “Mrenyanu Nzonlɛyɛlɛ Boka” la azo.

⁴ Mekɛ mɔɔ Yizilayɛma tu bɛ bo avi Yigyibiti la, ɛnee mrenya mɔɔ wɔ nu la amuala ɛyɛ bɛ mrenyanu nzonlɛ. Na ngakula mɔɔ bɛwole bɛ wɔ ɛvolɛ abulanla ne mɔɔ bɛvale bɛpɛle ɛsɛlɛ ne la anu la bɛmɛ, bɛanyɛ biala mrenyanu nzonlɛ. Eza mrenya mɔɔ kola ko wɔ mekɛ mɔɔ bɛvile Yigyibiti la amuala ɛwie wu, ɔboalekɛ bɛandie Ɛdɛnkɛma ane. Menli zɔhane mɔ a Ɛdɛnkɛma vuale kɛ ɔnrɛmaa bɛnrɛnwu azɛlɛ ne mɔɔ le kɛnlɛma na ɔkye aleɛ mɔɔ ɔvale ɔbɔle bɛ nlenya mɔ ɛwɔkɛ la.

⁷Menli ɛhye mɔ amra mrenya a bɛtɛyɛle bɛ mrenyanu nzonlɛ la, na awolɛndoazo fofolɛ ɛhye yɛɛ Dwɔhyua manle bɛyɛle bɛ mrenyanu nzonlɛ a.

⁸Mrenyanu nzonlɛyɛlɛ ne wiele la, Yizilayɛma amuala dɛnlanle bɛ azokoɛleɛ ɛkɛ ne toonwo bɛ nganlɛ ne mɔ amuala hɔle.

⁹Ɛdɛnkɛma zele Dwɔhyua kɛ, “Ɛnɛ kenle ye, nyiane ne mɔɔ kile kɛ bɛle ngɛkɛlɛ wɔ Yigyibiti azɛlɛ zo la, meye mevi ɛkɛ.” Yemɔti bɛvɛlɛle ɛkɛ ne Gelegale, duma ne tɛbɔ ɛkɛ ne kɛkala.

¹⁰ Mɔɔ ɛnee bɛtɛbɔ Gelegale azokoɛleɛ ɛkɛ ne la, Yizilayɛma lile “Akpabɛnwo Ɛvoyia” ne wɔ fienemgbole ne mɔɔ bikye Gyɛleko la anu. Bɛlile ɛvoyia ne wɔ siane ne anu kenle bulu nee nna ne azo nɔsolɛ nu.

¹¹Bɛwiele ɛvoyia ne di la, ye alehyenlɛ nu yɛɛ bɛlile aleɛ mɔɔ bɛlua ye Keena azɛlɛ zo la bie a. Aleɛ ne bie a le abɛlɛ ngyehye nee kpanwo mɔɔ mgbɔvonle ɛnle nu la.

¹² Mana ne andɔ bieko, yemɔti Yizilayɛma ne annyia bieko. Ɔvi mekɛ zɔhane bɛlile aleɛ mɔɔ bɛlua ye wɔ Keena azɛlɛ zo la bie.

¹³Mɔɔ Dwɔhyua bikyele Gyɛleko la, arɛlevilɛ nu ala ɔnwunle nrenya ko kɛ ɔlɛ konle dadeɛ ɔ sa nu ɔgyi ɔ nyunlu ɛkɛ ne. Dwɔhyua hɔle ɔ nwo ɛkɛ ne na ɔbizale ye kɛ, “Ɛboka yɛ nwo anzɛɛ ɛle kpɔvolɛ?”

¹⁴Nrenya ne buale kɛ, “Kyɛkyɛ, menle kpɔvolɛ. Mera kɛ mele Ɛdɛnkɛma ɛlɔnema ne Safohyenle Kpanyinli.” Dwɔhyua dule dɔle ɔ nyunlu zonlenle ye na ɔbizale ye kɛ, “Yɛmenle, mele wɔ akɛlɛ, duzu a ɛkpondɛ kɛ meyɛ a?”

¹⁵Na Ɛdɛnkɛma ɛlɔnema Safohyenle Kpanyinli ne zele Dwɔhyua kɛ, “Yeye wɔ mgbɔlaboa ne; azɛlɛ ne mɔɔ ɛgyi zolɛ la le nwuanzanwuanza.” Na Dwɔhyua yɛle mɔɔ ɔzele ye la.