Read Nzema Dwɔ 6 Bible Online

Dwɔ 6 - Nzema bible

Dwɔ 6

¹Yizilayɛma ati, Gyɛleko amra totole bɛ sua bɔdenle ne anuhɔlɛ ne mɔ anu. Awie vi sua ne azo ɛnvinde yɛɛ bie ɛmba sua ne azo.

²Ɛdɛnkɛma zele Dwɔhyua kɛ, “Nea, meye Gyɛleko memaa wɔ. Sua ne azo belemgbunli ne nee ye ɛlɔnema mɔɔ anwo yɛ se la amuala wɔ ɛ bo.

³Ɛbava wɔ ɛlɔnema ne mɔ wɔadia kilikili wɔabɔ suakpole ne mgbɔlɔka wɔayia kenle ko biala. Bɛbayɛ ɛhye toonwo kenle nsia.

⁴Ɛbamaa sɛlɛvolɛma nsuu ava mboane mɛne nsuu ayɛ aweɛne na bɛali Ngyekyeleɛ Ɛlɛka ne anyunlu. Kenle ne mɔɔ tɔ zolɛ nsuu la, ɛ nee wɔ ɛlɔnema ne bɛdia kilikili bɛbɔ sua bɔdenle ne mgbɔlɔka fane nsuu. Mekɛ ɛhye amuala ɛnee sɛlɛvolɛma ne ɛlɛwu bɛ aweɛne ne mɔ anu.

⁵Akee bɛbabɔ bɛ aweɛne ne mɔ tendenle ko. Saa bɛte ɛhye ala a, awie biala ɛdea nu kpole kpalɛ ko, na suakpole ne bane ne mɔ bade agua aze gɔɔ; na ɛlɔnema ne ko biala ɛva ɔ nyunlu fɔɔnwo ɛhɔ sua ne azo.”

⁶Nɛn ara Dwɔhyua vɛlɛle sɛlɛvolɛma ne na ɔzele bɛ kɛ, “Bɛva Ngyekyeleɛ Ɛlɛka ne na bɛ nuhua nsuu ɛva mɛne aweɛne ne mɔ na bɛhɔli Ɛdɛnkɛma Ngyekyeleɛ Ɛlɛka ne anyunlu.”

⁷Akee ɔzele menli ne amuala kɛ, “Bɛhɔ! Bɛdia kilikili bɛbɔ suakpole ye mgbɔlɔka bɛyia. Bɛdabɛ mɔɔ bɛdedɛ konle ninyɛne la ɛpɛ ɛli Ɛdɛnkɛma Ngyekyeleɛ Ɛlɛka ne anyunlu.”

⁸Yemɔti, kɛmɔ Dwɔhyua hanle ala la, Yizilayɛ ɛlɔnema ne bie mɔ lumuale, sɛlɛvolɛma ne mɔɔ dedɛ mɛne aweɛne ne mɔ la doa bɛ na bɛlɛbɔ bɛ aweɛne ne mɔ; akee sɛlɛvolɛma ne mɔɔ zo Ɛdɛnkɛma Ngyekyeleɛ Ɛlɛka ne la doa zo, yɛɛ ɛlɔnema ne mɔɔ ɛha la li bɛ nzi. Mekɛ ɛhye amuala ɛnee aweɛne ne la zo.

¹⁰Na Dwɔhyua zele menli ne mɔ kɛ bɛmmatea, yɛɛ bɛmmaka edwɛkɛ biala kɔkpula mekɛ mɔɔ ɔkɛha ɔkɛhile bɛ kɛ akee bɛdea nu la na bɛadea nu.

¹¹Yemɔti ɔmanle menli ne mɔ vale Ɛdɛnkɛma Ngyekyeleɛ Ɛlɛka ne bɔle suakpole ne anwo mgbɔlɔka yiale na bɛziale bɛhɔle bɛ azokoɛleɛ ne bɛhɔlale.

¹²Aleɛ hyenle la Dwɔhyua dwazole nwonlomɔ mangyee ne ala, na sɛlɛvolɛma ne nee ɛlɔnema ne mɔ diale kilikili bɔle Gyɛleko sua bɔdenle ne mgbɔlɔka yiale, kɛmɔ bɛyɛle ye wɔ kenle ne mɔɔ lumua la: ɛlɔnema ne ekpunli ko lumua, sɛlɛvolɛma nsuu ne mɔɔ ɛlɛbɔ mɛne aweɛne ne mɔ la doa bɛ, sɛlɛvolɛma ne mɔɔ zo Ɛdɛnkɛma Ngyekyeleɛ Ɛlɛka ne la doa zo, yɛɛ akee ɛlɔnema mɔɔ ɛha la noko bɛdabɛ bɛli bɛ nzi. Mekɛ ɛhye amuala, ɛnee aweɛne ne la zo zɛhae ala.

¹⁴Kenle ɛhye tɔ zolɛ kenle nwiɔ, bɛbɔle suakpole ne mgbɔlɔka bɛyiale na bɛziale bɛhɔle bɛ azokoɛleɛ ne. Bɛyɛle ɛhye toonwo kenle nsia.

¹⁵Kenle nsuu ne azo bɛdwazole aleɛbahye ne na bɛhɔbɔle suakpole ne mgbɔlɔka, kɛmɔ bɛyɛ ye dɛba ne ala la, fane nsuu. Kenle ko ɛhye ala yɛɛ bɛdiale kilikili bɛbɔle suakpole ne mgbɔlɔka fane nsuu a.

¹⁶Fane nsuu ne azo, mɔɔ sɛlɛvolɛma ne wule aweɛne ne mɔ anu la, Dwɔhyua zele menli ne kɛ, “Bɛdea nu, ɔluakɛ Ɛdɛnkɛma ɛva suakpole ye ɛmaa bɛ!

¹⁷Bɛzɛkye suakpole ne nee debie biala mɔɔ wɔ zolɛ la bɔkɔɔ bɛva bɛbɔ azu bɛmaa Ɛdɛnkɛma. Tuutuunli Releehabe nee bɛdabɛ mɔɔ bɛwɔ ye sua nu ɛkɛ ne la ala a bɛgyakyi bɛ a, ɔboalekɛ ɔvale yɛ menli ne mɔɔ yɛzoanle bɛ la ɔveale.

¹⁸Na bɛmɛ, ɔnle kɛ bɛfa debie biala mɔɔ ɔwɔ kɛ bɛsɛkye ye la. Saa bɛfa debie a, bɛkɛmaa munzule kɛra Yizilayɛma anwo zo wɔ bɛ azokoɛleɛ ne.

¹⁹Debie biala mɔɔ bɛva dwɛtɛ fufule, ezukoa nvutuke, kɔbele anzɛɛ bulalɛ bɛyɛ la, bɛva bɛzie ɛkɛ bɛmaa Ɛdɛnkɛma. Bɛva zɔhane ninyɛne ne mɔ bɛhɔgua Ɛdɛnkɛma gya ne anu.”

²⁰Zɔhane ati sɛlɛvolɛma ne bɔle bɛ aweɛne ne mɔ anu. Menli ne dele ala la, bɛdeanle nu kpole ko, ɛnee bane ne mɔɔ bɛhye ye suakpole ne anwo la ɛde ɛgua aze, gɔɔ. Na Yizilayɛ ɛlɔnema ne nyianle adenle hɔle suakpole ne azo na bɛhonle bɛvale.

²¹Bɛhunle awie biala mɔɔ wɔ suakpole ne azo la, mrenya nee mraalɛ, ngakula nee mgbanyinli. Eza bɛhunle nlankɛ, mboane, yɛɛ asoaso muala.

²²Dwɔhyua akee zele menli nwiɔ ne mɔɔ lumuale hɔkpɔlale azɛlɛ ne la kɛ, “Bɛhɔ tuutuunli raalɛ ne sua nu bɛhɔva ye nee ye mbusua ne bɛvinde, kɛmɔ bɛ ɛwɔkɛ ne mɔɔ bɛbɔle ye la se la.”

²³Zɔhane ati mgbavolɛ nwiɔ ne hɔvale Releehabe nee ɔ ze nee ɔ nli, ɔ mediema mrenya nee ɔ nwo amra ne amuala rale. Bɛvale bɛ muala bɛhɔziele ɛleka kpalɛ mɔɔ bikye Yizilayɛma azokoɛleɛ ne la.

²⁴Akee bɛdole senle suakpole ne azo bɛyelale ye boka debie biala mɔɔ wɔ zolɛ la. Ninyɛne mɔɔ bɛva ezukoa nvutuke, dwɛtɛ fufule, kɔbele anzɛɛ bulalɛ bɛyɛ la, bɛvale bɛ muala bɛraguale Ɛdɛnkɛma gya ne anu.

²⁵ Noko Dwɔhyua liele tuutuunli Releehabe nee ye mbusua ne mɔ ngoane, ɔboalekɛ ɔvale Yizilayɛma nwiɔ ne mɔɔ bɛzoanle bɛ Gyɛleko la ɔveale. (Ɛnɛ nee ɛnɛ ala Releehabe abo zo amra tɛbɔ Yizilayɛ azɛlɛ zo.)

²⁶ Mekɛ ne anu Dwɔhyua bɔle kɔkɔ mɔɔ anu yɛ se la kɛ, “Awie ko biala mɔɔ kɛbɔ mɔdenle kɛ ɔkyekye suakpole Gyɛleko bieko la, Ɛdɛnkɛma ɛdua ye kakɛ. Mɔɔ kɛwula suakpole ne abo aze la, ɔ ra nrenya kpanyinli ne ɛwu. Mɔɔ kɛdua suakpole ne anuhɔlɛ mgbole ne mɔ ɛbonle la, ye nrenya kazima ne ɛwu.”

²⁷Na Ɛdɛnkɛma nee Dwɔhyua luale, na ye nganeɛ hɔle maanle ne anu ɛleka biala.