Read Nzema Dwɔ 7 Bible Online

Dwɔ 7 - Nzema bible

Dwɔ 7

¹Ɛdɛnkɛma mɛla ne mɔɔ ɔlile ɔmanle Yizilayɛma kɛ awie biala mmafa ɔ sa ka debie biala mɔɔ ɔwɔ kɛ bɛsɛkye ye wɔ Gyɛleko la, bɛanli zolɛ. Nrenya bie mɔɔ bɛfɛlɛ ye Ekan la donle mɛla ne. Ɛdɛnkɛma vale Yizilayɛma anwo ɛya kpole. (Ekan le Zila angabɛnzo. Ɔ ze a le Kaamae yɛɛ ɔ nlenya a le Zabedae. Ɔbɔ Dwuda abusua ekpunli ne bie.)

²Dwɔhyua zoanle menli bie vi Gyɛleko kɛ bɛhɔ Eyae, sua bie mɔɔ wɔ Bɛtɛle aduduleɛ afoa nu na ɔbikye Bɛteevɛn la kɛ bɛhɔli busia bɛnlea kɛ azɛlɛ ne si de la. Menli ne mɔ hɔle na bɛziale bɛrale.

³Bɛrale la bɛzele Dwɔhyua kɛ, “Ɔngyia kɛ menli ne amuala kɔ kɔfɛ mgbane. Ɔnle sua kpole, eza menli mɔɔ wɔ zolɛ la anzo biala.”

⁴Yemɔti Yizilayɛ ɛlɔnema kɛyɛ apenle nsa ala a hɔle Eyae a, na bɛannyia gyinlagyakɛ. Bɛnriandile bɛvile Eyae.

⁵Eyaema voanle Yizilayɛma vile sua ne anuhɔlɛ kpole ne anloa na bɛvoanle bɛ toonwo bɛhɔdwule Hyɛbalem boka ne azo lɔ, bɛ sa hanle Yizilayɛma anu abulasa nee nsia bɛhunle bɛ wɔ boka ne ndololeɛ nu. Yizilayɛma anwo bubule bɛ na bɛzulole.

⁶Dwɔhyua nee Yizilayɛ mgbanyima ne mɔ tetele bɛ adɛladeɛ ne mɔ bɛvale bɛhilele nyane mɔɔ ɛha bɛ la, na bɛdule bɛguale mutule nu wɔ Ɛdɛnkɛma Ngyekyeleɛ Ɛlɛka ne anyunlu, na bɛguale ɛkɛ ne toonwo nɔsolɛ nu; eza bɛvulale ɛnwea bɛguale bɛ ti zo bɛhilele kɛ bɛlɛdi nyane.

⁷Na Dwɔhyua hanle kɛ, “O, Awulae Nyamenle! Duzu ati yɛɛ wɔva yɛ wɔra azule Dwɔdan ye anzi ɛke, na wɔye yɛ wɔmaa Amɔlema kɛ bɛhu yɛ ɛ? Duzu ati yɛɛ yɛandɛnla Dwɔdan ne anzi lɔ a?

⁸O, Awulae, kɛkala mɔɔ Yizilayɛma ɛnriandi ɛvi bɛ kpɔvolɛma anyunlu la, duzu edwɛkɛ yɛɛ menga a?

⁹Keenama nee awie biala mɔɔ wɔ maanle ye anu la bade yɛ nwo edwɛkɛ. Bɛbarabɔ bɛayia yɛ na bɛabɔ yɛ bo zo bɔkɔɔ! Na duzu yɛɛ ɛkɛyɛ na wɔalie wɔ duma kpole ne wɔazie aze ɛ?”

¹⁰Ɛdɛnkɛma zele Dwɔhyua kɛ, “Dwazo! Duzu ati a ɛla ye mutule nu zɛhae ɛ?

¹¹Yizilayɛma ɛyɛ ɛtane. Bɛdo me mɛla ne mɔɔ menvale memanle bɛ la. Bɛva ninyɛne ne mɔɔ ɔwɔ kɛ bɛsɛkye bɛ la bie. Bɛwuale, bɛbɔle nwolɛ adalɛ na bɛva bɛvea bɛ ninyɛne nu.

¹²Ɛhye ati yɛɛ bɛangola bɛangyinla bɛ kpɔvolɛma anyunlu a. Bɛnriandile, ɔboalekɛ bɛdabɛ mumua ne, ɔwɔ kɛ bɛsɛkye bɛ! Me nee bɛ ɛnrɛlua bieko kyesɛ bɛsɛkye ninyɛne ne mɔɔ bɛzele bɛ kɛ bɛmmafa na bɛandie bɛvale la.

¹³Dwazo! Maa menli ne ɛde bɛ nwo na bɛrɛla me nyunlu ɛke. Bɛziezie bɛ nwo bɛrɛla me nyunlu ɛke ɛhyema, ɔboalekɛ medame, Yizilayɛ Ɛdɛnkɛma Nyamenle ne, melɛ ɛhye meka meahile bɛ: ‘Yizilayɛma, ninyɛne mɔɔ menganle kɛ bɛzɛkye bɛ la bie mɔ vea bɛ nwo ɛkɛ! Bɛnrɛhola bɛ kpɔvolɛma anyunlu gyinla ɛlɛ, kyesɛ bɛminli ninyɛne ɛhye mɔ abo zo.’

¹⁴Zɔhane ati se bɛ kɛ, nwonlomɔ bɛbara ye abusua ekpunli ekpunli. Abusua ekpunli ko mɔɔ menwɔye ye la anu amra bara ye mrɛladane nu. Ɛrɛladane ko mɔɔ menwɔye ye la anu amra bara ye awuke awuke; awuke ko noko mɔɔ menwɔye ye la anu amra bara ye ngoko.

¹⁵Sonla mɔɔ bɛkɛhye ye kɛ ninyɛne ne mɔ bie wɔ ye ɛkɛ ne la, bɛbayela ye nee debie biala mɔɔ ɔlɛ la. Ɔluakɛ yemaa anyiemgba ɛha Yizilayɛma, yɛɛ eza yedo me mɛla ne.”

¹⁶Aleɛ hyenle nwonlomɔ mangyee ne la, Dwɔhyua vale Yizilayɛma ne rale, ɔvale bɛ abusua ekpunli ekpunli ɔvindele Ɛdɛnkɛma anyunlu na bɛyele Dwuda abusua ekpunli ne.

¹⁷Akee ɔmanle abusua ekpunli ne anu amra rale ye mrɛladane nu, na ɔbɔle Zila asa azo ne. Dwɔhyua manle Zila asa azo ne ragyinlanle ye awuke awuke nu, na ɔbɔle Zabedae awuke nu amra.

¹⁸Zabedae vale ye awuke nu amra ne rale ngoko ngoko, na ɔbɔle Ekan, mɔɔ ɔ ze a le Kaamae na ɔ nlenya a le Zabedae la. Kaamae le Zila alɔnra yɛɛ ɔvi Dwuda abusua ekpunli ne anu.

¹⁹Na Dwɔhyua zele ye kɛ, “Me ra nrenya, ka nɔhalɛ ne na fa anyunlunyia maa Ɛdɛnkɛma mɔɔ le Yizilayɛ Nyamenle ne, na ye ye ayɛlɛ; to mɔɔ wɔyɛ la kpaa nu. Ka mɔɔ wɔyɛ la kile me. Mmafa ɛfea me.”

²⁰Ekan buale kɛ, “Nɔhalɛ, meyɛ ɛtane metia Ɛdɛnkɛma mɔɔ le Yizilayɛ Nyamenle ne. Mɔɔ menyɛle la ɛne:

²¹ninyɛne mɔɔ yɛhonle yɛvale la menwunle anwuma tɛladeɛ kɛnlɛma bie mɔɔ bɛyɛle ye wɔ Babelonia la, dwɛtɛ fufule mɔɔ ye ɛnlomboɛ to kɛyɛ tone nu kilo nwiɔ, ezukoa nvutuke kpɔma ko mɔɔ kɛyɛ kilo foa ko la, na me nye bolole bɛ. Yemɔti menvale. Mevu meyɛ me ndanlɛ sua ne abo, na dwɛtɛ fufule ne a li ɔ bo kpalɛ a.”

²²Zɔhane ati Dwɔhyua zoanle menli manle bɛhɔle Ekan ndanlɛ sua ne anu na bɛhɔnwunle ninyɛne ne kɛ yevu yeyɛ, na dwɛtɛ fufule ne li ɔ bo kpalɛ.

²³Bɛvale ninyɛne ne mɔ bɛrale Dwɔhyua nee Yizilayɛma anyunlu, na bɛguale bɛ wɔ Ɛdɛnkɛma anyunlu ɛkɛ ne.

²⁴Dwɔhyua nee Yizilayɛma zɔle Zila angabɛnzo Ekan nu, bɛvale dwɛtɛ fufule ne, tɛladeɛ ne, yɛɛ ezukoa nvutuke ne; akee bɛvale Ekan amra mrenya nee mraalɛ, ye nlankɛ, mboane, asoaso, yɛɛ ndanlɛ sua ne nee debie biala mɔɔ ɔlɛ la bɛhɔle Ngyegyelɛ Bɔnza ne anu.

²⁵Akee Dwɔhyua bizale Ekan kɛ, “Duzu ati a wɔva ngyegyelɛ ɛhye wɔdo yɛ nwo ɛ? Ɛdɛnkɛma bava bie ado ɛ nwo ɛnɛ.” Na Yizilayɛma zile Ekan awolɛ manle ɔwule. Eza bɛzile ye sua nu amra amuala awolɛ bɛhunle bɛ na bɛyelale bɛ nee debie biala mɔɔ bɛlɛ la.

²⁶Bɛhuohuanle awolɛ edukue kpole kpalɛ ɔ nwo zo; ɔtɛbɔ ɛkɛ ne ɛnɛ nee ɛnɛ ala. Yemɔti bɛfɛlɛ ɛkɛ ne Ngyegyelɛ Bɔnza. Na Ɛdɛnkɛma akunlu dwole fɔɔnwo.