Read Nzema 2 Tɛs 2 Bible Online

2 Tɛs 2 - Nzema bible

2 Tɛs 2

¹ Mediema, mɔɔ fane yɛ Awulae Gyisɛse Kelaese ɛralɛ ne nee yɛ nloa mɔɔ bɛbahuohua na yɛ nee ye ahɔyia la anwo, mesɛlɛ bɛ,

²bɛmmamaa bɛ adwenle yɛ bɛ kpomgbondee anzɛɛ bɛmmadi nyane wɔ nwolɛ na bɛdwenle kɛ asɛɛ Awulae Kenle zɔhane ɛraze dɛbadɛba. Ɔkɛyɛ kɛ bekezɛ ɔvindele Sunsum nu edwɛkɛ bie anu anzɛɛ Nyamenle Edwɛkɛ ne nolobɔlɛ nu, anzɛɛ yɛhɛlɛ ye wɔ yɛ ngɛlata mɔɔ yɛva yɛrɛlɛ bɛ la bie anu.

³Bɛmmamaa awie biala bɛlɛbɛla bɛ wɔ adenle biala anu. Ɔluakɛ Kenle ne ɛnrɛra kyesɛ “Atuadelɛ” ɛra zolɛ kpalɛ na mɛladonlɛ ɛhakyi ɔ nwo “Amumuyɛnli” ne mɔɔ bɛbabua ye ewule fɔlɛ la ɛra.

⁴ Saa ɔba a ɔbatia debie biala nee nyamenle biala mɔɔ menli sonle la. Ɔbavo yeagyinlegyinla bɛ bati, yeahɔdɛnla aze wɔ Nyamenle Ɛzonlenlɛ Sua ne anu na yeavɛlɛ ɔ nwo kɛ ɔdaye a ɔle Nyamenle a.

⁵Bɛngakye ɔ? Mɔɔ mewɔ bɛ nwo lɔ la menganle ɛhye mengilele bɛ.

⁶Debie ti yɛɛ kɛkala ɛhye ɛtɛsile a, yɛɛ bɛze deɛ holɛ ko ne noko. Saa mekɛ kpalɛ ne dwu a, Amumuyɛnli[1] ne bara.

⁷Kɛkala, menli somaa ɛlɛyɛ ninyɛndane atia mɔɔ Nyamenle ɛhyehyɛ la, noko mɔɔ bazi la ɛnrɛzi kɔkpula mekɛ mɔɔ bɛkɛye ahenle ne mɔɔ si ye aze la ɛkɛ ne la,

⁸ kolaa na akee Amumuyɛnli ne ara. Na saa Awulae Gyisɛse ba a, ɔbava ɔ nloa anu anwoma mgbane yeahu ye na yeava ɔ nyunlu ɛdalɛ wienyi kpole ne yeazɛkye ye bɔkɔɔ.

⁹ Amumuyɛnli ne bava Seetan tumi a ara a, na yearayɛ adalɛ nwanwane ninyɛne mgbole, yeaye ngonyia,

¹⁰na yeava adalɛ nee amumuyɛ adenle zo yeahwe bɛdabɛ mɔɔ ɔwɔ kɛ bɛminli la. Menli ɛhye mɔ baminli, ɔluakɛ bɛangulo nɔhalɛ ne mɔɔ kɛlie bɛ ngoane la.

¹¹Ɔlua ɛhye ati, Nyamenle bazoa nvonleɛ tumi ne yeamaa yearayɛ gyima wɔ bɛ nu, amaa bɛalie mɔɔ le adalɛ la bɛali.

¹²Ye awieleɛ a le kɛ, bɛbazɛkye bɛdabɛ mɔɔ bɛanlie nɔhalɛ ne bɛanli na bɛ nye die ɛtane nwo la amuala.

¹³Nyamenle kulo bɛ, yemɔti mediema, ɔwɔ kɛ dahuu yɛyɛ Nyamenle mo wɔ bɛ ti. Ɔluakɛ mɔlebɛbo ne ala yɛɛ Nyamenle kpale nu yele bɛ kɛ bɛlie bɛ ngoane a, wɔ bɛ diedi mɔɔ wɔ nɔhalɛ ne anu nee Sunsum ne tumi ne mɔɔ ɛyɛ bɛ Nyamenle menli mɔɔ anwo te la ati.

¹⁴Nyamenle luale Edwɛkpa ne mɔɔ yɛhanle yɛhilele bɛ la azo a vɛlɛle bɛ a, amaa bɛanyia Awulae Gyisɛse Kelaese anyunlunyia ne bie.

¹⁵Yemɔti mediema, bɛgyinla kpundii na bɛzɔ nɔhalɛ ne mɔɔ yɛha nwolɛ edwɛkɛ wɔ yɛ nolobɔlɛ nu nee ngɛlata zo yɛhile bɛ la anu ɛsesebɛ.

¹⁶Yɛ Awulae Gyisɛse Kelaese mumua ne nee yɛ Ze Nyamenle ne, mɔɔ hulole yɛ na ye ɛlolɛ ti yemaa yɛ anwosesebɛ mɔɔ ɛnlɛ awieleɛ nee anyelazo kpalɛ la,

¹⁷ɛmaa bɛ akɛnrasesebɛ na ɔmaa bɛyɛ se, bɛyɛ nla, bɛha na bɛyɛ mɔɔ le kpalɛ la amuala. la amuala.