Read Nzema 1 Tem 6 Bible Online

1 Tem 6 - Nzema bible

1 Tem 6

¹Maa bɛdabɛ mɔɔ bɛle ngɛkɛlɛ la ɛbu bɛ menle mɔ kɛ bɛfɛta enililɛ wɔ adenle biala anu, amaa awie biala annyia edwɛkɛ ɛtane anga wɔ Nyamenle duma ne nee yɛ ngilehilelɛ ne anwo.

²Ahanra mɔɔ bɛ menle mɔ le diedima la mmakpo kɛ bɛnrɛli bɛ menle mɔ eni, kɛmɔ bɛle bɛ mediema la ati. Ɔwɔ kɛ bɛsonle bɛ kpalɛ, ɔboalekɛ bɛ gyimayɛlɛ nwo nvasoɛ ne kɔ diedima mɔɔ bɛkulo bɛ edwɛkɛ la lɔ. Kilehile na bɔ ninyɛne ɛhye mɔ nolo.

³Awie biala mɔɔ kilehile ngilehilelɛ fofolɛ bie na ɔnlie yɛ Awulae Gyisɛse Kelaese nɔhalɛ edwɛkɛ ne nee yɛ nyamenlezonlenlɛ ngilehilelɛ ne ɔndo nu la

⁴memaa ɔ nwo zo ala na ɔnze debie biala. Kpolerazulɛ nee edwɛkɛ kpɔkɛ nwo butulelilɛ ɛyɛ ye subane; na ɛhye noko nee nungunlehwenlɛ, manzonle, aholoba ɛbɔlɛ nee menli nwo adwenle ɛtane ɛvalɛ a lua a.

⁵Eza bɛ nee menli mɔɔ bɛ adwenle ɛzɛkye na nɔhalɛ ne ɛvi bɛ sa la su kpolera dahuu. Bɛ adwenle a le kɛ bɛdua nyamenlezonlenlɛ zo bɛanyia bɛ nwo.

⁶Saa sonla maa ɔ kunlu adwo mɔɔ ɔlɛ la anwo a, anrɛɛ nyamenlezonlenlɛ le anwonyia kpole.

⁷Ɔluakɛ yɛanva ɛhwee yɛamba ewiade ye, yɛɛ yɛnrɛva bie yɛnrɛhɔ.

⁸Ɛhye ati, saa yɛlɛ mɔɔ yɛdi nee mɔɔ yɛkeda la a, bɛmaa yɛ nye ɛzɔ yɛ nwo.

⁹Bɛdabɛ mɔɔ bɛkpondɛ bɛ nwo bɛanyia la tɔ ngyegyelɛ nu, na munzule atiakunluwɔzo mgbane mgbane mɔɔ sɛkye menli, minli bɛ bo zo la kye bɛ wɔ ye ɛhane nu.

¹⁰Ɔluakɛ ezukoa nwo anyebolo le munzule muala abo ndinli; bie mɔ anye ɛbolo ye ɛkpondɛlɛ somaa yemaa bɛvi diedi ne anwo mɔɔ akee nyane ala a bɛdi a.

¹¹Na wɔmɔ, Nyamenle sonla, twe ɛ nwo fi ninyɛne ɛhye mɔ anwo, na pele kpondɛ pɛlepɛlelilɛ, anwondelɛ, diedi, ɛhulolɛ, abotane yɛɛ bɛtɛɛyɛlɛ bo zo.

¹²Bɔ mɔdenle ko diedi nu konle kpalɛ ne na ɛ sa aha ngoane mɔɔ ɛnlɛ awieleɛ la, ɔluakɛ ngoane ɛhye ati yɛɛ Nyamenle vɛlɛle wɔ wɔ mekɛ mɔɔ ɛlale wɔ diedi ne ali wɔ dasevolɛma dɔɔnwo ne anyunlu la a.

¹³Megyi Nyamenle mɔɔ maa ninyɛne kɔsɔɔti ngoane, nee Kelaese Gyisɛse mɔɔ gyinlanle Pɔntɛse Paelɛte anyunlu lile ye diedi nwo daselɛ la anyunlu, meka meahile wɔ kɛ

¹⁴di ngyehyɛlɛ ne azo na maa nwolɛ ɛde bɔkɔɔ ɔhɔkpula Kenle mɔɔ yɛ Awulae Gyisɛse Kelaese kɛra bieko la.

¹⁵Ye ɛralɛ bieko mekɛ kpalɛ ne wɔ Nyamenle Tumivolɛ Saleɛnli Kokye ne mɔɔ le arelemgbunli Belemgbunli nee awulae mɔ Awulae la asa anu.

¹⁶Ɔdaye ala a ɔle damɛnlangoate na ɔde wienyi ne mɔɔ awie ɛngola ɛmbikye ye la anu a. Awie biala ɛtɛnwunle ye ɛlɛ, yɛɛ awie ɛnrɛhola ɛnrɛnwu ye ɛlɛ. Enililɛ nee belemgbunlililɛ mɔɔ ɛmbɔ aze ɛlɛ la le ye ɛdeɛ dahuu! Amen.

¹⁷Tendɛ kile bɛdabɛ mɔɔ bɛlɛ ngoane ɛhye anu anwonyia la kɛ bɛmmamemaa bɛ nwo zo, yɛɛ bɛmmafa bɛ nye bɛto ninyɛne mɔɔ pɛ nu se kɛ anwonyia la azo, bɛmaa bɛ nye ɛla Nyamenle mɔɔ maa yɛ debie biala molozo mɔɔ yɛfa yɛdie yɛ nye la anwo zo.

¹⁸Ɔwɔ kɛ bɛyɛ nyele, bɛkɔ zolɛ bɛyɛ nyɛleɛ kpalɛ, bɛfa atiakunlukɛnlɛma nee ɛhulolɛ bɛkyɛ debie.

¹⁹Ye zɛhae ɛnee bɛlɛkuohua bɛ agyadeɛ nloa mɔɔ bayɛ sua bo ɛdolɛ amaa bɛ wɔ kenle bie, amaa bɛ sa aha ngoane ne mɔɔ le nɔhalɛ ngoane ne la.

²⁰Temɔte, nea mɔɔ bɛva bɛwula ɛ sa nu la boɛ. Twe ɛ nwo fi munzule edwɛkɛ ɛhehanlɛ nee kpolerazulɛ mgbane mgbane ne mɔ mɔɔ bie mɔ fo fɛlɛ ye “Adwenlenubukelɛ” la anwo.

²¹Ɔluakɛ bie mɔ ɛha kɛ bɛlɛ ɛhye na ɔlua ɔ ti bɛminli diedi adenle ne. Nyamenle ɛlo bɛ muala.