Read Nzema 2 Tem 2 Bible Online

2 Tem 2 - Nzema bible

2 Tem 2

¹Me ra, wɔmɔ maa ɛ nwo ɛyɛ se wɔ ɛlolɛ ne mɔɔ Kelaese Gyisɛse ati ɔle yɛ ɛdeɛ la anu.

²Fa ngilehilelɛ ne mɔɔ ɛdele ɛvile me ɛkɛ ne wɔ mekɛ mɔɔ ɛnee melɛkilehile menli dɔɔnwo la wula bɛdabɛ mɔɔ ɛdie bɛ ɛdi kɛ bɛkɛhola ye kilehile la asa anu.

³Ɛdawɔ noko nwu wɔ afoa nu amaneɛ ɛdeɛ, kɛ ɛle Kelaese Gyisɛse sogyanli kpalɛ mɔɔ di nɔhalɛ a.

⁴Sogyanli mɔɔ gyi konle nloa la kpondɛ kɛ ɔsɔ ye safohyenle ne anye. Yemɔti ɔnva ɔ nwo ɔnwulowula maanlema ɛbɛlabɔlɛ nu.

⁵Awie biala mɔɔ su ɛnriandilɛ la ɛngola ɛnnyia ahyɛlɛdeɛ kyesɛ ɔdi nwolɛ mɛla ne mɔ azo.

⁶Ɛyazonlɛnli ne mɔɔ ɛyɛ gyima ɛsesebɛ la yɛɛ ɔwɔ kɛ dumua di avule ne anu aleɛ ne bie a.

⁷Dwenle mɔɔ melɛka la anwo, ɔluakɛ Awulae baboa wɔ yeamaa wɔade ɔ muala abo.

⁸Kakye Gyisɛse Kelaese, kakye ye ewudwazo ne na kakye kɛ ɔle Devidi anlɔnra. Edwɛkpa ne mɔɔ mebɔ ye nolo la ɛne.

⁹Na Edwɛkpa ɛhye ati yɛɛ melɛnwu amaneɛ na bɛgua me nwɔnzɔnwɔnzɔ kɛ asɛɛ medo mɛla bie la. Nyamenle edwɛkɛ ne ɛdeɛ bɛtɛguale ye nwɔnzɔnwɔnzɔ.

¹⁰Ɛhye ati medi debie biala me kunlu wɔ Nyamenle menli ne mɔɔ yekpa nu yeye bɛ la ati, amaa bɛdabɛ noko Kelaese Gyisɛse ati bɛanyia ngoanelielɛ ne nee anyunlunyia ne mɔɔ ɛnlɛ awieleɛ la bie.

¹¹Edwɛkɛ ne le nɔhalɛ, ɔse: “Saa yɛ nee ye ɛwu a, ɛnee yɛ nee ye badɛnla ngoane nu.

¹² Saa yɛgyinla kpundii a, yɛ nee ye bali belemgbunli. Saa yɛkpo ye a, ɔdaye ɔkɛkpo yɛ.

¹³Saa yɛnli nɔhalɛ a, yemɔ, ɔdi nɔhalɛ dahuu. Ɔluakɛ ɔngola ɔmbɛlɛbɛla ɔ nwo.”

¹⁴Kakyehakye wɔ menli ne mɔ wɔ ɛhye anwo, na bɔ bɛ kɔkɔ wɔ Nyamenle anyunlu kɛ bɛmmadi edwɛkɛ agbɔkɛ nwo butule. Ɔnle kpalɛ, yɛɛ ɔsɛkye menli mɔɔ tie la adwenle.

¹⁵Bɔ mɔdenle ɛsesebɛ kɛ ɛkɛzɔ Nyamenle anye, kɛ gyimayɛvolɛ mɔɔ ɛnze ye gyima nwo nyiane na ɔkilehile Nyamenle nɔhalɛ edwɛkɛ ne kpalɛ la.

¹⁶Twe ɛ nwo fi bɛdabɛ mɔɔ bɛsu zɛhae munzule nee koasea kpolera la anwo. Ɛhye te menli fi Nyamenle anwo.

¹⁷Zɛhae ngilehilelɛ le kɛ hanlɛ mɔɔ ɛdidi nwonane ne abo la. Kilehilevolɛma zɛhae anu nwiɔ a le Haemɛneeyɛse nee Faelitɛse;

¹⁸bɛgyakyi nɔhalɛ adenle ne na bɛlɛsɛkye diedima ne mɔ adwenle kɛ ewudwazo mekɛ ne ɛpɛ nu ɛze dɛbadɛba.

¹⁹ Noko adiabo ne mɔɔ Nyamenle ɛwula la gyi kpundii, na bɛhɛlɛ nwolɛ kɛ, “Awulae ze bɛdabɛ mɔɔ bɛle ye ɛdeɛ la,” yɛɛ “Ɔwɔ kɛ awie biala mɔɔ bɔ Awulae duma kɛ ɔle Awulae la twe ɔ nwo fi ɛtane nwo.”

²⁰Wɔ awuke kpole biala anu, nyɛba nee dwora ngakyile dɔɔnwo wɔ ɛkɛ: bie mɔ wɔ nu mɔɔ bɛvale ezukoa nvutuke anzɛɛ dwɛtɛ fufule a bɛyɛle a, yɛɛ bie mɔ noko bɛvale baka anzɛɛ ɛva a bɛyɛle a; bie mɔ anwo hyia kpalɛ yɛɛ bie mɔ noko anwo ɛngyia biala.

²¹Saa awie twe ɔ nwo fi ninyɛne evinli nwo a, ɔkɛyɛ kɛ ɛyɛba mɔɔ anwo hyia na bɛde nwolɛ bɛmaa Nyamenle, na ɔ nwo ɛra nvasoɛ ɛmaa ɔ menle na bɛziezie ye kɛ bɛfa bɛayɛ gyima kpalɛ la.

²²Yemɔti kpo wɔ mgbavolɛ nu atiakunluwɔzo ne mɔ na ɛ nee bɛdabɛ mɔɔ bɛfa ahonle mɔɔ nuhua te bɛfɛlɛ Awulae la ɛpele ɛkpondɛ pɛlepɛlelilɛ, diedi, ɛhulolɛ, nee anzonudwolɛ bo zo.

²³Twe ɛ nwo fi koasea kpolerazulɛ mgbane mgbane ne mɔ anwo, ɔluakɛ ɛze kɛ bɛwie butulelilɛ.

²⁴Ɔnle kɛ Awulae sonvolɛ biala di butule. Ɔwɔ kɛ ɔyɛ atiakunlukɛnlɛma ɔmaa awie biala, na ɔyɛ kilehilevolɛ kpalɛ mɔɔ lɛ abotane a.

²⁵Ɔwɔ kɛ ɔto ɔ rɛle azule nu ɔkilehile bɛdabɛ mɔɔ bɛ nee ye ɛnga la, ɔluakɛ saa ɔyɛ Nyamenle ɛhulolɛ a ɔbamaa bɛ mekɛ kpalɛ yeamaa bɛanlu bɛ nwo na bɛaranwu nɔhalɛ ne.

²⁶Na saa bɛ nye zo tete bɛ a bɛanriandi bɛavi Abɔnsam mɔɔ hyele bɛ manle bɛkpole Nyamenle ɛhulolɛdeɛ ne la ɛhane ne anu.