Read Nzema 2 Tem 4 Bible Online

2 Tem 4 - Nzema bible

2 Tem 4

¹Megyi Nyamenle nee Kelaese Gyisɛse mɔɔ babua anyewɔzo amra nee mɔwuamra ndɛne la anyunlu, meka ye ɛralɛ bieko nee ye belemgbunlililɛ ne na mese wɔ kɛ:

²Bɔ edwɛkɛ ne nolo na si zolɛ mɔɔ ɛndwenle mɔɔ kɛzi ɔ nzi a, kpalɛ o, ɛtane o! Di menli ne adwenle maa bɛlie Edwɛkpa ne bɛdo nu, twi bɛ nyunlu, tu bɛ folɛ na fa abotane kilehile bɛ.

³Mekɛ bie bara mɔɔ menli ɛnrɛdie ngilehilelɛ kpalɛ a. Bɛbali bɛdabɛ bɛ atiakunluwɔzo nzi, na bɛaboɔboa kilehilevolɛma dɔɔnwo mɔɔ kɛha mɔɔ bɛkulo kɛ bɛte la anloa bɛamaa bɛ nwo.

⁴Bɛbaduodua bɛ nzo wɔ nɔhalɛ ne anwo, na bɛadie nwɔra.

⁵Na wɔmɔ, sie ɛ ti koonwu, mia ɛ nye te nyane, kpɔsa bɔ Edwɛkpa ne nolo, na yɛ Nyamenle gyima ne kɛ ɛle sonvolɛ.

⁶Mame, mekɛ ne ɛdwu mɔɔ bɛfa me bɛabɔ azu a, mekɛ mɔɔ mefa meavi ewiade ɛhye anu la ɛbikye.

⁷Meho konle kpalɛ ne, mewie ɛnriandilɛ ne su, meli me ɛwɔkɛ zo.

⁸Na kɛkala konimlilɛ ahyɛlɛdeɛ ne, mɔɔ le fɔɔnwoma abɔtile ne, mɔɔ Awulae, Pɛlepɛle Ndɛnebuavolɛ ne bava amaa me wɔ Awulae Kenle ne la, wɔ ɛkɛ ne maa me, yɛɛ ɔnle ɛkɛ ɔmmaa me ngome, ɔwɔ ɛkɛ ne ɔmaa bɛdabɛ mɔɔ bɛlɛ ɛhulolɛ bɛlɛkendɛ ye ɛralɛ bieko la amuala.

⁹Bɔ mɔdenle bakpɔla me ndɛndɛ.

¹⁰ Dimase ɛhulo kɛkala ewiade ye na yekpo me, yehɔ Tɛsalonaeka. Kelɛsɛnze ɛhɔ Galeehyea, yɛɛ Taetɛse ɛhɔ Dalemeehyea.

¹¹ Yeha Luku angomekye ala wɔ me nwo ɛke. Nea kɛ ɛ sa kɛha Maake na ɛ nee ye bɛrɛla, ɔluakɛ ɔkɛhola ɔkɛboa me.

¹² Mezoa Tekekɛse wɔ Ɛfɛsɛse.

¹³ Saa ɛba a fa me anwuma tɛladeɛ ne mɔɔ mengyakyile ye wɔ Kaapɛse anwo ɛkɛ ne wɔ Tulowase la bɛla; anrɛɛ fa mbuluku ne mɔ noko, bɔbɔ me nwoma mbuluku mralɛ ne mɔ mɔɔ mekɛlɛ nu la bɛla.

¹⁴ Alɛzanda mɔɔ le kɔbele dwinvolɛ ne ɛyɛ me ɛtane kpole, na Awulae badua ye nwolɛ kakɛ noko, kɛmɔ ɔfɛta la.

¹⁵Anrɛɛ nea ɛ nwo boɛ wɔ ɔ nwo, ɔluakɛ ɔtia yɛ edwɛkɛ ne mɔɔ yɛzo yɛlua la kpole.

¹⁶Awie biala angyinla me nzi wɔ alumua ne mɔɔ mekaza me ne wɔ edwɛkɛlilɛ ne anu la. Bɛ muala bɛkpole me. Mesɛlɛ kɛ Nyamenle ɛva ɛhyɛ bɛ.

¹⁷Awulae gyinlanle me nzi, na ɔmanle me anwosesebɛ. Zɔhane ati mengolale membɔle Edwɛkpa ne nolo memanle bɛdabɛ mɔɔ bɛnle Dwuuma la amuala dele bie; na Nyamenle yele me vile awenade ne anloa anu.

¹⁸Na Awulae balie me gyɛlɛɛnye avi munzule muala anu na ɔ nee me ahɔ ye anwuma Belemgbunlililɛ ne abo. Anyunlunyia ɛha ye dahuu! Amen.

¹⁹ Mebiza Pelesela nee Akoyela, yɛɛ Onɛsefɔlɛse awuke nu amra ahye.

²⁰Yilasetɛse hale Kɔlente yɛɛ mengyakyile Tulofemɛse wɔ Maelitɛse, ɔluakɛ ɛnee ɔnde kpɔkɛ.

²¹Bɔ mɔdenle bɛla na fɔsɛlɛ ne ara. Yubulɛse, Pudɛnse, Laenɛse, yɛɛ Kolɔdea nee mediema mɔɔ ɛha la amuala biza wɔ ahye.

²²Awulae nee wɔ sunsum ɛdɛnla. Nyamenle ɛlo bɛ muala.