Read Nzema Hib 1 Bible Online

Hib 1 - Nzema bible

Hib 1

¹Mɔmoane ne, Nyamenle vale ndenle dɔɔnwo azo luale ye kpɔmanvolɛma anwo zo dendɛle hilele yɛ nlenya mɔ wɔ mekɛ dɔɔnwo ne ala,

²na kenle nsa ye ɛdeɛ, yelua ɔ Ra ne anwo zo a yedendɛ yehile yɛ a. Ɔ Ra ne anwo zo a ɔluale ɔbɔle ewiade a, na yemɔ yɛɛ Nyamenle ɛkpa nu ɛye ye kɛ awieleɛ ne debie biala le ye ɛdeɛ a.

³Gyisɛse kile kɛ Nyamenle anyunlunyia ne wienyi kpole si de la. Ɔle Nyamenle ɛsaso bɔkɔɔ, yɛɛ ɔfa ye tumi edwɛkɛ ne a ɔsɔ ewiade a. Ɔliele ɛtanefakyɛ ɔmanle sonla na ɔwiele la, ɔhɔle anwuma ɔhɔdɛnlanle Tumivolɛ Nyamenle Bedevinli ne asa fema zo.

⁴Nyamenle manle Ralɛ ne yɛle kpole dɛlale Nyamenle soanvolɛma amuala, yɛɛ duma mɔɔ ɔvale ɔmanle ye la tɛla bɛ ɛdeɛ ne amuala.

⁵ Ɔluakɛ Nyamenle anga angile ye soanvolɛma ne mɔ bie kɛ, “Ɛle Me Ra; ɛnɛ a mewo wɔ a.” Nyamenle anga wɔ ye soanvolɛma ne bie anwo kɛ, “Mebayɛ ɛ Ze, na wɔayɛ me Ra.”

⁶ Noko mɔɔ Nyamenle bazoa ye belamunli Ralɛ ne wɔ ewiade la, ɔhanle kɛ, “Ɔwɔ kɛ Nyamenle soanvolɛma amuala sonle ye.”

⁷ Wɔ ye soanvolɛma ne anwo, Nyamenle hanle kɛ, “Nyamenle yɛ ye soanvolɛma kɛ anwoma, na ɔyɛ ye sonvolɛma kɛ senle tafinlima.”

⁸ Wɔ Ralɛ ne anwo, Nyamenle hanle kɛ, “O Nyamenle, wɔ belemgbunlililɛ ɛnrɛbɔ aze ɛlɛ! Ɛfa nɔhalɛlilɛ a ɛsie wɔ menli mɔɔ ɛnea bɛ nwo zo la a.

⁹Ɛkulo mɔɔ le fɔɔnwo la na ɛkyi mɔɔ ɛnli mɛla zo la. Ɛhye ati yɛɛ Nyamenle, wɔ Nyamenle ne, ɛkpa nu ɛye wɔ na yemaa wɔ nidi nu anyelielɛ kpole mɔɔ tɛla mɔɔ yeva yemaa ɛ gɔnwo mɔ amuala la a.”

¹⁰ Eza ɔhanle kɛ, “Awulae, wɔmɔ yɛɛ mɔlebɛbo ne ɛbɔle ewiade a, yɛɛ ɛ sa anloa gyima a le anwumaneamra.

¹¹Bɛ muala bɛbaminli, ɛnee wɔmɔ ɛwɔ ɛkɛ; bɛ muala bɛbatete kɛ ɛdanlɛ.

¹²Ɛbanyenya bɛ kɛ ɛkpa, na wɔali bɛ kedayegua kɛ ɛdanlɛ. Na wɔmɔ dahuu kɛ ɛde ala la yɛɛ ɛde a, yɛɛ wɔ ngoane ɛnlɛ awieleɛ.”

¹³ Nyamenle anga angile ye soanvolɛma ne mɔ bie kɛ, “Tɛnla me sa fema zo ɛke kɔkpula kɛ menwɔva wɔ agbɔvolɛ menwɔwula ɛ gyakɛ abo.”

¹⁴Ɛnee Nyamenle soanvolɛma a le nwane mɔ? Bɛmɛ a le sunsum bie mɔ mɔɔ sonle Nyamenle na ɔsoɔzoa bɛ ɔmaa bɛkɔboa bɛdabɛ mɔɔ ɔwɔ kɛ bɛnyia ngoane la.