Read Nzema Hib 11 Bible Online

Hib 11 - Nzema bible

Hib 11

¹Diedi a le kɛ yɛkɛzi pi wɔ ninyɛne mɔɔ yɛ nye la zolɛ la anwo, na yɛkɛlie ninyɛne mɔɔ ɛnyelɛ ɛnnwu bɛ la yɛkɛdo nu kɛ bɛwɔ ɛkɛ.

²Ɔluakɛ bɛ diedi ti yɛɛ mɔmoane amra dɔɔnwo mɔɔ ɛhɔ la zɔle Nyamenle anye a.

³ Ɔlua diedi zo yɛɛ yɛnyia ndelebɛbo kɛ Nyamenle vale ɔ nloa edwɛkɛ ala a bɔle ewiade a, na mɔɔ ɛnɛ yɛnwu ye la vi mɔɔ yɛnnwu ye la anu a rale a.

⁴ Diedi yɛɛ manle Ebulu bɔle azu kpalɛ mɔɔ sɔ ɛnyelɛ la manle Nyamenle dɛlale Keen a. Ɔlua ye diedi ti Ebulu zɔle Nyamenle anye kɛ ɔle sonla tenlene, ɔluakɛ ye ahyɛlɛdeɛ ne zɔle ɔ nye. Ebulu ɛwu bɔbɔ ɛdeɛ, noko kɛkala ɔlua ye diedi zo ɔtendɛ ɔkile yɛ.

⁵ Ɔlua ye diedi ti Yinɔko anwu; bɛvale ye anyewɔzo bɛhɔle anwuma wɔ Nyamenle anwo lɔ. Awie kpondɛle ye a, yeannwu ye, ɔluakɛ Nyamenle ɛva ye ɛhɔ anwuma lɔ. Nyamenle Edwɛkɛ ne kile kɛ Yinɔko zɔle Nyamenle anye kolaa na bɛava ye bɛahɔ.

⁶Ɔyɛ se kɛ awie mɔɔ ɛnlɛ diedi la kɛhola kɛzɔ Nyamenle anye. Ɔluakɛ ɔwɔ kɛ awie mɔɔ ba Nyamenle ɛkɛ ne la die di kɛ Nyamenle wɔ ɛkɛ na ɔyila bɛdabɛ mɔɔ bɛkpondɛ ɔ bo zo la.

⁷ Diedi zo yɛɛ Nowa luale mɔɔ ɔdele Nyamenle kɔkɔbɔlɛ ne mɔɔ fane ninyɛne mɔɔ kenle bie bazi la anwo a. Ɔdiele Nyamenle ane na ɔbobɔle ɛlɛnemgbole ɔvale ɔliele ɔ nwo nee ye sua nu amra ngoane. Ɔluale zɛhae adenle zo ɔbule ewiade ye kɛ ɔle debie mgbane, na ɔ sa hanle Nyamenle nu fɔɔnwoyɛlɛ ne mɔɔ bɛdua diedi zo bɛ sa ka ye la.

⁸ Diedi zo yɛɛ ɔlua mɔɔ Ebileham diele Nyamenle ɛvɛlɛlɛ ne na ɔdule ɔhɔle maanle mɔɔ Nyamenle hilele ye kɛ ɔle ye ɛdeɛ la anu a. Ɔvi ye maanle ne anu ɔdule la, ɛnee ɔdaye mumua ne ɔnze ɛleka mɔɔ ɔlɛkɔ la.

⁹ Ye diedi ti, ɔdɛnlanle maanle ne mɔɔ Nyamenle vale bɔle ye ɛwɔkɛ la anu kɛ ɛyɛvolɛ. Ɔdɛnlanle ndanlɛ sua nu, kɛmɔ Ayezeke nee Gyekɔbo, mɔɔ bɛdabɛ noko bɛboka nwo a Nyamenle bɔle bɛ ɛwɔkɛ ne la yɛle la.

¹⁰Ɔluakɛ ɛnee Ebileham ɛlɛkendɛ Nyamenle ɔdaye ye Suakpole ne mɔɔ yehyehyɛ, yewula ye aze na yekyekye la.

¹¹ Ɔlua diedi zo yɛɛ Sɛla, mɔɔ ɛnee yeyɛ ɛrelera na yebo awolɛ zo bɔbɔ la, nrenzɛle wole a, ɔluakɛ ɔliele ɔlile kɛ Nyamenle mɔɔ bɔle ɛwɔkɛ ne la le nɔhalɛ na ɔkola ɔyɛ.

¹² Yemɔti ɔlua sonla ko mɔɔ le Ebileham, mɔɔ ɛnee ɔle kɛ asɛɛ yewu, noko ɔtɛwole ralɛ ɛlɛ la anwo zo yɛɛ ɛnɛ nlɔnra dɔɔnwo mɔɔ le kɛ anwuma nwɔlɔra nee ɛnweazo anwea la ɛra a.

¹³ Diedi nu yɛɛ menli ɛhye mɔ amuala wule a. Bɛ sa anga ɛwɔkɛ ne mɔ mɔɔ Nyamenle bɔle bɛ la, noko bɛnwunle ye bɛ adwenle nu wɔ moa moa na bɛliele bɛdole nu kɛ bɛle nyɛvolɛ mɔɔ ɛra nlɔnu wɔ azɛlɛ ɛhye azo a.

¹⁴Menli mɔɔ ka zɛhae edwɛkɛ la kile kɛ bɛlɛkpondɛ bɛ sua zo kpalɛ ne.

¹⁵Bɛandwenle maanle ne mɔɔ ɛnee bɛlɛgyakyi ye bɛ nzi bɛahɔ la anwo. Saa bɛdwenlenle nwolɛ a, anrɛɛ bɛziale bɛrale.

¹⁶Ɛleka mɔɔ ɛnee bɛ nwo ɛlɛdɔ ye la a le anwuma maanle kpalɛ ne. Yemɔti noko yeanyɛ Nyamenle nyiane kɛ bɛkɛvɛlɛ ye bɛ Nyamenle, ɔboalekɛ yekyekye suakpole yezie ɛkɛ ne yemaa bɛ.

¹⁷ Diedi a manle Ebileham, mɔɔ ɛnee Nyamenle ɛbɔ ye ɛwɔkɛ la, vale ɔ ra nrenya kokye Ayezeke kɛ ɔfa yeabɔ azu yeamaa Nyamenle wɔ mekɛ mɔɔ Nyamenle zɔle ye nleanle la.

¹⁸ Ɛnee Nyamenle ɛha ɛhile Ebileham kɛ, “Ɔlua Ayezeke anwo zo a ɛbanyia wɔ nlɔnra dɔɔnwo ne, kɛmɔ menvale membɔle wɔ ɛwɔkɛ la a.”

¹⁹Ebileham nyianle adwenle kɛ Nyamenle kola dwazo mɔwuamra fi ewule nu, na amgba noko, Ebileham asa hanle Ayezeke vile ewule nu.

²⁰ Diedi zo yɛɛ ɔlua mɔɔ Ayezeke yileyilale Gyekɔbo nee Yisɔ a.

²¹ Diedi zo yɛɛ ɔlua mɔɔ Ayezeke yileyilale Dwosefi amra ne mɔ kolaa na yeawu a. Mekɛ ne anu ɛnee yeyɛ ɛrelera kondokondo na ɔlɛ kpɔma nu yɛɛ ɔzɛlɛle Nyamenle a.

²² Diedi yɛɛ manle Dwosefi, mekɛ mɔɔ ɛnee ɔla ewule ɛkpa zo la, hanle kɛ Nyamenle baye Yizilayɛma avi Yigyibiti, na ɔhilele kɛ bɛzi bɛyɛ ye mbowule ne mɔ la a.

²³ Diedi zo yɛɛ ɔlua, mɔɔ mekɛ mɔɔ bɛwole Mosisi la, ye awovolɛ vale ye veale toonwo siane nsa a. Bɛnwunle kɛ ɔ nwo yɛ fɛ, ɛhye ati bɛanzulo na bɛbulule belemgbunli ne mɛla ne azo.

²⁴ Diedi zo yɛɛ ɔlua mɔɔ Mosisi dule zo la, ɔkpole kɛ bɛkɛvɛlɛ ye Yigyibiti belemgbunli ne ara raalɛ ne ara a.

²⁵Ɔhulole kɛ ɔ nee Nyamenle menli ne kɛli nyane tɛla kɛ ɔ nye kɛlie ɛtane nwo mekɛ ekyi bie a.

²⁶Ɔdwenlenle nwo kɛ saa sonla doa Kelaese ne abo zo na ɔnwu amaneɛ a, ɔle kpalɛ ɔtɛla kɛ ɔkɛnyia Yigyibiti anwonyia kɔsɔɔti a, ɔluakɛ ɛnee ɔ nye la ahyɛlɛdeɛ mɔɔ kenle bie Nyamenle bava amaa ye la azo.

²⁷Diedi zo yɛɛ ɔlua mɔɔ Mosisi anzulo belemgbunli ne ɛya mɔɔ ɔkɛva la na ɔdule ɔvile Yigyibiti a. Yeanzia ɔ nzi, ɔgyinlanle kpundii kɛ sonla mɔɔ ɛnwu Nyamenle ne mɔɔ bɛnnwu ye la.

²⁸ Diedi zo yɛɛ ɔluale ɔhyehyɛle Akpabɛnwo ne na ɔmanle Yizilayɛma vale mogya kpondenle bɛ nlenkɛ nloa a, amaa saa Nyamenle Ewule Soanvolɛ ne ba a yeangu Yizilayɛma belamunli mralɛ ne mɔ.

²⁹ Diedi zo yɛɛ Yizilayɛma luale mɔɔ bɛpɛle Ndɔ Nyevile ne kɛ asɛɛ bɛlua azɛlɛ resee zo la a; mɔɔ Yigyibitima yɛle kɛ bɛdabɛ noko bɛpɛ la, azule ne vale bɛ.

³⁰ Diedi zo yɛɛ Yizilayɛma luale bɔle suakpole Gyɛleko bane ne mgbɔlɔka dedee kenle nsuu manle ɔgolole ɔguale a.

³¹ Diedi zo yɛɛ ɔlua mɔɔ bɛangu tuutuunli Releehabe kɛ menli anzosesebɛ ne mɔ mɔɔ kpole Nyamenle la a, ɔluakɛ ɔliele Yizilayɛma mɔɔ rale banleɛnlea maanle ne anu na bɛahɔha la azie, na ɔnleanle bɛ gyɛlɛɛnye.

³² Boni bieko a menga a? Ɔluakɛ saa meka kɛ mekɔ zolɛ meaha menli mɔɔ le kɛ Gedɛyɔn, Bɛlake, Samesɛn, Gyɛfeta, Devidi, Samoɛle, yɛɛ Nyamenle kpɔmanvolɛma ne mɔ anwo edwɛkɛ a mekɛ kɛbɔ me. 1 Arl 2.11; 1 Sam 1.1—25.1

³³ Bɛluale diedi zo bɛhonle na bɛlile maanle dɔɔnwo anwo zo konim. Bɛnleanle bɛmanle pɛlepɛlelilɛ yɛle gyima na bɛnyianle Nyamenle ɛwɔkɛ ne mɔ. Bɛluale diedi zo bɛhanle awenade nloa bɛdole nu,

³⁴ bɛnluanle sendɔlɔra, yɛɛ bɛango bɛandɔ. Ɛnee bɛle bɛtɛɛ, noko bɛ nwo yɛle se; bɛ nwo yɛle ɛzulolɛ wɔ konle nu na bɛmanle nyɛvolɛ ɛlɔnema guale ndwɛlɛ aze.

³⁵ Diedi zo yɛɛ ɔlua mɔɔ mraalɛ mɔɔ bɛ mra wule la bɛdwazole bɛ bɛrale ngoane nu a. Bie mɔ noko mɔɔ kpole ewiade ye anu fanwodi biala la, bɛyɛle bɛ asa na bɛwule, amaa Nyamenle adwazo bɛ ahɔ ngoane kpalɛ nu.

³⁶ Bɛzile bie mɔ amgbu, bɛbole bɛ, yɛɛ bɛguale bie mɔ anga na bɛguale bɛ efiade.

³⁷ Bɛzile bie mɔ awolɛ, bɛvale sɛlada bɛkpakyekpakyele bie mɔ anu nwiɔ nwiɔ, [bɛzɔle dɔɔnwo bɛnleanle,] bɛvale dadeɛ bɛpepɛle bie mɔ akɔme. Bɛhedale mboane nee mbɔnkye nwoma, bɛlile ehyia, bɛlile nyane, yɛɛ bɛyɛle bɛ amumuyɛ.

³⁸Ewiade anyɛ fɛ fee ammaa bɛ! Bɛluoluale nuhua kɛ nyɛvolɛ wɔ ɛsɛlɛ nee awoka zo na bɛdɛnlanle awolɛ mbɔne nee adokule nu wɔ azɛlɛ bo.

³⁹Nea duma mɔɔ menli zɛhae mɔ lua diedi zo ɛnyia ye a! Noko bɛannyia mɔɔ Nyamenle ɛva ɛbɔ ɛwɔkɛ la,

⁴⁰ɔboalekɛ Nyamenle ɛbɔ gyinlabelɛ kpalɛ mɔɔ ɔfa yeamaa yɛ la anwo kpɔkɛ. Ye ngyehyɛlɛ ne titile a le kɛ saa yɛboka bɛ nwo a yɛɛ bɛkɛli munli a.