Read Nzema Hib 4 Bible Online

Hib 4 - Nzema bible

Hib 4

¹Kɛkala mɔɔ Nyamenle ɛwɔkɛ ne mɔɔ fane ɛnwomenlelielɛ nwo la tɛbɔ ɛkɛ ne la, bɛmaa yɛnlea boɛ na bɛanze yɛ bie mɔ kɛ bɛdɔ sinli na bɛnrɛdwu ɛnwomenlelielɛ ɛleka ne.

²Ɔluakɛ yɛdayɛ noko yɛde Edwɛkpa ne, kɛmɔ bɛdele la. Bɛdele edwɛkɛ ne, na kɛmɔ bɛanlie bɛanli la ati, yeanyɛ nvasoɛ yeammaa bɛ.

³ Ɛhye ati yɛdayɛ mɔɔ yɛdie yɛdi la angome a banyia ɛnwomenlelielɛ ne mɔɔ Nyamenle ɛva ɛbɔ ɛwɔkɛ la a. Ɔle kɛmɔ ɔhanle la. Ɔse, “Menvale ɛya na menganle ndane kɛ, ‘Bɛ gyakɛ ba ɛnrɛtia ɛleka mɔɔ meyɛ kɛ memaa bɛaralie bɛ ɛnwomenle la.’ ” Ɔhanle ɛhye, noko ɛnee yewie ye gyima yɛ dɛba, ɔvi ewiade mɔlebɛbo ne amuala.

⁴ Wɔ Nyamenle Edwɛkɛ ne anu, bɛka ɛhye wɔ kenle ne mɔɔ tɔ zo nsuu la anwo kɛ, “Nyamenle liele ye ɛnwomenle wɔ ye gyima nwo wɔ kenle ne mɔɔ tɔ zolɛ nsuu la azo.”

⁵ Edwɛkɛ ɛhye ala noko a bɛha nwolɛ bie bieko kɛ, “Bɛ gyakɛ ba ɛnrɛtia ɛleka mɔɔ meyɛ kɛ memaa bɛaralie bɛ ɛnwomenle la.”

⁶Kɛmɔ bɛdabɛ mɔɔ bɛlumuale bɛdele Edwɛkpa ne la bie mɔ yɛle anzosesebɛ la, bɛannyia Nyamenle ɛnwomenlelielɛ ne, ɔboalekɛ bɛanlie bɛanli. Ɛhye kile kɛ ɛnee bie mɔ wɔ ɛkɛ mɔɔ bɛbanyia ɛwɔkɛ ne a.

⁷ Ɛhye ati Nyamenle ɛzie kenle fofolɛ mɔɔ le “Ɛnɛ”. Ɛvolɛ dɔɔnwo pɛle nu la, ɔluale Devidi anwo zo ɔhanle, kɛmɔ Nyamenle Edwɛkɛ ne se la: “Saa ɛnɛ bɛte Nyamenle ane a, bɛmmayɛ anzosesebɛ.”

⁸ Ɔluakɛ saa Dwɔhyua holale manle menli ne liele bɛ ɛnwomenle a, anrɛɛ Nyamenle eza ɛnrɛha kenle fofolɛ nwo edwɛkɛ bieko.

⁹Ɛhye ati Ɛnwomenlelielɛ Kenle tɛbɔ ɛkɛ ne tɛmaa Nyamenle menli ne, kɛmɔ Nyamenle liele ye ɛnwomenle wɔ kenle ne mɔɔ tɔ zolɛ nsuu la azo la.

¹⁰ Ɔluakɛ awie mɔɔ kɛnyia ɛnwomenlelielɛ ne mɔɔ Nyamenle ɛva ɛbɔ ɛwɔkɛ la die ye ɛnwomenle wɔ ɔdaye ye gyima nwo, kɛmɔ Nyamenle liele ye ɛnwomenle wɔ ye gyima nwo la.

¹¹Zɔhane ati, bɛmaa yɛbɔ mɔdenle kɛ yɛkɛnyia ɛnwomenlelielɛ ne, amaa yɛanlea boɛ na yɛ nuhua biala anyɛ anzosesebɛ, kɛmɔ yɛ nlenya mɔ yɛle la.

¹²Nyamenle Edwɛkɛ ne gyi zo na ɔyɛ se, ɔyɛ nla ɔtɛla dadeɛ anye nwiɔ biala. Ɔpɛ to, ɔdua ɛkɛla nee sunsum ayia zo, ɔgya mbowule agbɔkɛ nee mbowule ɛnlome ɛweɛne na ɔfede adwenle nee ahonle nu ɔnwu bɛ nzuzulɛ muala.

¹³Wɔ Nyamenle anyunlu, debie biala ɛnvea; debie biala mɔɔ wɔ aleɛabo la la ɔ nyunlu wienyi, na yemɔ yɛɛ yɛbabu yɛ mgbonda yɛahile ye a.

¹⁴Yemɔti, bɛmaa yɛzɔ diedi ne mɔɔ yɛnyia ye la anu ɛsesebɛ. Ɔluakɛ yɛlɛ Sɛlɛvolɛ Kpanyinli Kpole Kpalɛ mɔɔ ɛhɔ toonwo ɛhɔdwu Nyamenle anyunlu a; yemɔ a le Gyisɛse, mɔɔ le Nyamenle Ara ne.

¹⁵Yɛ Sɛlɛvolɛ Kpanyinli ɛhye le sonla mɔɔ se yɛ anwunvɔne wɔ yɛ sinlidɔlɛ nwo a. Yɛlɛ Sɛlɛvolɛ Kpanyinli mɔɔ bɛzɔle ye bɛnleanle kɛ yɛdayɛ la, noko yeanyɛ ɛtane biala.

¹⁶Zɔhane ati bɛmaa yɛzi ahonle na yɛbikye Nyamenle belemgbunli ebia ne mɔɔ ɛlolɛ ɛyi ye tɛkɛɛ la anwo. Ɛkɛ ne yɛɛ bɛbanwu yɛ anwunvɔne na ye ɛlolɛ ti yɛanyia moalɛ wɔ mekɛ mɔɔ yɛkɛhyia la a.